ម្ចាស់អាជីវកម្ម និងអ្នកជំនាញ គ្រោងជួបគ្នា​នៅដើមខែកញ្ញា ជជែកអំពីឱកាស​ក្រោយកូវីដ-១៩

វេទិកាម្ចាស់អាជីវកម្មកម្ពុជា ស្តីពីការប្រឈម និងឱកាសក្រោយកូវីដ-១៩ និងរលកសេដ្ឋកិច្ចសកលថ្មី នឹងប្រព្រឹត្តទៅ​នៅថ្ងៃទី៣ កញ្ញា ឆ្នាំ២០២២ ខាងមុខ ក្រោមការចូលរួមពីសំណាក់វាលគ្មិនដែលជាអ្នកជំនាញសេដ្ឋកិច្ច និងមានបទ​ពិសោធន៍ក្នុងពិភពជំនួញជាច្រើន ដែលវេទិកានេះ នឹងធ្វើនៅសណ្ឋាគារភ្នំពេញ។

លោក កឹម អឿន ស្ថាបនិក  និងជាអគ្គនាយកសហគ្រាសអប់រំ Home-Ducation បានឱ្យដឹងនៅក្នុងសន្និសីទ​កាសែត នៅថ្ងៃ ២៩ ខែសីហា ថា កម្មវិធីនេះធ្វើឡើងក្នុងគោលបំណងផ្តល់ពត៌មានដល់អាជីវករ អំពីដំណើរការអភិវឌ្ឍន៍ SME នាពេលអនាគត សេដ្ឋកិច្ចតំបន់ និងពិភពលោក ជាពិសេស សេដ្ឋកិច្ចកម្ពុជា អំពីឥទ្ធិពលវិជ្ជមាន និងអវិជ្ជមាន​ផ្សេងៗ​មកលើម្ចាស់អាជីវកម្ម ពីសំណាក់វាលគ្មិនដែលជាអ្នកជំនួញមានជំនាញចំនួន ១០រូប។ លើសពីនេះ កម្មវីធីនេះ គឺជួយឱ្យអាជីវករគ្រប់រូប ត្រូវចេះត្រៀមខ្លួនចាប់យកឱកាស នៅក្នុងវិបត្តិសេដ្ឋកិច្ច។

អ្នកជំនាញរូបនេះបន្តថា កម្មវិធីនេះ ជាវេទិកាសម្រាប់អាជីវករបង្ហាញខ្លួន និងផ្សព្វផ្សាយផលិតផល ព្រមទាំងផ្តល់ពត៌​មាន​ពីយន្តការគាំពារ និងគោលនយោបាយរបស់ស្ថាប័នអន្តរជាតិ និងរាជរដ្ឋាភិបាល។ 

បើតាមលោក កឹម អឿន កម្មវិធីនេះ នឹងធ្វើការជជែកវែកញែក រវាងអាជីវករ និងអ្នកជំនាញ អំពីបញ្ហាប្រឈមផ្សេងៗ និងស្វែងរកដំណោះស្រាយ ក្នុងការអភិវឌ្ឍ អាជីវកម្មក្នុងដំណាក់កាលមានវិបតិ្តសកលផ្សេងៗ ជាពិសេស សង្គ្រាមរវាង​រុស្ស៊ីជាមួយអ៊ុយក្រែន៕

អត្ថបទ៖ នាង រតនៈ