មកដឹងការវិនិយោគធំៗជាច្រើនរបស់លោកឧកញ៉ា​ សួរ វីរៈ នៅតំបន់កោះស្តេច

កោះស្តេច គឺជាតំបន់ទេសចរណ៍ដ៏មានសក្តានុពល និងមានភាពទាក់ទាញខ្លាំង បើធៀបនឹងតំបន់កោះផ្សេងៗនៅកម្ពុជា និងប្រទេសជិតខាង ដូចជា ថៃ និងវៀតណាម ជាដើម។ នេះជាការបញ្ជាក់របស់លោកឧកញ៉ា សួរ វីរៈ អគ្គនាយក​ក្រុមហ៊ុនវីរៈប៊ុនថាំ។

ស្ថាបនិកក្រុមហ៊ុនដឹកជញ្ជូនដ៏ធំនៅកម្ពុជា លោកឧកញ៉ា សួរ វីរៈ បានប្រាប់កម្ពុជាថ្មីថា នៅតំបន់កោះស្តេច មានប្រជុំកោះ​​ប្រមាណ ១៧កោះ។ ប្រជុំកោះទាំង ១៧ មានភាពទាក់ទាញផ្សេងៗគ្នា។ កោះខ្លះមានឆ្នេរ និងសម្បូរទៅដោយផ្កាថ្មស្រស់ស្អាតទាក់ទាញទេសចរយ៉ាងខ្លាំង។ កោះខ្លះទៀត មានភាពអំណោយផលទៅ​លើការស្ទូចត្រី និងមើលផ្កាថ្ម។ ដូច្នេះហើយ ធ្វើឱ្យកោះស្តេច មានសោភ័ណភាពស្អាត បើធៀបនឹងកោះដទៃនៅកម្ពុជា។ នេះជាការបន្ថែមរបស់លោកឧកញ៉ា សួរ វីរៈ។

ដោយឡែកពាក់ព័ន្ធនឹងគម្រោងវិនិយោគ លោកឧកញ៉ា វីរៈ បានឱ្យដឹងដូច្នេះថា« មកដល់ពេលនេះ ខ្ញុំបានសាងសង់រីសតចំនួនពីរ​ គឺទី១ កោះស្តេចរីសត និងទី២ កោះអភិជនរីសត»។ បើតាមលោកឧកញ៉ា សួរ វីរៈ បានបញ្ជាក់ថា កោះអភិជនរីសត បានបោះទុនសាងសង់ជាង ៤លាន ៥សែនដុល្លារ ដោយមិនគិតតម្លៃដី។ ជាមួយគ្នានេះ លោកគ្រោងសាងសង់រីសតមួយទៀត នៅទល់មុខកោះស្តេច ដោយមាន ១៥០បន្ទប់បន្ថែម ដើម្បីផ្គត់ផ្គង់ភ្ញៀវទេសចរ ដែលមានបំណងមកលេងកោះស្តេចនេះ។

ក្រៅពីការអភិវឌ្ឍលើវិស័យរីសត លោកឧកញ៉ា ដែលមានមុខជំនួញច្រើននៅកម្ពុជា រូបនេះ គ្រោងជួសជុល និងសាង​សង់​ផែទេសចរណ៍បន្ថែម ដោយសារបច្ចុប្បន្នផែនេះមានសភាពចាស់ចាស់ទ្រុឌទ្រោម និងដោយមាន​ការគាំទ្រពី​អភិបាលស្រុក ជាមួយក្រុមហ៊ុនវិនិយោគចិន ដើម្បីអភិវឌ្ឍផែទេសចរនេះ។

បើតាមលោកឧកញ៉ា សួរ វីរៈ ផែទេសចរណ៍នេះ គ្រោងសាងសង់លើផ្ទៃដីជាង ២ហិកតា ដោយអាចអនុញ្ញាត​ឱ្យទូកខ្នាតតូច ចូលចតបានបើទោះជាខែប្រាំង ឬវស្សា។ ក្នុងនោះ ក៏មានហាងកាហ្វេ ភោជណីយដ្ឋាន ចំណតឡាន បញ្ជរព័ត៌មាន ការិយាល័យសម្រាប់ប្រជាសហគមន៍ដែលមានទូរទេសចរណ៍ សម្រាប់បម្រើភ្ញៀវទេសចរ និងសួនស្រស់ស្អាតសម្រាប់​ភ្ញៀវចូលលេងពេលឆ្លងកាត់ផងដែរ។

លើសពីនេះទៀត លោកក៏នឹងជួសជុលសាងសង់វត្តចាស់មួយឡើងវិញ ដោយវត្តនេះ ត្រូវបានទុកចោលប្រមាណ ២០ឆ្នាំកន្លងមកហើយ ក្រោយពីក្រោមហ៊ុនចិនទទួលបានសិទ្ធិវិនិយោគតំបន់នេះ។ លោកគូសបញ្ជាក់ថា«ការជួសជុល​កែសម្អវត្តនេះ គឺសម្រាប់ពលរដ្ឋនៅក្នុងតំបន់ និងភ្ញៀវទេសចរឆ្លងកាត់អាចចូលបួងសួងសុំសេចក្តីសុខ និងសម្រាប់​ប្រើប្រាស់ ក្នុងវិស័យព្រះពុទ្ធសាសនា»។

លោកឧកញ៉ា សួរ វីរៈ បានសង្កត់ធ្ងន់ថា កោះស្តេច មានទេសភាពមិនចាញ់តំបន់ទេសចរណ៍នៅប្រទេសជិតខាងឡើយ ទាំងគុណភាពទឹក ឆ្នេរ តំបន់ស្ទួចត្រី កន្លែងជ្រមុជទឹកមើលផ្កាថ្ម ដ៏ស្រស់ស្អាត ជាពិសេសកោះស្តេច នៅមិនឆ្ងាយ​ពីតំបន់កោះកុងក្រៅ ដោយធ្វើដំណើរតាមទូកលឿនប្រហែល ៣០នាទីប៉ុណ្ណោះ។ សក្តានុពលកោះស្តេច មានភាពទាក់​ទាញច្រើន បើធៀបនឹងកោះផ្សេងៗនៅកម្ពុជា និងប្រទេសជិតខាង ដូចជាថៃវៀតណាមជាដើម។ នេះជាការបន្ថែម​របស់លោកឧកញ៉ា សួរ វីរៈ៕