ព័ត៌មានជាតិ

ខ្យល់កន្ត្រាក់ប៉ះពាល់ ៧ ខេត្ត និងបំផ្លាញផ្ទះសម្បែងជាង ៥០០ ខ្នង ក្នុងខែមីនានេះ

បានផុស

៣ years មុន

នៅ

ថ្ងៃអង្គារ ២៨ មីនា ២០២៣

ដោយ

នៅក្នុងខែមីនា ឆ្នាំ ២០២៣ នេះ ខ្យល់កន្ត្រាក់បានកើតឡើងចំនួន ១០ ករណី ប៉ះពាល់ខេត្ត ៧ ខូចខាត និងរលំផ្ទះប្រជាពលរដ្ឋប្រមាណជាង ៥០០ ខ្នង ប៉ុន្តែមិនបណ្ដាលឲ្យមនុស្សរងរបួស និងស្លាប់បាត់បង់ជីវិតទេ។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍កាលពីព្រឹកថ្ងៃទី ២៨ មីនានេះថា ខ្យល់កន្ត្រាក់បានកើតឡើងចំនួន ១០ ករណី ជាបន្តបន្ទាប់ នៅក្នុងខែមីនា ឆ្នាំ ២០២៣ នេះ ជាពិសេសក្នុងសប្ដាហ៍ទី ៤ ដោយសារអាកាសធាតុមានការប្រែប្រួលច្រើន និងបង្កឲ្យមានខ្យល់បក់បោកខ្លាំង និងភ្លៀងកក់ខែនៅភាគពាយ័ព្យ និងតំបន់ឆ្នេរសមុទ្រ។

លោកបានបន្តថា ខ្យល់កន្ត្រាក់នេះបានកើតឡើងនៅក្នុងខេត្តចំនួន ៧ រួមមាន ៖ កោះកុង ព្រះសីហនុ ព្រះវិហារ ក្រចេះ បាត់ដំបង បន្ទាយមានជ័យ និងខេត្តប៉ៃលិន បណ្ដាលឲ្យរងការខូចខាតផ្ទះធ្ងន់ធ្ងរចំនួន ១០ ខ្នង របើកដំបូល និងខូចខាតមធ្យមចំនួន ៥០៧ ខ្នង ជួយសង្គ្រោះអ្នកទេសចរចំនួន ១០ នាក់ នៅសមុទ្រខេត្តព្រះសីហនុ។

យោងតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម បានឲ្យដឹងថា ចាប់ពីថ្ងៃទី ២៩ ខែមីនា ដល់ថ្ងៃទី ៤ ខែមេសា ឆ្នាំ ២០២៣ ព្រះរាជាណាចក្រកម្ពុជា នឹងទទួលឥទ្ធិពលខ្សោយពីជ្រលងសម្ពាធទាប និងខ្យល់ប្រែប្រួល និងជ្រលងសម្ពាធទាបពីប្រទេសចិន ធ្វើឲ្យមានសីតុណ្ហភាពពីប្រភេទ ២៣ ដល់ ៣៧ អង្សា បង្កឲ្យមានភ្លៀងធ្លាក់ដោយអន្លើក្នុងកម្រិតពីខ្សោយទៅមធ្យម អាចមានផ្នែកខ្លះភ្លៀងធ្លាក់ក្នុងបរិមាណបង្គួរលាយឡំទៅដោយផ្គររន្ទះ និងខ្យល់កន្ត្រាក់៕

អត្ថបទ ៖ សំអឿន

Related Topics:ខ្យល់កន្ត្រាក់