ម្ចាស់រោងម៉ាស៊ីនកិនស្រូវ សហការនឹងសហគមន៍កសិកម្មចំនួន៣​ផលិតផ្គត់ផ្គង់ស្រូវចំណីសើម

ព្រៃវែង៖ មន្ទីរកសិកម្ម រុក្ខាប្រមាញ់ និងនេសាទ បានរៀបចំពិធីចុះហត្ថលេខា ផលិតកម្មកសិកម្មតាមកិច្ចសន្យា ស្ដីពីការធ្វើផលិតកម្ម និងផ្គត់ផ្គង់ស្រូវចំណីសើម រវាងរោងម៉ាស៊ីនកិនស្រូវ ឈិត ប៊ុនថន និងសហគមន៍​កសិកម្មក្នុងខេត្តព្រៃវែង នៅរសៀលថ្ងៃទី ៣ ខែវិច្ឆិកា ឆ្នាំ២០២២។

លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទ បានលើកឡើងថា ខេត្តព្រៃវែងស្ថិត​នៅតំបន់វាលទំនាបទន្លេមេគង្គ ដែលមានផ្ទៃដីដាំដុះសរុប ៣៣៧ ០០០ហិកតា គឺជាខេត្តដែលមាន​សក្តានុពលផលិតកម្មដំណាំស្រូវ ហើយក៏ជាខេត្តផលិតស្រូវបានច្រើនជាងបណ្តាខេត្តនានា​នៅក្នុងព្រះរាជា​ណាចក្រកម្ពុជាផងដែរ ដោយក្នុង១ឆ្នាំៗផលិតបានបរិមាណផលស្រូវ១,៦លានតោន ហើយបរិមាណស្រូវនៅសល់​សម្រាប់នាំចេញជាង១លានតោនក្នុង១ឆ្នាំ។

លោក ប្រធានមន្ទីរ បន្តថា យោងតាមប្រសាសន៍រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចំពោះការ​អនុវត្តផលិតកម្មកសិកម្មតាមកិច្ចសន្យានេះ គឺជាយន្តការផ្សារភ្ជាប់រវាងអ្នកផលិត ជាមួយអ្នកទិញ ក្នុងគោល​បំណងធានានូវនិរន្តរភាពនៃការផលិត ដោយផ្អែកលើ គោលការណ៍ឈ្នះទាំងសងខាង ហើយទទួលបាន​ប្រយោជន៍ទាំងអស់គ្នា គឺអ្នកផលិតមានទីផ្សារសម្រាប់លក់ច្បាស់លាស់ និងអ្នកទិញមានផលិតផលសម្រាប់ការកែច្នៃ  ដើម្បីនាំចេញទៅកាន់ទីផ្សារ។

សហគមន៍កសិកម្មចំនួន៣ គឺសហគមន៍កសិកម្មបូព៌ាសែនជ័យ សហគមន៍ពោធិលាស់សែនជ័យ និងសហគមន៍​បាភ្នំមានជ័យ បានចុះកិច្ចសន្យាជាមួយរោងម៉ាស៊ីនកិនស្រូវ ឈិត ប៊ុនថន  ក្នុងការផ្គត់ផ្គង់​ស្រូវចំណីសើម​មានចំនួន០៤កិច្ចសន្យា ក្នុងនោះផ្គត់ផ្គត់ស្រូវចំណីពូជសែនក្រអូបចំនួន០២កិច្ចសន្យា ដែលមានបរិមាណ​ស្រូវចំនួន៨០០តោន និងផ្គត់ផ្គត់ស្រូវចំណីពូជOM5451 ចំនួន០២កិច្ចសន្យា ដែលមាន​បរិមាណស្រូវចំនួន ១ ៨០០ តោន។

ដោយមានការសម្របសម្រួល និងទំនុកចិត្តគ្នា ម្ចាស់រោងម៉ាស៊ីនកិនស្រូវ ឈិត ប៊ុនថន បានយល់ព្រមផ្ដល់ទុន​កម្ចីជាធាតុចូល​កសិកម្មមានគ្រាប់ពូជស្រូវ និងជីគីមី ទៅឲ្យសហគមន៍ប្រើប្រើប្រាស់មុន ដែលមានគ្រាប់ពូជស្រូវសែន​ក្រអូបចំនួន៤០តោន គ្រាប់ពូជស្រូវOM 5451 ចំនួន៨៥តោន ជីអ៊ុយរ៉េ១ ៣៥២បាវ និងជីអិនប៉េកា ចំនួន២ ៧០៤បាវ ហើយទុនទាំងអស់នេះនឹងសងវិញនៅពេលប្រមូលផលស្រូវ៕ អត្ថបទ៖​ សៅគ្រី