ភ្ញៀវទេសចរបន្តធ្លាក់ចុះជិត ៥ភាគរយ នៅចុងសប្តាហ៍ ថ្ងៃទី២០-២១ សីហា

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងទេសចរណ៍ បានបង្ហាញតួលេខភ្ញៀវទេសចរ ដែលចេញកម្សាន្តថ្ងៃចុងសប្តាហ៍ មានការធ្លាក់ចុះ ៤.៧៣% ធៀបនឹងសប្តាហ៍កន្លងមក។ លោក ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា ស្ថិតិភ្ញៀវទេសចរ​ផ្ទៃក្នុងប្រចាំសប្តាហ៍ នៅថ្ងៃទី២០-២១ ខែសីហា ឆ្នាំ២០២២ នៅទូទាំងប្រទេស មានចំនួន ២២២,៨៥៣នាក់ ក្នុងនោះភ្ញៀវជាតិ ២០០,៦៤៥នាក់ និងភ្ញៀវបរទេសផ្ទៃក្នុង២២,២០៨នាក់។

រដ្ឋមន្រ្តីក្រសួងទេសចរបញ្ជាក់ថា បញ្ហាអាកាសធាតុ និងលទ្ធភាពនៃការកើតមានជំនន់ទឹកភ្លៀងនៅតាមបណ្តាខេត្តមួយ​ចំនួនតាមការណែនាំរបស់ក្រសួងធនធានទឹក និងឧតុនិយម ធ្វើឲ្យចរន្តភ្ញៀវមានការប្រែប្រួលឡើងចុះពីមួយ​សប្តាហ៍​ទៅមួយសប្តាហ៍។

ចំពោះខេត្តគោលដៅទេសចរណ៍សំខាន់ៗ រួមមាន៖ ខេត្តសៀមរាប ទទួលបានភ្ញៀវទេសចរចំនួន ៣៣,៩៦៨នាក់ នៅថ្ងៃចុងសប្តាហ៍កន្លងទៅ ខណៈខេត្តព្រះសីហនុ ទទួលបានៅហះៀវទេសចរ ៣១,៨១៥នាក់ ខេត្តកំពត ២៨,០៤០នាក់ ខេត្តបាត់ដំបង ២០,៧៩០នាក់ និងរាជធានីភ្នំពេញ ១៩,៧៩៩នាក់។​

បច្ចុប្បន្ន ក្រសួងទេសចរណ៍ក្នុងនាមគណៈកម្មាធិការជាតិគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ បាននិង​កំពុង​សហការជា​មួយក្រសួងប្រៃសណីយ៍ និងទូរគមនាគមន៍ ជំរុញការដំឡើង​អង់តែនទូរស័ព្ទ និងសេវាអ៊ីនធើណែត ១០០បង្គោល នៅតាមគោលដៅទេសចរណ៍អាទិភាព ពិសេសតំបន់​អេកូទេសចរណ៍ និងសហគមន៍ទេសចរណ៍ដែលនៅដាច់ស្រយាល៕