អគារពហុព្យាបាលកម្ពស់ ៨ ជាន់ នៅមន្ទីរ​ពេទ្យអង្គឌួង​សម្រេចការសាងសង់​បាន៩០%

រហូតមកដល់ពេលនេះអគារពហុព្យាបាលមានកម្ពស់ ៨ ជាន់ដ៏ថ្មីសន្លាងមួយទៀតស្ថិតនៅក្នុងមន្ទីរពេទ្យព្រះអង្គឌួង​សម្រេចការសាងសង់បានប្រមាណ៩០ភាគរយហើយ គ្រោងនឹងសាងសង់រួចរាល់ នៅខែតុលាឆ្នាំ២០២២ខាងមុខនេះ។

លោកសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង បានមានប្រសាសន៍នៅព្រឹកថ្ងៃទី២១សីហានេះថា អគារពហុព្យាបាល ដែលមានកម្ពស់ ៨ ជាន់នេះ បានចាប់ផ្តើមសាងសង់កាលពីខែមេសា ឆ្នាំ ២០២១ ដែលរហូតមកដល់ពេលនេះសម្រេចការសាងសង់បានចំនួន៩០ភាគរយ ដោយចំណាយថវិកាប្រមាណ ៣ លានដុល្លារអាមេរិកជាថវិការបស់រាជរដ្ឋាភិបាល ដើម្បីបម្រើដល់ការព្យាបាលជំងឺជូនដល់ប្រជា​ពលរដ្ឋ​ប្រកបដោយគុណភាពនិងប្រសិទ្ធភាពខ្ពស់។

លោកសាស្ត្រាចារ្យបានបន្ថែមថា បច្ចុប្បន្ននេះមន្ទីរពេទ្យមានអគារថ្មីចំនួន៣រួចមកហើយ គឺទី១អគារព្យាបាលភ្នែក​មានកម្ពស់ ៣ ជាន់ជាជំនួយរបស់រដ្ឋាភិបាលកូរ៉េខាងត្បូង ទី២អគារត្រចៀកច្រមុះបំពង់កកម្ពស់ ៥ ជាន់តម្លៃ ៨ លានដុល្លារ ដែលជាជំនួយរបស់រដ្ឋាភិបាលកូរ៉េខាងត្បូង និងអគារកម្ពស់ ៥ ជាន់ដែលជាថវិការបស់រដ្ឋសម្រាប់ព្យាបាល​ជំងឺទូទៅដែលមានគ្រែសរុប៥៣០គ្រែខណៈកាលពីឆ្នាំ២០០៨មន្ទីរពេទ្យមានគ្រែត្រឹមតែ៨០គ្រែប៉ុណ្ណោះ។ប៉ុន្តែនៅពេលអគារកម្ពស់៨ជាន់ដាក់ដំណើរការនឹងធ្វើឱ្យចំនួនគ្រែកើនឡើងដល់ទៅ៧៣០គ្រែ។

លោកនាយកមន្ទីរពេទ្យ បានបញ្ជាក់ថា ការកសាងអគារថ្មីជាបន្តបន្ទាប់នេះ គឺដើម្បីឆ្លើយតបទៅនឹងតម្រូវការរបស់អ្នកជំងឺ ដែលមកទទួលសេវានៅមន្ទីរពេទ្យចេះតែមានការកើនឡើងជាលំដាប់ព្រោះថាក្នុង១ថ្ងៃមន្ទីរពេទ្យបានទទួលអ្នកជំងឺមកពិគ្រោះជំងឺក្រៅប្រមាណពី១៣០០ទៅ១៥០០នាក់ ដែលភាគច្រើនជាប្រជាពលរដ្ឋទូទៅ និងកម្មកររោងចក្រ និងវះកាត់ជាមធ្យមក្នុង១ថ្ងៃចំនួន១៣០នាក់ ក្នុងនោះវះកាត់ភ្នែក ត្រចៀក ច្រមុះ និងបំពង់កប្រមាណ១០០នាក់។

 លោកនាយកមន្ទីរពេទ្យ សង្ឃឹមថា នៅពេលសាងសង់អគារបានរួចរាល់នោះ នឹងធ្វើឱ្យមន្ទីរពេទ្យព្រះអង្គឌួងក្លាយ​ជាមន្ទីរពេទ្យរដ្ឋមួយទំនើប ក្នុងចំណោមមន្ទីរពេទ្យរដ្ឋផ្សេងៗទៀត ពិសេសជួយក្នុងការសម្រួលដល់ការ​សម្រាកព្យាបាលជំងឺនៅក្នុងមន្ទីរពេទ្យផ្ទាល់តែម្តង ពិសេសជួយបំពេញការឆ្លើយតបទៅនឹងតម្រូវ​ការរបស់ប្រជា​ពលរដ្ឋក៏ដូចជាបង្កើនគុណភាពសេវាកម្ម ក្នុងមន្ទីរពេទ្យព្រះអង្គឌួងឱ្យល្អប្រសើរមួយកម្រិតទៀត។ គោលការណ៍មន្ទីរពេទ្យបានកំណត់ថាក្នុង១ថ្ងៃត្រូវពិនិត្យអ្នកជំងឺម្នាក់ឱ្យចប់សព្វគ្រប់តែម្តងទាំងការពិគ្រោះ ថតឆ្លុះ មើលឈាមមុននឹងដាក់កម្មវិធីវះកាត់លើកលែងតែក្នុងករណីអ្នកជំងឺវះកាត់ខ្លះដែលមានជំងឺប្រចាំកាយច្រើនដូចជាជំងឺលើសឈាម ជំងឺទឹកនោមផ្អែមឬជំងឺបេះដូងដែលទាមទារឱ្យព្យាបាលជំងឺទាំងនោះ​បានធូរស្រាលសិនទើបអាចធ្វើការវះកាត់​បានទោះបីជាអ្នកជំងឺក្រីក្រ កម្មកររោងចក្រឬអ្នកជំងឺទូទៅ​ក៏ដោយ​ត្រូវអនុវត្ត​ដោយស្មើភាពគឺក្នុង១ថ្ងៃត្រូវមើលឱ្យចប់។

លោកនាយកមន្ទីរពេទ្យបានអះអាងថា ការធ្វើបែបនេះគឺលោកមិនចង់ឱ្យអ្នកជំងឺត្រូវរង់ចាំយូរច្រើនថ្ងៃដែលធ្វើឱ្យពួកគាត់​ត្រូវចំណាយពេលវេលា និងថវិកាច្រើន ក្នុងការស្នាក់នៅហូបចុកទម្រាំបានវះកាត់ ឬដឹងលទ្ធផលប្រភេទជំងឺរបស់​ពួកគាត់នោះទេ៕

អត្ថបទ៖ សំអឿន