អភិបាលស្រុកសៀមប៉ាង នឹងជំរុញឲ្យមន្ត្រីជំនាញកសិកម្មជួយបណ្តុះបណ្តាលបច្ចេកទេសដាំដំណាំដល់ជនជាតិដើមភាគតិច ដើម្បីផ្គត់ផ្គង់គ្រួសារ

លោក ផាន់ យុត្ត អភិបាលស្រុកសៀមប៉ាង បានលើឡើងថា ក្នុងនាមអាជ្ញាធរលោកនឹងជំរុញឱ្យមន្ត្រីជំនាញកសិកម្មរកដៃគូរអភិវឌ្ឍន៍ផ្នែកកសិកម្មមកជួយបណ្តុះបណ្តាលបច្ចេកទេសដាំដុះបន្លែបង្ការដល់ជនជាតិដើមភាគតិចដើម្បីឲ្យពួកគាត់មានជំនាញដាំដុះបានល្អ និងឱ្យទទួលបានផលច្រើន ដើម្បីរកប្រាក់ចំណូលបន្ថែមមកផ្គត់ផ្គង់គ្រយសារ។

ការលើកឡើងបែបនេះ បន្ទាប់លោកអភិបាលស្រុកបានឃើញប្រជាពលរដ្ឋជាជនជាតិដើមភាគតិចរែកបន្លែ ត្រីសាច់ដើរលក់នៅតាមផ្សារ ដែលពួកគាត់ដាំដុះទៅតាមលក្ខណគ្រួសារផង និងរកបានពីព្រៃធម្មជាតិផង។    

លោកអភិបាលស្រុកសៀមប៉ាងបានបញ្ជាក់ថា ត្រីសាច់បន្លែបង្ការដែលបងប្អូនជនជាតិរែកពន់ដើរលក់នេះ ប្រជាពលរដ្ឋទូទៅនិយមទិញយកទៅបរិភោគច្រើន ព្រោះវាជាបន្លែធម្មជាតិ។ លោកអភិបាលស្រុកបន្តថា អាជ្ញាធរសប្បាយចិត្ត ពេលបានឃើញពួកគាត់ចេះលក់ដូររកប្រាក់ដោះស្រាយជីវភាព ហើយក្នុងនាមអាជ្ញាធរ លោកនឹងជំរុញឱ្យមន្ត្រីជំនាញកសិកម្ម រកដៃគូរអភិវឌ្ឍន៍ផ្នែកកសិកម្មមកជួយបណ្តុះបណ្តាលបច្ចេកទេសដាំដុះបន្លែបង្ការ ដើម្បីធ្វើឲ្យពួកគាត់មានជំនាញដាំដុះបានល្អ និងឱ្យទទួលបានផលច្រើន ។    

លោកស្រី ខា ស្រាយ រស់នៅភូមិទាក់ទាម ឃុំសន្តិភាព បានលើកឡើងថា ប៉ុន្មានឆ្នាំចុងក្រោយនេះបងប្អូនជនជាតិ ក៏ដូចជាបងប្អូនផ្សេងៗទៀត បានកាត់បន្ថយការពឹងផ្អែកលើកផលអនុផលព្រៃឈើ មកប្រកបរបរដាំបន្លែបង្ការលក់។ លោកស្រីបន្ថែមថា មុខរបររែកពន់ដើរលក់ដូរ បងប្អូនជនជាតិពុំសូវចេះធ្វើទេ ដូចនេះសូមអំពាវនាវបងប្អូនអ្នកផ្សារជួយគាំទ្រទិញដូរបន្លែរបស់ពួកគាត់ផងដើម្បីឲ្យបងប្អូនជនជាតិមានទឹកចិត្តក្នុងការដាំបន្លែហើយបានរួមគ្នាការពារធនធានធម្មជាតិ និងព្រៃឈើសហគមន៍ឲ្យបាននៅគង់វង់។

លោកស្រី បាង ពានជាង ជនជាតិខិ នៅភូមិឃុំសេកុង ស្រុកសៀមប៉ាង ដើរលក់បន្លែនេះដែរបានបញ្ជាក់ថា បច្ចុប្បន្នពួកគាត់បានអនុវត្តតាមការណែនាំរបស់អាជ្ញាធរ ប្រឹងប្រែងដាំដំណាំរួមផ្សំ និងបន្លែបង្ការដើម្បីចង់ផ្លាស់ប្តូរមុខរបរចាកចេញពីការចូលព្រៃ បរបាញ់សត្វ បេះផ្លែឈើ ឬកាប់ឈើជាដើម។

លោកស្រីបន្តថា ទោះបីជាការខិតខំព្យាយាមកែប្រែមុខរបរនេះយ៉ាងណាក៏ដោយ ក៏បងប្អូនមួយចំនួននៅមិនទាន់បោះបង់ចោលទាំងស្រុងបានដែរ ដូចជាដើររកឃ្មុំ ក្តាម ខ្យង កង្កែប​ ហ៊ីង ចង្រិត ធ្វើនេសាទត្រីយកមកបរិភោគ និងនៅសេស​សល់​យកមកលក់។

លោកស្រី វ័នណារី បានអះអាងថា ការរែកទូលដើរលក់ភោគផលប៉ុន្មានឆ្នាំចុងក្រោយនេះ មានភាពងាយស្រួលព្រោះបានផ្លូវរឹងល្អ ស្រួលធ្វើដំណើរជាងកាលពី(ឆ្នាំ២០១៨ -១៩)ដោយសារកាលនោះផ្លូវខែវស្សាភក់ដើរមិនរួចទេ។

សូមបញ្ជាក់ថា បងប្អូនជនជាតិដើមភាគតិចនៅស្រុកសៀមប៉ាងមានគ្រឹង-កាវែត-ខិ-បច្ចុប្បន្នបានផ្លាស់ប្តូរទំលាប់ច្រើន ចេះលក់ដូរបន្លែបង្ការ ត្រីសាច់ ដែលជាមុខរបរបន្ទាប់បន្សំ ដើម្បីរកប្រាក់ចំណូលបង្គ្រប់បន្ថែមក្នុងការដោះស្រាយជីវភាពប្រចាំថ្ងៃក្រៅពីការធ្វើស្រែចំការ៕

អត្ថបទ៖ ងិនលីម