ព័ត៌មានជាតិ

ឯកឧត្ដម ហ៊ុន ម៉ានី ៖ ឃើញការរីកចម្រើនជាប្រចាំ នឹកដល់គោលនយោបាយគណបក្សប្រជាជនកម្ពុជា

បានផុស

៣ years មុន

នៅ

ថ្ងៃព្រហស្បតិ៍ ២០ កក្កដា ២០២៣

ដោយ

ឯកឧត្ដម ហ៊ុន ម៉ានី អនុប្រធានទី ០១ ក្រុមការងារគណបក្សប្រជាជនកម្ពុជាចុះជួយខេត្តកំពង់ស្ពឺ និងជាអ្នកតំណាងរាស្ត្រមណ្ឌលខេត្តកំពង់ស្ពឺ លើកឡើងថា ឃើញការអភិវឌ្ឍ ឃើញការរីកចម្រើនជាប្រចាំ គឺ នឹកឃើញដល់គោលនយោបាយរបស់គណបក្សប្រជាជនកម្ពុជា។

ឯកឧត្ដម ហ៊ុន ម៉ានី បានគូសបញ្ជាក់ថា ប្រជាពលរដ្ឋខ្មែរទូទាំងប្រទេស ប្រាកដជាបានឃើញច្បាស់ផ្ទាល់នឹងភ្នែក និងជាសាក្សី នៃសច្ចធម៌ពិតប្រាកដចំពោះការអភិវឌ្ឍលើគ្រប់វិស័យ គ្រប់ទីកន្លែងទូទាំងប្រទេស ក្រោមការដឹកនាំរបស់រាជរដ្ឋាភិបាលកម្ពុជា ឬ អាចនិយាយបានថា ក្រោមការដឹកនាំរបស់គណបក្សប្រជាជនកម្ពុជា។

ឯកឧត្ដម ហ៊ុន ម៉ានី បន្ថែមថា ការរីកលូតលាស់ទាំងអស់នេះ គឺជាផ្លែផ្កា នៃគោលនយោបាយរបស់គណបក្សប្រជាជនកម្ពុជា ដែលហ៊ានថា ហ៊ានធ្វើ ហ៊ានទទួលខុសត្រូវ។ ឯកឧត្ដម ហ៊ុន ម៉ានី បញ្ជាក់ថា «សន្លឹកឆ្នោតមួយសន្លឹករបស់បងប្អូនជូនគណបក្សប្រជាជនកម្ពុជា ស្មើនឹងការចូលរួមមួយផ្នែកក្នុងការចូលរួមអភិវឌ្ឍន៍ប្រទេសជាតិ ក៏ដូចជាការធានានូវអត្ថប្រយោជន៍ និងកំណើនសេដ្ឋកិច្ចរបស់ប្រជាពលរដ្ឋជាបន្តបន្ទាប់ ព្រោះនេះជាភារកិច្ចដែលគណបក្សប្រជាជនកម្ពុជាត្រូវតបស្នងជូនប្រជាជនវិញ»។

ឆ្លៀតឱកាសនោះ ឯកឧត្ដម ហ៊ុន ម៉ានី ក៏បានក្រើនរំលឹកសាជាថ្មីជូនដល់ប្រជាពលរដ្ឋ ក្នុងការពិនិត្យមើលឯកសារសម្រាប់បោះឆ្នោតដែលមានដូចជា អត្តសញ្ញាណប័ណ្ណសញ្ជាតិខ្មែរ ឬ ឯកសារបញ្ជាក់អត្តសញ្ញាណប័ណ្ណ (ឯ.អ.) ដើម្បីយកទៅបោះឆ្នោត នៅថ្ងៃទី ២៣ ខែកក្កដា ឆ្នាំ ២០២៣ ចាប់ពីវេលាម៉ោង ៧ ព្រឹក ដល់ម៉ោង ៣ រសៀល ហើយសូមបោះឆ្នោតជូនគណបក្សប្រជាជនកម្ពុជា លេខរៀងទី ១៨៕

អត្ថបទ ៖ ពិសី