សម្ដេចសង្ឃកម្ពុជាមួយអង្គ បានលាចាកសិក្ខាបទ ដោយសុខចិត្តលះបង់ងារជាសម្ដេច

សម្តេចព្រះមហាអរិយវង្ស ឃី សុវណ្ណរតនា ព្រះអនុប្រធានលេខាធិការដ្ឋានគណៈសង្ឃនាយក និងជាព្រះចៅអធិការវត្តមង្គលវ័ន បានលាចាកសិក្ខាបទពីភិក្ខុភាវៈ នៅថ្ងៃទី២ ខែសីហា ឆ្នាំ២០២៣នេះ ដោយសុខចិត្តលះបង់ងារជាសម្ដេច។

បើតាមបណ្ដាញសង្គមហ្វេសប៊ុករបស់លេខាធិការដ្ឋានគណៈសង្ឃនាយក ការលាចាកសិក្ខាបទរបស់សម្ដេចព្រះមហាអរិយវង្ស ឃី សុវណ្ណរតនា នៅពេលនេះ គឺដើម្បីចូលរួមបម្រើការងារសង្គមខាងផ្នែកអាណាចក្រជាមួយរាជរដ្ឋាភិបាលកម្ពុជា។  

ជាមួយគ្នានេះ តាមលិខិតទូលថ្វាយសម្ដេចព្រះមហាសុមេធាធិបតី នន្ទ ង៉ត សម្ដេចព្រះសង្ឃនាយកនៃកម្ពុជា សម្តេចសង្ឃ ឃី សុវណ្ណរតនា បានសុំព្រះបរមរាជានុញ្ញាតលាលែងពីព្រះគោរម្យងារ «សម្តេចព្រះមហាអរិយវង្ស»។ សម្តេចសង្ឃរូបនេះ បានបញ្ជាក់ថា នាពេលបច្ចុបន្ននេះ ព្រះអង្គមានភាពនឿយណាយ អស់និស្ស័យក្នុងព្រះផ្នួស ហើយមានបំណងចូលរួមចំណែកបម្រើសង្គមជាតិក្នុងភាពជាឃរាវាស (ជនធម្មតា)។ ដូច្នេះ ព្រះអង្គ សុំលាលែងពីព្រះគោរម្យងារ «សម្តេចព្រះមហាអរិយវង្ស» ចាប់ពីពេលនេះតទៅ។

បើតាមលិខិតដដែលនេះ សម្តេចសង្ឃ ឃី សុវណ្ណរតនា បានសាងព្រះផ្នួសបួសជាបព្វជិត អស់រយៈពេល៣៣វស្សា និងបានរួមចំណែកកសាង អភិវឌ្ឍន៍វិស័យព្រះពុទ្ធសាសនា តាមរយៈស្ថាប័នសម្ដេចព្រះសង្ឃរាជ គណៈសង្ឃនាយក និងវិស័យពុទ្ធិកសិក្សា ព្រមទាំងចូលរួមជួយកិច្ចការសង្គម តាំងពីឆ្នាំ២០០២ រហូតដល់បច្ចុប្បន្ននេះ អស់រយៈពេល២១ឆ្នាំមកហើយ។

គួរជម្រាបថា សម្ដេចព្រះមហាអរិយវង្ស ឃី សុវណ្ណរតនា មានតួនាទីជាអគ្គលេខាធិការរងថេរសភាព្រះពុទ្ធសាសនាកម្ពុជា ជាព្រះអនុប្រធានលេខាធិការដ្ឋានគណៈសង្ឃនាយក ជាព្រះសាកលវិទ្យាធិការរងនៃពុទ្ធិកសាកលវិទ្យាល័យព្រះសីហនុរាជ ព្រះអនុគណខណ្ឌ៧មករា និងជាព្រះចៅអធិការវត្តមង្គលវ័ន ហៅវត្តស្វាយដង្គំ រាជធានីភ្នំពេញ៕