សិស្ស​សាលាភូមិន្ទរដ្ឋបាល ចុះអនុវត្តការងារ​​ជួយដល់សង្គម​

លោក យក់ ប៊ុនណា រដ្ឋលេខាធិការប្រចាំការនិងជានាយកសាលាភូមិន្ទរដ្ឋបាលនៃក្រសួងមុខងារសាធារណៈ នាព្រឹកថ្ងៃទី២៩ ខែវិច្ឆិកា ឆ្នាំ២០២២ បានដឹកនាំ​កម្មសិក្សាការីវគ្គវិក្រិតកាមធ្យមឆ្នាំ២០២២ ថ្នាក់លង្វែកនៃសាលាភូមិន្ទរដ្ឋបាល អនុវត្តការងារសង្គមក្រោមប្រធានបទ “ក្តីសង្ឃឹមរបស់កុមារក្នុងការ អភិវឌ្ឍសហគមន៍បៃតង” នៅសាលាបឋមសិក្សាកាកុត ស្ថិតក្នុងភូមិកាកុត ឃុំសំបុក ស្រុកចិត្របុរី ខេត្តក្រចេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីនេះ​ក៏​មានការចូលរួមពីលោក យិន វណ្ណៈ អភិបាលស្រុកចិត្របុរី និកម្មសិក្សាការីវគ្គវិក្រិតកាមធ្យមឆ្នាំ២០២២ ថ្នាក់លង្វែក រួមទាំងលោកគ្រូ អ្នកគ្រូ ក្មួយៗសិស្សានុសិស្សនិងប្រជាពលរដ្ឋជាង ៣០០នាក់។

លោក យក់ ប៊ុណ្ណា មានប្រសាសន៍ថា តាមរយៈសកម្មភាពការងារសង្គមនេះគឺជាការផ្សារភ្ជាប់រវាងកម្មសិក្សាការីវគ្គវិក្រិតកា​មធ្យម ឆ្នាំ២០២២ ថ្នាក់លង្វែក នៃសាលាភូមិនិន្ទរដ្ឋបាល និងបងប្អូនប្រជាពលរដ្ឋនៅមូលដ្ឋាន និងជាការចូលរួមចំណែកជាមួយរាជរដ្ឋាភិបាលក្នុងការ កាត់បន្ថយភាពក្រីក្រ ក៏ដូចជាចូលរួមចំណែកក្នុងការអភិវឌ្ឍន៍នៅក្នុងសហគមន៍ទាំងមូលឲ្យកាន់តែរីកចម្រើន។

ជាក់ស្ដែងកម្មសិក្សាការីវគ្គវិក្រិត្យការមធ្យមឆ្នាំ២០២២ ថ្នាក់លង្វែកនៃសាលាភូមិនិន្ទរដ្ឋបាល បាននាំយកអំណោយ​ចែកជូនសិស្សានុសិស្សសរុបចំនួន ២៣៤នាក់។ ចាស់ជរាសរុប ២០នាក់ ក្នុងម្នាក់ៗទទួលបានមុង ភួយ និងក្រម៉ា ក្រណាត់ស សារ៉ុង ១ឈុត និងថវិកា ២០,០០០រៀល។ លោកគ្រូ អ្នកគ្រូ ១២នាក់ ក្នុងម្នាក់ៗ ៣០,០០០រៀល។ ផ្តល់ថវិកាទ្រទ្រង់សាលាចំនួន ៤លានរៀល អំពូលសូឡាសរុបចំនួន ២០បង្គោល ធុងសំរាមចំនួន១០ និងដើមឬស្សីផ្អែម ១៥០​ដើម ជូនដល់សាលាបឋមសិក្សាកាំពីនិងសាលាបឋមសិក្សាកាកុត។

ក្នុងឱកាសនៃពិធីចែកអំណោយនេះដែរ លោកជំទាវ ឧកញ៉ា នឹម វណ្ណៈ និងស្វាមី បានផ្តល់ជូនបន្ថែមដល់សិស្សា​នុសិស្សក្រីក្រ ៤៨នាក់ ក្នុងម្នាក់ ៦ម៉ឺនរៀល និងគ្រួសារក្រីក្រចំនួន ១២គ្រួសារ ក្នុង ១គ្រួសារ ទទួលបានថវិកា ៣០​ម៉ឺនរៀលផងដែរ៕