ព័ត៌មានជាតិ
សៀវភៅមហាសង្ក្រាន្តឆ្នាំខាល លក់ដាច់អស់តាមទីផ្សារ ខណៈតម្លៃឡើងទ្វេដង
រយៈពេលជិត១ខែទៀត ទើបចូលដល់ពិធីបុណ្យចូលឆ្នាំប្រពៃណីខ្មែរ។ ប៉ុន្តែមហាជនកំពុងពិបាកស្វែងរកជាវសៀវភៅមហាសង្ក្រាន្ត ដោយតាមបណ្ដាទីតាំងលក់សៀវភៅនានា ត្រូវបានលក់អស់ ទន្ទឹមពេលសៀវភៅឆ្នាំនេះ ឡើងថ្លៃ ១ គុណជា ២។
លោក សុភ័ក្ត្រ បុគ្គលិកក្រុមហ៊ុនឯកជន នៅរាជធានីភ្នំពេញ បានប្រាប់ “កម្ពុជាថ្មី” នៅថ្ងៃទី២២ ខែមីនានេះថា លោកបានស្វែងរកជាវសៀវភៅសង្ក្រាន្តឆ្នាំថ្មី ឆ្នាំខាលនេះ នៅកន្លែងលក់សៀវភៅជាច្រើនកន្លែងនៅប៉ុន្មានថ្ងៃនេះ ប៉ុន្តែរកជាវមិនបាន ដ្បិតកន្លែងលក់សៀវភៅខ្លះថាលក់អស់ និងកន្លែងខ្លះទៀតថាអត់មាន។
លោក សុភ័ក្រ បញ្ជាក់ថា៖ “ខ្ញុំលឺអ្នកស្គាល់គ្នាប៉ុន្មាននាក់ថា អត់ទាន់ឃើញសៀវភៅសង្ក្រាន្ត ខ្ញុំស្មានតែគេអត់ទាន់ចេញលក់។ ធម្មតាតែជិតដល់ចូលឆ្នាំ ខ្ញុំតែងទិញសៀវភៅមហាសង្ក្រាន្ត សម្រាប់គ្រួសារអានឱ្យដឹងពេលវេលាទេវតាចុះ ក៏ដូចជាដង្វាយទទួលទេវតា ទំនាយប្រចាំឆ្នាំ ជោគជាតារាសីអីជាដើមហ្នឹង។ ខ្ញុំរក [ទិញសៀវភៅមហាសង្ក្រាន្ត ឆ្នាំខាល] ច្រើនកន្លែងណាស់ តាំងពីតូបលក់សៀវភៅសាលាទួលទំពូង នៅបាក់ទូក សាលា ជ័យ ថាវី ហើយសូម្បីតែនៅបណ្ណាគារធំៗ ក៏អត់មាន”។
អ្នកស្រី សុផារី អាជីវករលក់សៀវភៅ និងសម្ភារសិក្សា នៅរបងវិទ្យាល័យ ផ្សារដើមថ្កូវ រាជធានីភ្នំពេញ បានប្រាប់ “កម្ពុជាថ្មី” ថា សៀវភៅមហាសង្ក្រាន្តឆ្នាំនេះលក់ដាច់ ហើយថ្លៃជាងឆ្នាំមុន ដែលសៀវភៅក៏បន្ថែមខ្លឹមសារ គឺមានទាំងហោរាស្ត្របែបខ្មែរ និងបែបចិន។
អ្នកស្រី សុផារី រៀបរាប់បន្តថា៖ “រាល់ដងសៀវភៅ មហាសង្ក្រាន្ត មួយក្បាល តែ ៦-៧ ពាន់ (រៀល) តែឆ្នាំនេះឡើងថ្លៃ។ ខ្ញុំទិញពីគេតចូល ១ ម៉ឺន ៣ (១៣ ០០០ ៛) អីដែរហើយ ហើយបើលក់ យកចំណេញតែ ១ពាន់ (១ ០០០៛) អីទេ។ ហើយឥឡូវកន្លែងខ្ញុំនៅសល់តែ ១ក្បាលទេ”។
លោក អ៊ឹម បុរិន្ទ នាយកនៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ និងជាអ្នករៀបរៀងសៀវភៅមហាសង្ក្រាន្តផ្ទាល់ មានប្រសាសន៍ប្រាប់ “កម្ពុជាថ្មី” នៅថ្ងៃទី២២ ខែមីនា ឆ្នាំ២០២២នេះថា សៀវភៅមហាសង្ក្រាន្តឆ្នាំបោះពុម្ពលើកទី១ ចេញលក់នៅពាក់កណ្ដាលខែកុម្ភៈកន្លងទៅនេះ បានលក់អស់ហើយ ចំណែកការឡើងថ្លៃសៀវភៅនោះ គឺដោយសារ សៀវភៅបានបន្ថែមខ្លឹមសារ និងចំនួនកម្រាស់ទំព័រសៀវភៅ។
លោក អ៊ឹម បុរិន្ទ មានប្រសាសន៍ថា៖ “ខ្លឹមសារយើងបញ្ចូលច្រើន តាំងពីក្បួនខ្នាតបែបចិន ទិសមង្គល ទិសអមង្គល និងខ្លឹមសារសំខាន់ៗច្រើនទៀតដែលយើងត្រូវបន្ថែមទំព័រ ពីជាង ១០០ ទៅជាង ២០០ទំព័រដែរ ទើបឡើងថ្លៃបែបនេះ។ កន្លងមក យើងអស់ដែលបង្ហាញរឿងទាំងថែមអស់ហ្នឹងទេ ទើបតែឥឡូវយើងបញ្ចូល”។
លោកប្រសាសន៍បន្តថា៖ “ចំនួនបោះពុម្ពសៀវភៅមហាសង្ក្រាន្ត ឆ្នាំនេះ ក៏ប្រហែលចំនួនឆ្នាំមុនដែល គឺខ្ទង់ ១ម៉ឺន ឬ១ម៉ឺងក្បាលជាង។ ឥឡូវខ្ញុំបានបោះពុម្ព ២, ០០០ក្បាលទៀត ដែលនៅសល់តែ ជាង ៦០០ ក្បាលជាងទេ។ ឆ្នាំនេះ សៀវភៅលក់អស់លឿនជាងរាល់ឆ្នាំ”។
លោក អ៊ឹម បុរិន្ទ បានមានប្រសាសន៍ផ្ដាំថា បើមហាជនចង់បានសៀវភៅ អាចស្វែងរកតាមបណ្ដាតូបលក់សៀវភៅ បណ្ណាគារ ពិសេសនៅភ្នំពេញ គឺនៅផ្សារអូរឫស្សីជាន់ទី២។ លោកបញ្ជាក់បន្ថែមថា សៀវភៅមហាសង្ក្រាន្តឆ្នាំក្រោយ លោកនឹងបន្ថែមខ្លឹមសារសំខាន់ៗទៀត ប្រហែលពី ៨ ទៅ ១៦ ទំព័រ ពីព្រោះសៀវភៅបោះពុម្ពផ្សាយកន្លងទៅ មិនទាន់អស់សេចក្ដីនូវអ្វីដែលអ្នកអាន និងមហាជនចង់ដឹង៕
អត្ថបទ៖ ច័ន្ទ វីរៈ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៣ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ