អាជ្ញាធរខេត្តកំពង់ធំ ចុះពិនិត្យ និងដោះស្រាយសំណើរពលរដ្ឋដែលអាស្រ័យផលក្នុងសហគមន៍នេសាទ ស្រុកកំពង់ស្វាយ

នៅថ្ងៃទី៣១ ខែសីហា ឆ្នាំ២០២៣ លោក ងួន រតនៈ អភិបាលខេត្តកំពង់ធំ បានចុះពិនិត្យ និងដោះស្រាយសំណើរប្រជាពលរដ្ឋប្រមាណជាង១៣០គ្រួសារ ដែលកំពុងអាស្រ័យផលធ្វើស្រែលើដីសហគមន៍នេសាទ ស្រុកកំពង់ស្វាយ ដើម្បីរៀបចំកាត់ឆ្វៀលធ្វើប័ណ្ណកម្មសិទ្ធិ ស្របច្បាប់ជូនពលរដ្ឋជាក់ស្តែង។

ក្នុងឱកាសនោះលោកអភិបាលខេត្តបានធ្វើការពិភាក្សាជាមួយអាជ្ញាធរមូលដ្ឋាន មេភូមិ ប្រធានសហគមន៍ទាំងពីរ និងប្រជាពលរដ្ឋដែលបានអាស្រ័យនៅតំបន់នោះចំនួន១៣១គ្រួសារ និងចាត់ឲ្យមន្រ្តីជំនាញរួមជាមួយអាជ្ញាធរពាក់ព័ន្ធរៀបចំឯកសារផ្លូវការ ដើម្បីស្នើសុំកាត់ឆ្វៀលដីធ្វើប័ណ្ណកម្មសិទ្ធិស្របច្បាប់។ លោកអភិបាលខេត្តបន្តថា រដ្ឋបាលខេត្ត តែងតែខិតខំក្នុងការដោះស្រាយនូវរាល់សំណូមពរ និងបញ្ហាជាក់ស្តែងរបស់ប្រជាពលរដ្ឋ តាមអនុសាសន៍ និងគោលនយោបាយណ៍របស់រាជរដ្ឋាភិបាល។ តួយ៉ាងកន្លងមករាជរដ្ឋាភិបាលបានសម្រេចចេញប័ណ្ណកម្មសិទ្ធិដីធ្លីជូនប្រជាពលរដ្ឋ ទទួលបានយ៉ាងច្រើនរួចមកហើយក្នុងខេត្តកំពង់ធំយើងនេះ ដើម្បីឲ្យប្រជាពលរដ្ឋបានប្រើប្រាស់បានដោយស្របច្បាប់ និងមានសិទ្ធិជាអចិន្ត្រៃយ៍រហូត។ លោកជំរុញការដោះស្រាយកិច្ចការនេះឲ្យកាន់តែឆាប់រហ័ស ជាមួយអាជ្ញាធរមូលដ្ឋាន និងមន្ត្រីជំនាញពាក់ព័ន្ធទាំងអស់ដែលមានសិទ្ធិសម្រេចកិច្ចការងារខាងលើ មិនទុកឲ្យប្រជាពលរដ្ឋនៅរងចាំបន្តទៀតនោះទេ។

ធ្វើសេចក្តីរាយការណ៍ក្នុងឱកាសនោះដែរ លោក អ៊ុត វណ្ណារ៉ា អភិបាលស្រុកកំពង់ស្វាយ លើកឡើងថា ការកកើត​សហគមន៍នេសាទទាំងពីរនេះ មានផ្ទៃដីសរុបចំនួន៩៣៩ហិចតា ក្នុងនោះប្រជាពលរដ្ឋចំនួន១៣១គ្រួសារ ស្នើសុំកាត់ឆ្វៀលដីពីសហគមន៍ទាំងពីរ មានចំនួន ៧០,៨៩ហិចតា ហើយដីតំបន់ខាងលើ ពោពេញទៅដោយទឹកលិចនៅរដូវវស្សា បច្ចុប្បន្នប្រជាពលរដ្ឋអាស្រ័យផលតាមអាកាសធាតុ និងតាមរដូវកាល មានស្រូវវស្សា និងស្រូវបណ្តេញទឹក៕

អត្ថបទ៖ ឈាង មករា