សិស្សឈ្នះ​មេដាយមាស​មុខវិជ្ជាគណិត​ លឹម ឈីងអ៊ី ប្រាប់បទពិសោធន៍រៀន​ឱ្យក្លាយជាសិស្សពូកែ​

សិស្សពូកែមុខវិជ្ជាគណិត កញ្ញា លឹម ឈីងអ៊ី ​បានប្រឡងជាប់ចំណាត់ថ្នាក់លេខមួយ និងទទួល​បាន​មេដាយមាសពីការប្រកួតវិញ្ញាសាគណិតថ្នាក់ទី ១២ ក្នុងកម្មវិធីក្នុង​កម្មវិធី Singapore and Asian Schools Math Olympiads (SASMO) ក្នុងចំណោមសិស្សពូកែជាង ៣ ម៉ឺននាក់ (៣៣ ៦៧៩) មកពី ២៨ ប្រទេសនៅជុំវិញពិភពលោក។

កញ្ញា លឹម ឈីងអ៊ីប្រាប់កម្ពុជាថា ដើម្បីឱ្យក្លាយជាសិស្សពូកែមុខវិជ្ជាគណិត ដំបូងសិស្សខ្លួនឯង ត្រូវមើលលើសមត្ថ​ភាពរបស់ខ្លួន ព្រោះថា ទេពកោសល្យរបស់មនុស្សយើងម្នាក់ៗមិនដូចគ្នាទេ ខ្លះមានដុងខាងហ្នឹង ឯខ្លះទៀត​មិនមានដុងដូច្នេះបើយើងបង្ខំក៏ទៅមិនរួចដែរ។

កញ្ញា លឹម ឈីងអ៊ី បានឱ្យដឹងថា «ប្រសិនបើយើងអត់មានដុងខាងហ្នឹងទេ យើងគ្រាន់តែធម្មតា អាហ្នឹង​អត់អាចនិយាយបានថាពូកែទេ ប៉ុន្តែអាចនិយាយបានថា ម៉ាជាប់ៗ សិស្សល្អ សិស្សពូ​​កែត្រឹម​តែ​សាលា មិនអាចពូកែ ដល់ថ្នាក់ជាតិ ឬលេចធ្លោជាងគេបានទេ»។

​សម្រាប់អ្នកដែលមានដុង​ និងសមត្ថភាពហើយ ​គឺត្រូវរៀនមេរៀនឱ្យបានច្បាស់លាស់ ​ត្រូវដឹង ថា​មេ​រៀន​ហ្នឹងគេចង់រៀនពីអ្វី ហើយដល់ពេលគេរៀននិងហើយ គេយកមេរៀនហ្នឹងទៅអនុវត្តក្នុង​ជីវ​ភាព​រស់នៅអនុវត្តម៉េចខ្លះ យើងអាចយកវាទៅកសាងបានអ្វីខ្លះ។

កញ្ញា លឹម ឈីងអ៊ី បន្តថា​នៅពេលដែលយើងរៀនមេរៀនហ្នឹងហើយ ស្ដាប់គ្រូពន្យល់​ល្អិតល្អន់​ហើយទៅដល់ផ្ទះយើងត្រូវ​ស្រាវជ្រាវខ្លួនឯង ឧស្សាធ្វើលំហាត់ដោយមិនត្រឹមតែលំហាត់​របស់​គ្រូ​យើង​ទេ គឺត្រូវធ្វើរបស់គ្រូផ្សេង មកពីក្រៅផ្សេងមកពីមិត្តភក្ដិ ឬប្រព័ន្ធអ៊ិនធើណិតជាដើម។

យុវតីរូបនេះ ប្រាប់ថា បទពិសោធន៍របស់ខ្លួន ដំបូងមិនពូកែគណិតដូចគេទេ ប៉ុន្តែនាងបាន​តាំងចិត្ត​ខិត​ខំរៀន ឧស្សាធ្វើលំហាតុច្រើនចាប់ពីតូចទៅទើបទទួលបានលទ្ធផលល្អបែបនេះ។

នៅពេលសួថា តើកម្រិតការប្រកួតមុខវិជ្ជាគណិតអន្តរជាតិនៅប្រទេសសិង្ហបុរី ​មានភាពខុស​គ្នា​ដូច​ម្ដេចខ្លះ ប្រៀបធៀបនៅក្នុងស្រុក? កញ្ញាប្រាប់ថា ចំណុចនេះខុសគ្នាច្រើន ដោយសារតែអន្តរជាតិ បន្ថែមមេរៀនដែលពិបាកៗច្រើន ​នៅក្នុងស្រុក កម្មវិធីសិក្សា របស់ក្រសួង​អប់រំមិនបាន​បញ្ចូល​កម្មវិធី​ពិបាកៗទេ គឺដាក់ដើម្បីឱ្យសិស្សចាប់បាន។

ចំណែកមេរៀនគណិតវិទ្យាក្រសួងអប់រំមិនបានបញ្ចូលទាំងអស់នោះទេដែល​ធ្វើឱ្យ​មេរៀន​មួយ​ចំនួនបាត់ ខណៈអន្តរជាតិគឺគេបញ្ចូលទាំងអស់ ដូច្នេះពេលប្រឡងមានមេរៀន និង​ទ្រឹស្ដីខ្លះ អត់​ដែលបានរៀនពីមុនមកទេ ចឹងបើចង់ប្រឡងអន្តរជាតិទាល់​តែខំស្រាវជ្រាវ​រៀនខ្លួន​ឯង​។

​កញ្ញា លឹម ឈីងអ៊ី ជាអ្នកភ្នំពេញ កំពុងសិក្សានៅវិទ្យាល័យជាស៊ីមសន្ធរម៉ុក ថ្នាក់ទី១២ បានចូលរួមប្រឡងប្រកួតប្រជែងក្នុងកម្មវិធីគណិតវិទ្យាអន្តរជាតិ-សិង្ហបុរី ២០២០-២០២២ ហើយបានជាប់ចំណាត់ថ្នាក់លេខមួយនៅកម្ពុជា និងទទួលបានមេដាយមាសផ្នែក​គណិតវិទ្យាតាមរយៈអនឡាញ នៅប្រទេសសិង្ហបុរី ក្នុងចំណោមសិស្សពូកែ ៣៣ ៦៧៩ នាក់ មកពី២៨ ប្រទេសនៅជុំវិញពិភពលោក៕

អត្ថបទ៖ ឡេង ដេត