បុរសប្រើធម៌ចម្លែក៧ភាសា បន្តសកម្មភាពរបស់ខ្លួន និងបដិសេធ​ការព្រមាន

លោក វ៉ាត វុធ ជាអ្នកស្នងរូបបារមី ល្បីសូត្រធម៌ បាលី ជាភាសាចម្លែក កំពុងបន្តនូវសកម្មភាពរបស់ខ្លួនជាប្រចាំថ្ងៃ ដើម្បីជម្នះនូវការចុះផ្សាយមួយចំនួនថា ខ្លួនរងការព្រមាន និងគំរាមកំហែ​ង។

តាមរយៈកិច្ចសម្ភាសមួយ កាលពីសប្ដាហ៍កន្លងទៅ ដែលបង្ហោះក្នុងបណ្ដាញសង្គមឈ្មោះ បារមីលោកតា ឥសីសំរិទ្ធ អ្នកស្នងរូប ដែលមានអាយុ៤៣ឆ្នាំរូបនេះ អះអាងថា ខ្លួនចេះធម៌ បាលី ៧ភាសា ហើយសកម្មភាពរបស់ខ្លួន គឺពុំខុសច្បាប់ឡើយ ហើយក៏ពុំមាននរណាម្នាក់បានប្ដឹងខ្លួននោះដែរ តែលោកបញ្ចាក់ថា រូបលោកមិនមែនជាគ្រូមន្តអាគមនោះទេ ប៉ុន្តែជាអ្នកស្នងរូបបារមី ដែលប្រើធម៌ចម្លែក​ ដោយមិនមាននរណាស្ដាប់យល់ ហើយតែងតែជួយដល់ពលរដ្ឋជាច្រើនឱ្យជាពីជំងឺ និងមិនមានទាមទារប្រាក់នោះទេ។

គួរកត់សម្គាល់ថា បុរសតាំងខ្លួនជាគ្រូស្នងរូបដែលអះអាងថា ចេះធម៌ បាលី ជាភាសាបរទេស រហូតដល់៧​ភា​សា កំពុងទទួលការចាប់អារម្មណ៍យ៉ាងខ្លាំង នៅលើបណ្ដាញសង្គម ដោយមានទាំងការរិៈគន់ និងការសរសើរ ខណៈមន្ត្រីពាក់ព័ន្ធមួយចំនួន ក៏កំពុងទទួលរងនូវការរិះគន់ដែរ។

បុរសតាំងខ្លួនជាគ្រូសូត្រ ចេះធម៌ បាលី ជាភាសាបរទេស ធ្លាប់បាននិយាយថា ធម៌ដែលខ្លួនសូត្រ គឺជាធម៌ ដែលមានអាយុកាលរាប់ពាន់ឆ្នាំមកម៉្លេះ ហើយពុំមាននរណាចេះ និងស្ដាប់បានឡើយ ។

លោក សេង សុមុនី អ្នកនាំពាក្យ ក្រសួងធម្មការ និងសាសនា ធ្លាប់បានប្រាប់ កម្ពុជាថ្មី យ៉ាងខ្លីថា ក្រសួងបាន ពិនិត្យរួចហើយ លើករណីបុរសតាំងខ្លួនជាគ្រូសូត្រ ចេះធម៌ បាលី ជាភាសាបរទេសនេះ៕