អាជ្ញាធរខេត្តបាត់ដំបងត្រៀមកម្លាំងការពារសុវត្ថិភាពជូនពលរដ្ឋក្នុងឱកាសបុណ្យអុំទូកខាងមុខ

កាលពីរសៀលថ្ងៃទី១៩ ខែកញ្ញា ឆ្នាំ២០២២ នៅក្នុងបរិវេណសាលាខេត្តបាត់ដំបង បានបើកកិច្ចប្រជុំដើម្បីរៀបចំព្រះរាជពិធីបុណ្យអុំទូកចំនួន២ថ្ងៃ ដែលនឹងប្រារព្ធឡើងនៅថ្ងៃទី៩ និងថ្ងៃទី១០ ខែតុលា ឆ្នាំ២០២២ នាពេលដ៏ខ្លីខាងមុខនេះ ។

កិច្ចប្រជុំនេះ គឺបានចូលរួមពីសំណាក់ថ្នាក់ដឹកនាំមន្ត្រីរាជការ និងប្រធានអង្គភាពនានា ក្រោមអធិបតីភាពឯកឧត្ត សុខ លូ អភិបាលនៃគណអភិបាលខេត្តបាត់ដំបង ក្នុងគោលបំណងពង្រឹងកម្លាំងដើម្បីត្រៀមលក្ខណ:ការពារអោយបាននូវសុខសុវត្ថិភាពជូនប្រជាពលរដ្ឋដែលបានចូលរួមក្នុងពិធីបុណ្យអុំទូកនាពេលខាងមុខនេះ។

ឯកឧត្តមអភិបាលខេត្តក៏បានក្រើនរំលឹកដល់កងកម្លាំងប្រដាប់អាវុធទាំង៣ស្ថាប័ន ធ្វើយ៉ាងណារក្សាសន្តិសុខអោយបានជូនបងប្អូនប្រជាពលរដ្ឋនាឱកាសបុណ្យភ្ជុំបិណ្ឌ និងការរៀបចំពិធីបុណ្យអុំទូកនៅក្នុងខេត្តអោយបានអធិកអធ័ម ស្របពេលដែលវេទិការដ៏ស្រស់ស្អាតជិតរួចរាល់ជាស្ថាពរផង ៕

អត្ថបទ៖ សោ និយមរ័ត្ន