លោកស្រី ជា សិរី អគ្គនាយកបច្ចេកទេស និងជាឧបការីអគ្គទេសាភិបាលធនាគារជាតិនៃកម្ពុជា ត្រូវបានអង្គព្រះ មហាក្សត្រត្រាស់បង្គាប់តែងតាំងជាអគ្គទេសាភិបាលរងធនាគារជាតិនៃកម្ពុជាដែលមានឋានៈស្មើរដ្ឋមន្ត្រី។ នេះបើតាមព្រះរាជក្រឹត្យចុះថ្ងៃទី១ ខែមីនា ឆ្នាំ២០២៣ ដែលធនាគារជាតិនៃកម្ពុជាទើបចេញផ្សព្វផ្សាយ នាយប់ថ្ងៃទី១០ ខែមីនានេះ។

លោកស្រី ជា សិរី ជាឥស្សរជនស្ត្រីដ៏ឆ្នើមមួយរូបនៅក្នុងវិស័យធនាគារ តាមរយៈការដឹកនាំ គ្រប់គ្រង និងអនុវត្តការងារបច្ចេកទេសនៅធនាគារជាតិនៃកម្ពុជា។ លោកស្រី ជា សិរី មានបទពិសោធយ៉ាងជោគជាំទៅលើការងារគ្រប់គ្រងប្រព័ន្ធធនាគារនៅកម្ពុជា ជាពិសេសការលើកកម្ពស់រូបិយវត្ថុជាតិ។

ជាកូនស្រីរបស់លោក ជា ចាន់តូ អគ្គទេសាភិបាលធនាគារជាតិនៃកម្ពុជា លោកស្រី ជា សិរី បានចាប់ផ្ដើមបម្រើការ​ងារនៅធនាគារជាតិនៃកម្ពុជា តាំងពីឆ្នាំ១៩៩៩ ហើយក្នុងឆ្នាំ២០០២ ក្រោយបញ្ចប់ការ​សិក្សាថ្នាក់បរិញ្ញាបត្រ លោកស្រីបានបម្រើការងារនៅនាយកដ្ឋានត្រួតពិនិត្យធនាគារ។ ជាបន្តបន្ទាប់ លោកស្រី ជា សិរី ក៏ទទួលបាន​ការតែងតាំងតួនាទីជាអគ្គនាយករងបច្ចេកទេស និងក្រោយមកបាន​ដំឡើងជាអគ្គនាយកបច្ចេកទេស និងជាឧបការី​អគ្គទេសាភិបាលធនាគារជាតិនៃកម្ពុជា។

ជាមួយគ្នានេះ លោកស្រី ជា សិរី ក៏មានប្រវត្តិការសិក្សាមិនធម្មតាផងដែរ ដោយលោកស្រី គឺជាស្រ្តីខ្មែរមួយរូប​ដែលបានទទួលការសិក្សាអប់រំនៅប្រទេសជាច្រើនរហូតបានបញ្ចប់ថ្នាក់បណ្ឌិតសេដ្ឋកិច្ច។ កាលពីកុមារភាព គឺលោកស្រី ជា សិរី បានរៀននៅសាលាបឋមសិក្សាបាក់ទូក រាជធានីភ្នំពេញ។ បន្ទាប់មកនៅឆ្នាំ១៩៨៩ ក្នុងអាយុទើបតែ៨ឆ្នាំ លោកស្រី ត្រូវបានគ្រួសារបញ្ជូនទៅរៀនកម្រិតអនុវិទ្យាល័យនៅប្រទេសបារាំង និងផ្លាស់ទៅរៀនថ្នាក់វិទ្យាល័យ​នៅប្រទេសសិង្ហបុរី។

ក្រោយចប់កម្រិតវិទ្យាល័យ នៅឆ្នាំ១៩៩៩ លោកស្រី ជា សិរី បានបន្តការសិក្សាថ្នាក់ឧត្តមសិក្សានៅសាកលវិទ្យាល័យ Victoria ប្រទេសញូហ្សេឡែន ដោយនៅឆ្នាំ២០០២ បានបញ្ចប់សញ្ញាបត្រថ្នាក់បរិញ្ញាបត្រផ្នែកគណនេយ្យ និងហិរញ្ញវត្ថុ។ នៅឆ្នាំ២០១០ លោកស្រី ជា សិរី បានបញ្ចប់សញ្ញាបត្រអនុបណ្ឌិតផ្នែកធនាគារ ពីសាកលវិទ្យាល័យ SOAS នៃទីក្រុងឡុងដ៍ ចក្រភពអង់គ្លេស និងឆ្នាំ២០១៩ បានបញ្ចប់សញ្ញាបត្រអនុបណ្ឌិតមួយទៀត​នៅសាលាគោល​នយោបាយ លី ក្វាន់យូ។ លុះក្នុងឆ្នាំ២០២១ លោកស្រី ជា សិរី បានបញ្ចប់សញ្ញាបត្របណ្ឌិតសេដ្ឋកិច្ច (PhD) ពីសាកលវិទ្យាល័យ Adelaide ប្រទេសអូស្ត្រាលី។ ទន្ទឹមគ្នានេះ លោកស្រី ជា សិរី ក៏ធ្លាប់បានឆ្លងកាត់នៃការសិក្សា​ជំនាញរយៈពេលខ្លីផងដែរ គឺវិញ្ញាបនបត្រផ្នែកអភិវឌ្ឍន៍ហិរញ្ញវត្ថុ នៃសាកលវិទ្យាល័យ Harvard Kennedy សហរដ្ឋអាមេរិក ក្នុងឆ្នាំ២០០៦ និងវិញ្ញាបនបត្របញ្ជាក់ការសិក្សាផ្នែកពាណិជ្ជកម្ម នៃសាកលវិទ្យាល័យ ស៊ីដនី ប្រទេសអូស្ត្រាលី ក្នុងឆ្នាំ២០០៧៕

ដោយ៖ ធឿន វ៉ាន់សុង