ក្រុមគ្រូពេទ្យស្ម័គ្រចិត្តសមាគមបេសកកម្មមនុស្សធម៌ប្រទេសបារាំងនៅកម្ពុជា ចុះព្យាបាលជំងឺជូនពលរដ្ឋនៅស្រុកកំពង់ស្វាយ

ក្រុមគ្រូពេទ្យស្ម័គ្រចិត្ត នៃសមាគមបេសកកម្មមនុស្សធម៌របស់ប្រទេសបារាំងនៅកម្ពុជា សហការជាមួយក្រុមគ្រូពេទ្យកម្ពុជា ចុះព្យាបាលជំងឺដល់ប្រជាពលរដ្ឋដែលរស់នៅក្នុងឃុំសានគរ ស្រុកកំពង់ស្វាយ ចំនួន២ថ្ងៃ ចាប់ពីថ្ងៃទី៦-៧ ខែធ្នូ ឆ្នាំ២០២២។

នៅថ្ងៃទី៦ ខែធ្នូ ឆ្នាំ២០២២ លោកជំទាវ ឃួន ឃុនឌី ប្រធានក្រុមការងារចុះមូលដ្ឋានគណៈបក្សប្រជាជនកម្ពុជា ស្រុកកំពង់ស្វាយ បានដឹកនាំក្រុមគ្រូពេទ្យស្ម័គ្រចិត្តមកពីប្រទេសបារាំង សហការជាមួយគ្រូពេទ្យកម្ពុជា សរុបចំនួន១៦ ចុះព្យាបាលជំងឺ ជូនប្រជាពលរដ្ឋនៅឃុំសានគរ ស្រុកកំពង់ស្វាយ ខេត្តកំពង់ធំ។ ទន្ទឹមជាមួយគ្នានេះដែរ លោកជំទាវ បញ្ជាក់ថា សកម្មភាពនេះ គឺជាកិច្ចការងាររួមគ្នាជាមួយអាជ្ញាធរ និងរាជរដ្ឋាភិបាលកម្ពុជា ដែលបាននឹងកំពុងតែយកចិត្តទុកដាក់យ៉ាងខ្លាំងចំពោះ សុខុមាលភាពរបស់ប្រជាពលរដ្ឋនៅមូលដ្ឋានក្នុងការជួយសម្រួលនូវបន្ទុកសេវាចំណាយរបស់ពួកគាត់បានមួយកម្រិត ដោយក្រុមគ្រូពេទ្យស្ម័គ្រចិត្ត នៃសមាគមបេសកកម្មមនុស្សធម៌របស់ប្រទេសបារាំងនៅកម្ពុជា សរុបចំនួន១៦នាក់ ក្នុងនោះបុគ្គលិកខ្មែរចំនួន០៦នាក់ ចុះទៅពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃ ដែលមានរយៈពេល០២ថ្ងៃ ចាប់ពីថ្ងៃទី៦-៧ ខែធ្នូ ឆ្នាំ២០២២ ដល់ប្រជាពលរដ្ឋនៅក្នុងឃុំសានគរ ស្រុកកំពង់ស្វាយ។ លោកជំទាវបន្ថែមថា សកម្មភាពនេះ ក៏ជាសកម្មភាពមួយស្របតាមគោលនយោបាយ របស់រាជរដ្ឋាភិបាល ក្នុងកិច្ចការពារសុខភាពសមាលភាព សាធារណៈផងដែរ។

លោកជំទាវបានថ្លែងអំណរគុណក្រុមគ្រូពេទ្យដែលបានលះបង់ពេលវេលានិងថវិការផ្ទាល់ដើម្បីចុះមកពិនិត្យព្យាបាលជំងឺជូនលោកយាយ លោកតា ស្តែងចេញពីសេចក្តីស្រឡាញ់បងប្អូនប្រជាពលរដ្ឋ ពោលគឺការព្យាបាលមិនប្រកាន់បក្សពួក សាសនា និន្នាការនយោបាយណាមួយឡើយ។ ប៉ន្តែសំដៅចូលរួមកាត់ បន្ថយភាពក្រីក្ររបស់ប្រជាពលរដ្ឋ និងបង្កើនភាពសុខដុមរមនា ក្នុងសហគមន៍តាមរយៈការផ្ដល់សេវា សុខភាពសាធារណៈដោយឥតគិតថ្លៃព្រោះថាបញ្ហាសុខភាពគឺជាមូលដ្ឋានគ្រឹះដើម្បីឆ្ពោះទៅរកភាពជោគជ័យ សុភមង្គល ជូនគ្រួសារ និងការអភិវឌ្ឍសង្គមជាតិ៕

អត្ថបទ៖ ឈាង មករា