ព័ត៌មានជាតិ

មន្រ្តីបន្តពិនិត្យ សេចក្ដីព្រាងច្បាប់ស្ដីពីអន្ដោប្រវេសន៍ថ្មី

បានផុស

៥ years មុន

នៅ

ថ្ងៃអង្គារ ១២ មករា ២០២១

ដោយ

ក្រសួងមហាផ្ទៃ រៀបចំកិច្ចប្រជុំអន្ដរក្រសួង បន្តពិនិត្យ និងពិភាក្សាលើសេចក្ដីព្រាងច្បាប់ ស្ដីពីអន្ដោប្រវេសន៍ថ្មី នៃព្រះរាជាណាចក្រកម្ពុជា ក្រោមអធិបតីភាពលោក ប៊ុន ហុន រដ្ឋលេខាធិការក្រសួងមហាផ្ទៃ និងជាប្រធានក្រុមបច្ចេកទេសអន្ដរក្រសួងរៀបចំតាក់តែងសេចក្ដីព្រាងច្បាប់ស្ដីពីអន្ដោប្រវេសន៍ថ្មី ។

ថ្លែងនៅក្នុងកិច្ចប្រជុំនារសៀលថ្ងៃទី១២ ខែមករា ឆ្នាំ២០២១ នៅទីស្ដីការក្រសួងមហាផ្ទៃ លោក ប៊ុន ហុន បានលើកឡើងថា កិច្ចប្រជុំនាពេលនេះ បានបន្តពិនិត្យ និងពិភាក្សាលើសេចក្ដីព្រាងច្បាប់ស្ដីពីអន្ដោប្រវេសន៍ថ្មី នៃព្រះរាជាណាចក្រកម្ពុជា នៅលើមាត្រា១២ នៃជំពូកទី០៣ជាបន្តទៀត ដោយកាលពីកិច្ចប្រជុំកាលពីថ្ងៃទី២៤ ខែវិច្ឆិកា ឆ្នាំ២០២០កន្លងទៅ អង្គប្រជុំបានពិនិត្យ និងពិភាក្សាដល់មាត្រា១១ នៃជំពូកទី៣ ខណៈសេចក្ដីព្រាងច្បាប់ស្ដីពី អន្ដោប្រវេសន៍ថ្មីនេះ មានចំនួន៩ជំពូក ចែកចេញជា៥០មាត្រា។

មុនពេលក្រសួងមហាផ្ទៃ រៀបចំកិច្ចប្រជុំអន្ដរក្រសួងពិនិត្យ និងពិភាក្សាលើសេចក្ដីព្រាងច្បាប់ ស្ដីពីអន្ដោប្រវេសន៍ថ្មីនៃព្រះរាជាណាចក្រកម្ពុជា ក្រសួងមហាផ្ទៃ បានប្រជុំផ្ទៃក្នុងជាច្រើនលើកទើបឈានបើកកិច្ចប្រជុំអន្ដរក្រសួង នាថ្ងៃនេះ ខណៈកិច្ចប្រជុំនាពេលនេះគឺជាកិច្ចប្រជុំអន្ដរក្រសួង លើកទី៥ ហើយពិភាក្សាលើជំពូកទី៣។

គួរបញ្ជាក់ថា សេចក្ដីព្រាងច្បាប់ស្ដីពីអន្ដោប្រវេសន៍ថ្មី នៃព្រះរាជាណាចក្រកម្ពុជា មានគោលបំណងគ្រប់គ្រងជនបរទេសគ្រប់រូប នៅក្នុងព្រះរាជាណាចក្រកម្ពុជា ដោយកំណត់អំពីវិធាន និងលក្ខខណ្ឌសម្រាប់អនុវត្តចំពោះជនបរទេសដែលចូល ចេញ ឆ្លងកាត់ និងស្នាក់នៅក្នុងព្រះរាជាណាចក្រកម្ពុជា។

ច្បាប់នេះ ត្រូវអនុវត្តចំពោះជនបរទេសគ្រប់រូបដែល ចូល ចេញ ឆ្លងកាត់ និងស្នាក់នៅ ក្នុងព្រះរាជាណាចក្រកម្ពុជា លើកលែងតែក្នុងករណីដែលត្រូវអនុវត្តតាមវិធាន នៃច្បាប់អន្ដរជាតិដែលព្រះរាជាណាចក្រកម្ពុជា ជាភាគីហត្ថលេខីទោះបីជាជននោះ បានចូលមកតាំងលំនៅមុនពេលដែលលច្បាប់នេះ ចូលជាធរមានហើយក៏ដោយ៕

អត្ថបទ ៖ សំអឿន

Related Topics:កិច្ចប្រជុំ