ព័ត៌មានជាតិ
តំបន់ប្រាសាទកោះកេរ មានអំណោយផលកសិកម្មផ្លែឈើ ពិសេសក្នុងឱកាសចូលឆ្នាំ និងខែឧសភា
អគ្គនាយកអាជ្ញាធរជាតិព្រះវិហារ លោក គង់ ពុទ្ធិការ មានប្រសាសន៍ប្រាប់ “កម្ពុជាថ្មី” ថា ក្រៅពីតំបន់អង្គរដែលកម្ពុជាមាន និងល្បីល្បាញទាំងក្នុងប្រទេស និងឆាកអន្តរជាតិជាយូរមកហើយនោះ ប្រជាពលរដ្ឋគួរតែឈ្វេងយល់បន្ថែមទៀតនៅតំបន់រមណីដ្ឋានកោះកេរ ព្រោះជាអតីតរាជធានីមួយដែរ នៅសម័យអង្គរ ហើយក៏មានសក្ដានុពលទេសចរណ៍ ទាំងផ្នែកវប្បធម៌ ទេសចរណ៍ធម្មជាតិ និងទេសចរណ៍កសិកម្ម។
លោក គង់ ពុទ្ធិការ មានប្រសាសន៍បន្តថា៖ “ក្នុងតំបន់កោះកេរ មានកសិផលមួយចំនួនដែលប្រជាពលរដ្ឋ និងភ្ញៀវទេសចរអាចទៅជាវ និងទទួលទានបានដូចជា ទុរេន សាវម៉ាវ ទៀប ល្ហុង ចន្ទី និងផ្លែឈើក្នុងស្រុកមួយចំនួនទៀត ជាពិសេសក្នុងខែមេសា និងខែឧសភា ដែលសម្បូរផ្លែឈើ អ៊ីចឹងភ្ញៀវទេសចរអាចទៅកម្សាន្តនៅប្រាសាទកោះកេរ និងទទួលទានផ្លែឈើក្នុងតំបន់ផងដែរ”។
អគ្គនាយកអាជ្ញាធរជាតិព្រះវិហារ រូបនេះបញ្ជាក់ថា តំបន់ប្រាសាទកោះកេរ ជាតំបន់ដីក្រហម ដីមានជីជាតិ ដាំដុះបានល្អ ជាពិសេសដំណាំទុរេន និងសាម៉ាវ ដែលប្រជាពលរដ្ឋដាំលក្ខណៈចម្ការគ្រួសារ ក្នុងមួយគ្រួសារដាំ ៣ ទៅ ៥ ហិចតា ដែលអាចទទួលភ្ញៀវទេសចរគ្រប់គ្រាន់។
លោក គង់ ពុទ្ធិការ មានប្រសាសន៍ឆ្លើយតបបន្ថែមថា៖ តំបន់ប្រាសាទកោះកេរ កាលឆ្នាំ ២០០៤ ២០០៥ គឺធ្វើដំណើរចេញពីខេត្តសៀម ១ថ្ងៃវាល់ល្ងាចទើបដល់ ប៉ុន្តែក្រោយពីរដ្ឋាភិបាលបានកសាងហេដ្ឋារចនាសម្ព័ន្ធផ្លូវស្ពាន ឥឡូវអ្នកសៀមរាបអាចមកលេងតំបន់ប្រាសាទកោះកេរវិលល្ងាចបាន។
លោក គង់ ពុទ្ធិការ បញ្ជាក់ថា៖ “ចំណែកអ្នកមកពីភ្នំពេញ អាចមកលេងប្រាសាទកោះកេរហើយ សម្រាកនៅទីរួមខេត្តព្រះវិហារ១យប់ ហើយអាចបន្តទៅប្រាសាទព្រះវិហារ និងខេត្តសៀមរាបបាន ខណៈនៅតំបន់ប្រាសាទកោះកេរមានផ្ទះសំណាក់ចំនួន២ មានជាង ២០ បន្ទប់ស្នាក់”។
សូមជម្រាបថា ប្រាសាទកោះកេរមានទីតាំងស្ថិតនៅក្នុងភូមិស្រយ៉ង់ជើង ឃុំស្រយ៉ង់ ស្រុកគូលេន ខេត្តព្រះវិហារ មានចម្ងាយប្រមាណ ៨០ គីឡូម៉ែត្រ ពីទីរួមខេត្តព្រះវិហារ។
ទីតាំងប្រជុំប្រាសាទកោះកេរនេះ គឺជាអតីតរាជធានី “ឆោកគគ៌្យរ” របស់ព្រះបាទជ័យវរ្ម័នទី៤ ដែលត្រូវបានកសាងឡើងក្នុងសតវត្សទី១០ (៩២៨-៩៤២)។ ព្រះអង្គបានផ្លាស់ប្តូររាជធានីពីក្រុងយសោធរបុរៈ (ក្រុងអង្គរ) ទៅកាន់តំបន់កោះកេរនេះ ក្រោយពេលដណ្ដើមរាជបល្ល័ង្កពីក្មួយរបស់ព្រះអង្គ គឺព្រះបាទយសោវរ្ម័នទី២ ដែលសោយរាជ្យនៅក្រុងអង្គរ។ ប្រាសាទនេះកសាងឡើងតាមរចនាប័ទ្មកោះកេរ ដែលមានរាងស្រដៀងនឹងពីរ៉ាមីត។
កម្ពុជាបានដាក់ឯកសារស្នើសុំចុះបញ្ជីប្រាសាទកោះកេរ ទៅកាន់គណៈកម្មការបេតិកភណ្ឌពិភពលោកកាលពីដើមឆ្នាំ២០២១ ចំណែកខាងគណៈកម្មការបេតិកភណ្ឌពិភពលោក បានទទួលឯកសារ និងបានបញ្ជូនអ្នកជំនាញមកពិនិត្យ និងវាយតម្លៃរួចហើយ កាលពីឆ្នាំ២០២១កន្លងទៅ ដោយយើងនៅរង់ចាំលទ្ធផលប្រជុំសម្រេចពី គណៈកម្មការបេតិកភណ្ឌពិភពលោក នៅកំឡុងខែ មិថុនា ឬ ខែកក្កដា ខាងមុខ៕
អត្ថបទ៖ ច័ន្ទ វីរៈ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ