រដ្ឋមន្រ្តីក្រសួងវប្បធម៌ ផ្ដល់អនុសាសន៍ដល់មន្ត្រីចេញពីសាលាភូមិន្ទរដ្ឋបាល មុនចូលបម្រើការងារ

លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ នៅថ្ងៃទី២ ខែកុម្ភៈ ឆ្នាំ២០២៣នេះ បានអនុញ្ញាត មន្ត្រីរាជការ ៩ នាក់ ដែលត្រូវបានថ្នាក់ដឹកនាំក្រសួងផ្តល់ឱកាសឱ្យទៅវគ្គបណ្តុះបណ្តាល នៅសាលាភូមិន្ទរដ្ឋបាល ឆ្នាំ២០២២ ចូលជួបសម្តែងការគួរសម រាយការណ៍ពីលទ្ធផលសិក្សា និងទទួលអនុសាសន៍មុនពេលចូលបម្រើនៅតាមអង្គភាពដើមរបស់ខ្លួនវិញ។

មន្ត្រីកម្មសិក្សាការីទាំង ៩ នាក់ ដែលទទួលបានការបណ្តុះបណ្តាលគឺ វគ្គវិក្រឹតការមន្ត្រីជាន់ខ្ពស់មានចំនួន ៤ នាក់, វគ្គវិក្រឹតការមន្ត្រីគ្រប់គ្រងរដ្ឋបាលមានចំនួន ១ នាក់ និងវគ្គវិក្រឹតការមន្រ្តីមធ្យមមានចំនួន ៤ នាក់ ស្រី ៣ នាក់។

លោកស្រីបណ្ឌិតសភាចារ្យរដ្ឋមន្ត្រី បានសម្តែងនូវការអបអរសាទរចំពោះលទ្ធផលជាផ្លែផ្កា ដែលកម្មសិក្សាការី បានទទួលជ័យលាភីទាំង ៩ រូប និងផ្តល់អនុសាសន៍ដូចខាងក្រោម៖

១. ត្រូវបន្តការរៀនសូត្រពេញមួយជីវិត ការអាន ការស្រាវជ្រាវ ការអនុវត្តការងារ ដើម្បីស្វែងរកបទពិសោធន៍ ជួយជំរុញការអនុវត្តការងារជូនអង្គភាពកាន់តែប្រសើរឡើងប្រកបដោយគុណាធិបតេយ្យនិងនវានុវត្តន៍

២. មានវិន័យ និងចេះគ្រប់គ្រងពេលវេលា ក្នុងការអនុវត្តការងារ

៣. ត្រូវចេះបង្កើតទស្សនាទានផ្ទាល់ខ្លួនក្នុងការអភិវឌ្ឍចំណេះ ជំនាញ និងការវិឌ្ឍខ្លួនទៅតាមបដិវត្តឧស្សាហកម្ម ៤.០៕

តំណាងមន្ត្រីរាជការទាំង ៩ រូប បានលើកឡើងថា ក្នុងអំឡុងពេលសិក្សាក្នុងរយៈពេល ៩ ខែនេះ គឺម្នាក់ៗបានព្យាយាមសិក្សាដោយយកចិត្តទុកដាក់ទទួលយកគំនិត និងចំណេះដឹងថ្មីៗគ្រប់មុខវិជ្ជា និងការផ្លាស់ប្តូរនូវបទពិសោធន៍ទៅវិញទៅមកជាមួយកម្មសិក្សាការីមកពីក្រសួង-ស្ថាប័នផ្សេងៗ នាំឱ្យការសិក្សាទទួលបានលទ្ធផលជាវិជ្ជមាន។

បំណងសូមចូលគោរពសម្តែងការគួរសមចំពោះ លោកស្រីបណ្ឌិតសភាចារ្យ គឺដើម្បីធ្វើសេចក្តីរាយការណ៍ជូនអំពីលទ្ធផល នៃការសិក្សា និងសុំអនុសាសន៍ដ៏ល្អៗពីលោកស្រីបណ្ឌិតសភាចារ្យ ដើម្បីជាមូលដ្ឋានក្នុងការពង្រឹងគោលជំហរ និងអភិវឌ្ឍន៍ការងារឱ្យកាន់តែមានប្រសិទ្ធភាព។

គួរបញ្ជាក់ថា កម្មវីធីសិក្សាវគ្គវិក្រឹតការមន្រ្តីជាន់ខ្ពស់ វគ្គវិក្រឹតការមន្រ្តីគ្រប់គ្រងរដ្ឋបាល និងវគ្គវិក្រឹតការមន្រ្តីមធ្យម ឆ្នាំ២០២២ មានរយៈពេល ៩ខែ គិតចាប់ពីថ្ងៃទី២ ខែឧសភា ឆ្នាំ២០២២ ដល់ថ្ងៃទី១៣ ខែមករា ឆ្នាំ២០២៣៕