រាជរដ្ឋាភិបាលកម្ពុជាបានសម្រេចសម្បទានដីជាង ១ ពាន់ហិកតា (១ ២៦៥) ជូនដល់​កងទ័ព ​និងនគរបាលជាតិ​ឈរជើង​តាមបណ្ដោយ​ព្រំដែនកម្ពុជាវៀតណាម។

លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងប្រធានគណៈកម្មាធិការសម្បទានសង្គមកិច្ចថ្នាក់ជាតិ ព្រមទាំងគណៈប្រតិភូអន្តរក្រសួង នៅថ្ងៃទី ២៦ ខែកុម្ភៈ ឆ្នាំ ២០២៣ បានអញ្ជើញចុះពិនិត្យមើលការអនុវត្តកម្មវិធីសម្បទានដីសង្គមកិច្ចជូនកងទ័ព និងនគរបាលជាតិឈរជើងតាមបណ្ដោយព្រំដែនកម្ពុជាវៀតណាម ក្នុងភូមិសាស្ត្រខេត្តត្បូងឃ្មុំ ស្របតាមសេចក្ដីសម្រេចរបស់រាជរដ្ឋាភិបាលកម្ពុជា។

សេចក្តីជូនដំណឹងរបស់ទីស្តីការគណៈរដ្ឋមន្ត្រីលេខ: ១៩៥ ស.ជ.ណ.ដប បានឱ្យដឹងថា រាជរដ្ឋាភិបាលបានសម្រេចប្រគល់ដីដែលកម្ពុជាទទួលបានបន្ទាប់ពីការបោះបង្គោលនិងខណ្ឌសីមាព្រំដែនស្ថិតក្នុងភូមិសាស្ត្រខេត្តត្បូងឃ្មុំ និងខេត្តស្វាយរៀងទំហំសរុប ១ ២៦៥ ហិកតា ៩ អា ក្នុងនោះផ្ទៃដីទំហំ ៦១១ ហិកតា ៨២ អា ស្ថិតនៅខេត្តត្បូងឃ្មុំនិងផ្ទៃដីទំហំ ៦៥៣ ហិកតា ២៧ អា ស្ថិតនៅខេត្តស្វាយរៀងដែលបច្ចុប្បន្នស្ថិតក្រោមការគ្រប់គ្រងរបស់អាជ្ញាធរជាតិទទួលបន្ទុកកិច្ចការព្រំដែន ជូនគណៈកម្មាធិការសម្បទានដីសង្គមកិច្ចថ្នាក់ជាតិសម្រាប់អនុវត្តកម្មវិធីសម្បទានដីសង្គមកិច្ចជូនកងទ័ពនិងនគរបាលជាតិឈរជើងតាមព្រំដែនកម្ពុជាវៀតណាម អតីតកងកម្លាំងប្រដាប់​អាវុធនិង​គ្រួសារ និងប្រជាពលរដ្ឋក្រីក្រស៊ីវិលទូទៅ។

ទីតាំងដែលលោករដ្ឋមន្ត្រីមកជួប​ជុំគ្នានាពេលនេះគឺនៅចន្លោះបង្គោលលេខ ១១៦ និង១១៧ ដោយនៅក្នុងគោលដៅទី១ នេះយើងបែងចែកបាន ៩៧ ឡូតិ៍ ក្នុង១ឡូតិ៍ទំហំ 30m x 40m ស្ថិតក្នុងភូមិត្រពាំងផ្លុងទី១ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ, ទី២ រៀបចំនៅចន្លោះបង្គោលលេខ 105/6 និងបង្គោលលេខ 103/2 ចំនួន ២១៦ ឡូតិ៍ ក្នុង១ឡូតិ៍ទំហំ 30m x 40m ស្ថិតក្នុងភូមិព្រៃ ឃុំទ្រៀក ស្រុកមេមត់ ខេត្តត្បូងឃ្មុំ, ទី៣ នៅចន្លោះ​បង្គោល​លេខ 104/4 និងបង្គោលលេខ 103/2 យើងរៀបចំបាន ៥៦ឡូតិ៍ ក្នុង១ឡូតិ៍ទំហំ 30m x 40m និងគោលដៅទី៤ នៅចន្លោះបង្គោលលេខ 98/1 និងបង្គោលលេខ 95/1 ចំនួន ២៥០ឡូតិ៍ ក្នុង១ឡូតិ៍ទំហំ 30m x 40m ស្ថិតក្នុងភូមិចន្ទមូល ឃុំចន្ទមូល ស្រុកមេមត់ ខេត្តត្បូងឃ្មុំ។

លោកឧបនាយករដ្ឋមន្រ្តី ជា សុផារ៉ា បានសំណូមពរឱ្យមន្ទីររៀប​ចំដែនដី នគរូបនីយកម្ម សំណង់និងសុរិយោដីខេត្តត្បូងឃ្មុំត្រូវរៀបចំប្លង់គោលសំរាប់​បែងចែកដីធ្លី​នៅក្នុងតំបន់គោលដៅទាំង៤នៅក្នុងខេត្តត្បូងឃ្មុំ ក្នុងភារកិច្ចរៀបចំបែងចែកដីឡូតិ៍សរុប ៦១៩។

លោកឧបនាយករដ្ឋមន្រ្តីបានបន្តថា ក្នុងការរៀបចំបែងចែកដីឡូតិ៍នេះយើងបានបែងចែកដីឡូតិ៍សំរាប់ដីសាលារៀន មណ្ឌលសុខភាព ផ្សារ ដីវត្ត ស្នាក់ការភូមិ រៀបចំដីសាលាខេត្តសំរាប់ច្រកចេញចូលតែមួយ រៀបចំប៉ុស្តិ៍ការពារព្រំដែន ដីសាខាវរះការពារព្រំដែននិងប៉ុស្តិ៍ រៀបចំដីបម្រុងទុកសំរាប់ការងារផ្សេងៗ និងទុកសម្រាប់សមាគមនារី ដីសំរាប់ទុកជាត្រពាំង ដីរួមសំរាប់សហគមន៍ ហើយដីទាំងនេះត្រូវរក្សាទុកតាមគោលការណ៍នេះហើយបើពាក់ព័ន្ធជាមួយស្ថាប័នណាមួយនោះគឺត្រូវធ្វើកម្មសិទ្ធជាលក្ខណៈឯកត្តជនជានីតិបុគ្គលឈរឈ្មោះតំណាងឱ្យរដ្ឋ រីឯមន្ទីរអភិវឌ្ឍជនបទខេត្តត្បូងឃ្មុំត្រូវមានភារកិច្ចរៀបចំស្ថាបនាផ្លូវក្រាលគ្រួសក្រហម រៀបចំឱ្យមានទឹកស្អាតដូចជាការជីកអណ្តូង និងរៀបចំបង្គន់អនាម័យជូនដល់ប្រជាពលរដ្ឋសហគមន៍ ដោយឡែកមន្ទីរបរិស្ថានត្រូវរៀបចំការដាំដើមឈើក្នុងទំហំដីឡូតិ៍ រឺទីតាំងដែលនៅសេសសល់ជាដីសហគមន៍សាធារណះនោះត្រូវរៀបចំដាំដើមឈើអោយទៅជាព្រៃសហគមន៍សំរាប់ការជ្រកនៅជួបជុំគ្នារបស់ប្រជាពលរដ្ឋអោយស្របទៅនឹងបំរែបំរួលអាកាសធាតុ។

លោកឧបនាយករដ្ឋមន្រ្តី ជា សុផារ៉ាបានស្នើឱ្យក្រសួងមន្ទីរសង្គមកិច្ច ជួយរើសមុខសញ្ញាអតីតយុទ្ធជន កងទ័ពនិងនគរបាលជាតិឈរជើងតាមបណ្តោយព្រំដែនកម្ពុជាវៀតណាម ដើម្បីឱ្យចំគោលដៅក្នុងការអនុវត្តកម្មវិធីសម្បទានដីសង្គមកិច្ចនេះ៕