ប្រទេសចំនួន ១១ កំពុងប្រតិបត្តិការជើងហោះហើរ​ជាមួយកម្ពុជា

បច្ចុប្បន្ននេះ មានប្រទេសចំនួន ១១ បាននិងកំពុងប្រតិបត្តិការដឹកជញ្ជូននៅអាកាសយានដ្ឋានអន្តរជាតិទាំងបីរបស់កម្ពុជា និងមានក្រុមហ៊ុនអាកាសចរណ៍ចំនួន២៦ ប្រតិបត្តិការហោះហើរប្រចាំសប្តាហ៍។ នេះជាការបញ្ជាក់របស់លោក ស៊ិន ចាន់សេរីវត្ថា អ្នកនាំពាក្យ និងជា​រដ្ឋលេខាធិកា​រដ្ឋា​ន​អាកាសចរ​ស៊ីវិល។

លោក ស៊ិន ចាន់សេរីវត្ថា បានបញ្ជាក់ប្រាប់កម្ពុជាថ្មីថា ប្រទេសចំនួន ១១នោះរួមមាន ប្រទេសថៃ វៀតណាម មីយ៉ាន់ម៉ា ហ្វីលីពីន ម៉ាឡេស៊ី សឹង្ហបុរី ឡាវ ចិន កូរ៉េខាងត្បូង តៃវ៉ាន់ និងហុងកុង​។

ជុំវិញជើងហោះហើរ អ្នកនាំពាក្យអាកាសចរស៊ីវិល បានឱ្យដឹងថា ក្នុងរយៈពេល៣ខែដើមឆ្នាំ២០២៣នេះ កម្ពុជា ទទួលបានអ្នកដំណើរតាមផ្លូវអាកាសប្រមាណ ៨៧២ ០៤៩នាក់។ ក្នុងនោះ ចាប់ពីខែមករា ដល់ខែមីនា ឆ្នាំ២០២៣ ចំនួនជើងហោះហើរ បានកើនឡើងដល់ ៦៦៩៩ជើង។ សម្រាប់ខែមីនា អ្នកដំណើរដែលចូលមកកម្ពុជា តាមអាកាស​យានដ្ឋានទាំងបី មានចំនួន ៣១៣ ០៦៧ កើនឡើង ១១ភាគរយ ខណៈចំនួនជើងហោះហើរមានចំនួន ២ ៤៦៤ជើង កើនឡើង១៥ភាគរយ បើធៀបនឹងខែកុម្ភៈ ឆ្នាំ២០២៣។

បើតាមលោក ស៊ិន ចាន់សេរីវត្ថា ការភ្ជាប់ជើងហោះហើររវាងកម្ពុជា ចិន ក្នុងខែមីនា មានអ្នកដំណើរចំនួន ៤១ ០៦៤នាក់ កើនឡើង ៣៤ភាគរយ និងចំនួនជើងហោះហើរមានកំណើន ដល់៤១០ជើង កើន២៩ភាគរយ បើធៀបនឹងខែកុម្ភៈ ឆ្នាំ២០២៣។

ចំណែកអ្នកដំណើរមកពីប្រទេសថៃ មានចំនួន១០៣ ៣៧៨នាក់, មកពីប្រទេសវៀតណាមមានចំនួន ៣៥ ២៥៩ នាក់ កើនឡើង២៧ភាគរយ, មកពីប្រទេសមីយ៉ាន់ម៉ា មានចំនួន ១ ៣៦៥នាក់ កើនឡើង៤៨ភាគរយ , មកពីប្រទេសហ្វីលីពីន មានចំនួន៤ ៨៩៥នាក់ កើនឡើង១១ភាគរយ, មកពីម៉ាឡេស៊ី មានចំនួន ៣៦ ៨៩១នាក់ កើនឡើង១៤ភាគរយ ,មកពីប្រទេសសិង្ហបុរី ​មានចំនួន៤៣ ៨៩៧នាក់ កើនឡើង៥ភាគរយ , មកពីប្រទេសកូរ៉េខាងត្បូងមានចំនួន ២៤ ៨២០ កើនឡើង ២០ភាគរយ​, មកពីតៃវ៉ាន់មានចំនួន១៤ ៥៩១នាក់ កើនឡើង២)ភាគរយ និងមកពីតំបន់ពិសេសហុងកុង មានចំនួន ៥ ៥០៨នាក់ ថយចុះ១ភាគរយ។

កាលពីខែ កញ្ញា ឆ្នាំ ២០២២ លោក ស៊ិន ចាន់សេរីវត្ថា បានថ្លែងថា វិស័យអាកាសចរ បានបង្កើតការងារជាង ១លាន ៧សែននាក់ នៅកម្ពុជា ដែលចំនួននេះ គឺជិតស្មើ ២០ភាគរយ នៃទំហំការងារនៅក្នុងប្រទេសកម្ពុជាទាំងមូល។ លោកលើកឡើងបែបនេះ ដោយយោងតាមការសិក្សារបស់អង្គការអន្តរជាតិ កាលពីឆ្នាំ ២០១៧។ វិស័យអាកាសចរស៊ីវិល បានផ្តល់អត្ថប្រយោជន៍ទាំងផ្ទាល់ និងប្រយោលប្រមាណ ១៧ភាគរយ នៃ GDP៕