ក្រសួងបរិស្ថាន​និងរដ្ឋបាលខេត្តស្ទឹងត្រែង​អភិរក្សធនធានជីវៈចម្រុះ​ និងសត្វព្រៃឱ្យគង់វង្ស

ក្រសួងបរិស្ថាន និងរដ្ឋបាលខេត្តស្ទឹងត្រែង នៅថ្ងៃទី២៤ ខែតុលាឆ្នាំ ២០២២នេះ បានធ្វើការផ្សព្វផ្សាយច្បាប់ពាក់ព័ន្ធនឹងវិស័យបរិស្ថាន និងធនធានធម្មជាតិ ដើម្បីបង្កើនការអភិរក្សនៅក្នុងតំបន់ការពារធនធានធម្មជាតិជីវចម្រុះ ប្រកបដោយចីរភាពនៅព្រះរាជាណាចក្រកម្ពុជា ដោយឡែកនៅខេត្តស្ទឹងត្រែងតែម្ដង។

លោក ផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្ទឹងត្រែងមានប្រសាសន៍ថា នេះជាការបញ្ជ្រាបការយល់ដឹង និងពង្រឹងសមត្ថភាពមន្ត្រីអនុវត្តច្បាប់ និងអាជ្ញាធរដែនដីពាក់ព័ន្ធដើម្បីលើកកម្ពស់បន្ថែមក្នុងការចូលរួមសហការនិងការពារតំបន់ការពារធនធានធម្មជាតិស្របតាមច្បាប់និងលិខិតបទដ្ខានគតិយុត្តដែលពាក់ព័ន្ធ។

លោករដ្ឋលេខាធិការមានប្រសាសន៍បន្ថែមថា៖ នៅភូមិសាស្រ្តខេត្តស្ទឹងត្រែងសំបូរទៅដោយតំបន់ធម្មជាតិច្រើនកន្លែងដូចជាវ៉ើនសៃសៀមប៉ាង ដែនជំរកសត្វព្រៃសៀមប៉ាង ដែនជម្រកសត្វព្រៃ ព្រៃឡង់ តំបន់រ៉ាមសារ និងតំបន់ភ្នំក្រឡាពុះ នៅស្រុកសេសានបន្ថែមទៀតដែលសំបូរទៅដោយសត្វព្រៃរស់នៅភ្នំក្រឡាពុះនេះមានភូមិសាស្រ្តជាប់នឹងទឹកដីស្រុកសៀមប៉ាង នឹងស្រុកសេសានហើយក៏មានភូមិសាស្រ្តពាក់ព័ន្ធទៅនឹងទន្លេសេសានភូមិសាស្រ្តឡាវ ទីកន្លែងមួយដែលយើងត្រូវតែអភិរក្ស យើងដាក់ចូលក្នុងតំបន់ការពារនិងអភិរក្សធនធានធម្មជាតិជីវចំរុះ ពិសេសយើងការពារព្រៃពីព្រោះព្រៃនេះហើយវាជាប្រភពទឹក។

លោក ចៅ មុន្នីរ៉ា អភិបាលរងខេត្តស្ទឹងត្រែងបានបញ្ជាក់ថា៖ រដ្ឋបានខេត្តបាន និងកំពុងយកចិត្តទុកដាក់ខ្ពស់បំផុតក្នុងការងារគ្រប់គ្រងបរិស្ថានការគាំទ្រដល់សហគមន៍មូលដ្ឋានក្នុងតំបន់ការពារធម្មជាតិចំនួន៦កន្លែងលើផ្ទៃដីសរុបចំនួនជាង៨០៤,៩២១ហិកតា។

លោកសុវណ្ណពិសេដ្ឋអភិបាលស្រុកសេសានបានចាត់ទុកថា៖ ធនធានទាំងនេះពិតជាផ្តល់ផលប្រយោជន៍សម្រាប់សង្គមជាតិយើង ទុកឱ្យមនុស្សជំនាន់ក្រោយបានឃើញនិងអាស្រ័យផលដូចនេះកិច្ចការអភិរក្ស យើងត្រូវចូលរួមទាំងអស់គ្នា សំណូមពរដល់បងប្អូនប្រជាពលរដ្ឋសាធារណជនទាំងអស់មេត្តាចូលរួមចំណែកជាមួយគណបញ្ជាការឯកភាពស្រុក ជាមួយនឹងសហគមន៍ជាមួយ និងមន្ទីរជំនាញនៃការការពារ ព្រៃក្រឡាពស់នេះឲ្យបានលទ្ធផលល្អ។

សូមបញ្ចាក់ថា៖ ដើម្បីឱ្យសម្រេចគោលបំណងនេះក្រសួងបរិស្ថានបានដាក់ចេញនៅយុទ្ធសាស្ត្រក្នុងអនុក្រិតលេខ២៣៤ ចុះថ្ងៃទី២១ខែធ្នូ២០២១រួមមាន៖

-កិច្ចការពារនិងអភិរក្សធនធានធម្មជាតិនិងការអនុវត្តច្បាប់

-ការសិក្សាស្រាវជ្រាវនិងការអភិរក្សជីវចំរុះ

-ការអភិវឌ្ឍទេសចរធម្មជាតិនិងវប្បធ៌ម

-និងការចូលរួមអត្ថប្រយោជន៍ឧត្តុង្គឧត្តមរបស់សហគមន៍៕

អត្ថបទ៖ ងិនលីម