ព័ត៌មានជាតិ

ពីខេត្តមួយគ្មានកន្លែងសិក្សា ប្រែក្លាយជាខេត្តមានសំណង់អគារសាលារៀនអប់រំរីកដុះដាល

បានផុស

២ years មុន

នៅ

ថ្ងៃចន្ទ ២៧ កុម្ភៈ ២០២៣

ដោយ

លោកស្រី បាន ស្រីមុំ អភិបាល នៃគណៈ អភិបាលខេត្តប៉ៃលិន បានមានប្រសាសន៍ថា បន្ទាប់ពីសមាហរណកម្ម ខេត្តប៉ៃលិន មិនមានសាលារៀនសម្រាប់សិក្សាទេ សូម្បីស្ថានភាពផ្លូវក៏ពិបាកក្នុងការធ្វើដំណើរទៅមក ឬសិស្សអាចសិក្សាបាន តាមរយៈការយកឈើវត្ត ឬផ្ទះស្បូវ មកធ្វើជាទីកន្លែងសម្រាប់ទទួលបានការបណ្ដុះបណ្ដាលក្នុងខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មានដែលរៀបចំដោយអង្គភាពអ្នកនាំពាក្យរាជរដ្ឋាភិបាល លោកស្រី បាន ស្រីមុំ បានរំលឹកថា បន្ទាប់ពីសមាហរណកម្ម ទូទាំងខេត្តប៉ៃលិនគឺមិនមានសាលារៀន ឬសំណង់អគារសិក្សាគ្រប់គ្រាន់ទេ។ ពេលនោះ យកដើមឈើ វត្តអារាម និងផ្ទះស្បូវនានា មកធ្វើជាកន្លែងប្រមូលផ្តុំសម្រាប់បណ្ដុះបណ្ដាលដល់កូនសិស្ស។

ប៉ុន្តែមកដល់ ក្នុងឆ្នាំ១៩៩៨ ក្រោមការយកចិត្តទុកដាក់ពីរាជរដ្ឋាភិបាល ខេត្ត ប៉ៃលិន បានវិវត្តន៍មានសាលារៀនប្រមាណ ៨ សាលា ដែលបានបណ្ដុះបណ្ដាលត្រឹមកម្រិតអនុវិទ្យាល័យ។ សម្រាប់ថ្នាក់វិទ្យាល័យសិស្សត្រូវឡើងបន្តមកសិក្សានៅទីរួមខេត្តបាត់ដំបង។ ជាបន្តបន្ទាប់ ខេត្តក៏បានរៀបចំអនុវត្តតាមស្តង់ដារ រហូតឆ្នាំ២០១៧ ខេត្តប៉ៃលិនមានសាលារៀនសរុបចំនួន ៨៣ សាលា ក្នុងនោះមានមត្តេយ្យសិក្សាចំនួន ២៥ ខ្នង, បឋមសិក្សាចំនួន ៤៩ខ្នង, សាលាអនុវិទ្យាល័យចំនួន ០៧ កន្លែង និងវិទ្យាល័យចំនួន ០២ សាលា ដែលមានសិស្សសរុបទូទាំងខេត្តចំនួន ១៥.៥១៩ នាក់ ស្រី ៧.៥៩៤ នាក់។

ទន្ទឹមនេះ លោកស្រីអភិបាលខេត្តបានបន្តថា គិតត្រឹមរយៈពេល ៥ ឆ្នាំចុងក្រោយ (២០១៧-២០២២) ខេត្តប៉ៃលិន ចាប់ផ្ដើមមានសាលាចាប់ពីកម្រិតមត្តេយ្យសិក្សា រហូតដល់វិទ្យាល័យចំនួន ១១២ ខ្នង ដែលក្នុងនោះមានអគារសិក្សាចំនួន ១៣៨ខ្នង ស្មើ ៧៧២បន្ទប់។

ក្នុងចំណោមនោះ មានអាគារចំនួន ៤៥ ខ្នង ស្មើនឹង ១៦៨ បន្ទប់ ជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

លោកស្រី បាន ស្រីមុំ បានគូសបញ្ជាក់បន្ថែមថា បច្ចុប្បន្ននេះរដ្ឋបាលខេត្ត កំពុងដំណើរការកម្រិតវិទ្យាល័យមួយកន្លែងបន្ថែមទៀត សម្រាប់បម្រើការសិក្សាឱ្យសិស្សដែលស្ថិតនៅ ភូមិស្ទឹងត្រង់ ស្រុកសាលាក្រៅ ខេត្តប៉ៃលិន ដែលពិបាកក្នុងការធ្វើដំណើរមកសិក្សានៅទីរួមស្រុក ដែលមានចម្ងាយឆ្ងាយ។

គួររំលឹកបន្ថែមថា តាមរបាយការណ៍រយៈពេល ៥ឆ្នាំរបស់ខេត្តប៉ៃលិន នាពេលបច្ចុប្បន្នសិស្សទូទាំងខេត្តប៉ៃលិនមានសរុបចំនួន ១៨.០៩៦ នាក់ ស្រី ៩.១២៩ នាក់ (រាប់ទាំងមត្តេយ្យសិក្សា)។ ចំពោះសាលាមួយចំនួនដែលមានសភាពចាស់ទ្រុឌទ្រោមក្នុងខេត្តប៉ៃលិន រដ្ឋបាលខេត្តបាននឹងកំពុងយកចិត្តទុកដាក់កែលំអឱ្យទៅជាសាលាស្របតាមប្រព័ន្ធអប់រំដែលមានស្តង់ដារបច្ចេកទេសត្រឹមត្រូវផងដែរ៕

ដោយ៖ ថារី