ក្រសួង​ធម្មការ​ ណែនាំ​ឱ្យប្រជាពលរដ្ឋ​ចូលរួមទប់​ស្កាត់ជំងឺកូវីដ១៩​ អំឡុងដើរ​កម្សាន្ត​ពេលចូល​ឆ្នាំ

ក្រសួងធម្មការ​ និងសាសនា​ បានណែនាំឱ្យ​គណៈកម្មការ​តាមវត្តអារាម ​ប្រជាពលរដ្ឋ​ពុទ្ធបរិស័ទ​បន្តអនុវត្តវិធានការសុខាភិបាល ៣ ការពារ និង ៣ កុំ ដើម្បីការពារកុំឱ្យឆ្លងជំងឺកូវីដ១៩ អំឡុងពេលចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់ឆាប់ៗនេះ។

លោក សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា មានប្រសាសន៍​ថា​៖ ចំពោះវិធានការទប់ស្កាត់​នូវការ​រីករាលដាល​ជំងឺកូវីដ១៩ អំឡុងពេល​ជួបជុំចូលឆ្នាំថ្មី​ក្រសួង​ណែនាំឱ្យអនុវត្តវិធានការ ៣ ការពារ ៣ កុំ ដើម្បីចៀសផុតពីមេរោគកូវីដ១៩។

លោកថា ស្ថាប័នពាក់​ពាក់ព័ន្ធ អាជ្ញាធរដែនដី និងគណៈសង្ឃ មាការរៀបចំទីវត្តអារាមឱ្យបានល្អ មាន​អនាម័យស្អាត តុប​តែងត្រៀមទទួលទេវតាឆ្នាំថ្មី ភ្ញៀវជាតិ និងអន្តរជាតិ ដែលមក​ចូលរួមកម្សាន្តទស្សនា។

ដោយឡែក ចំពោះការដាក់ធុងបាសរាំលេងកម្សាន្តតាមវត្ត ក្រសួងមិនបានហាមឃាត់ទេ អាស្រ័យទៅលើអាជ្ញាធរដែនដី ប៉ុន្តែអ្វីដែលមិនតម្រូវឱ្យមានគឺ ល្បែងស៊ីសង ការគប់ទឹក ប៉ាតម្សៅជាដើម។

ពិធីបុណ្យចូលឆ្នាំថ្មីប្រពៃណីជាតិ នឹងត្រូវប្រារព្ធធ្វើឡើងនៅថ្ងៃព្រហស្បតិ៍ ១៣ កើតខែចេត្រ ត្រូវនឹង​ថ្ងៃទី ១៤ ខែមេសា ២០២២ វេលាម៉ោង ១០:០០នាទី។

ទេវធីតាឆ្នាំថ្មី ព្រះនាម កិរិណីទេវី ជារាជបុត្រី​ទី៥ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌បតង លម្អនៅព្រះ​កាណ៌ដោយ​សៀតផ្កាមន្ទា អភរណៈកែវមរកត ភក្សាហារ​ទ្រង់​សណ្ដែក-ល្ង ព្រះហស្ដស្តាំទ្រង់ កង្វេរ ព្រហស្តឆ្វេង​ទ្រង់កាំភ្លើង ទ្រង់គង់ឈរបើកព្រះនេត្រ​នៅលើខ្នង ដំរី (គជសារ) ជាយានពាហនៈ៕

អត្ថបទ៖ ឡេង ដេត