ព័ត៌មានជាតិ

រដ្ឋាភិបាល នៅតែបន្តកម្មវិធីផ្តល់ប្រាក់ឧបត្ថម្ភដល់ស្ត្រីមានផ្ទៃពោះ និងកុមារអាយុក្រោមពីរឆ្នាំ ក្នុងគ្រួសារក្រីក្រ

Published

1 month ago

February 1, 2021

ស្ត្រីមានផ្ទៃពោះនិងកុមារអាយុក្រោម២ឆ្នាំក្នុងគ្រួសារក្រីក្រជាង១៧ម៉ឺននាក់ បានទទួលផលពីកម្មវិធីឧបត្ថម្ភសាច់ប្រាក់ពីរាជរដ្ឋាភិបាល ដោយរដ្ឋចំណាយថវិកាសរុបប្រមាណ១០លានដុល្លារតាំងពីចាប់ផ្តើមអនុវត្តពីខែមិថុនា ឆ្នាំ២០១៩ដល់ឆ្នាំ២០២០។

ដោយឡែកគិតត្រឹមខែមករា ឆ្នាំ២០២១នេះ មានស្ត្រីនិងកុមារជាង៧ម៉ឺននាក់ ទទួលបានផលពីកម្មវិធីនិងចំណាយថវិការដ្ឋសរុបប្រមាណ៦លានដុល្លារ។

លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា បានមានប្រសាសន៍បញ្ជាក់ឲ្យដឹង នៅក្នុងកិច្ចប្រជុំបូកសរុបលទ្ធផលនៃការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះនិងកុមារអាយុក្រោម២ឆ្នាំនិងកម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ១៩ឆ្នាំ២០២០និងទិសដៅអនុវត្តបន្តឆ្នាំ២០២១ ដែលបានរៀបចំឡើងនៅសណ្ឋាគារភ្នំពេញនាព្រឹកថ្ងៃទី១ ខែកុម្ភៈ ឆ្នាំ២០២១។

លោករដ្ឋមន្ត្រីបានបញ្ជាក់ថា រីឯកម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩ រហូតមកដល់បច្ចុប្បន្ននេះក្រសួងសង្គមកិច្ចបានបើកផ្តល់បានចំនួន៣ជុំមាន៧លើករួចមកហើយ និងមានគ្រួសារក្រីក្រជាង៦៨ម៉ឺនគ្រួសារបានទទួលផលពីកម្មវិធីនេះ ដោយចំណាយថវិកាប្រមាណ២០០លានដុល្លារអាមេរិក។ បច្ចុប្បន្នក្រសួងបាននិងកំពុងបន្តអនុវត្តជុំទី៤ ដែលមានរយៈពេល៣ខែបន្តទៀត ក្នុងខែមករា កុម្ភៈនិងមីនា ឆ្នាំ២០២១។

គួររំលឹកថា កម្មវិធីឧបត្ថម្ភសាច់ប្រាក់ចំនួន២ ជូនប្រជាជនប្រភេទខាងលើធ្វើឡើង ក្នុងគោលបំណងលើកកម្ពស់សុខុមាលភាពមាតានិងទារកក្នុងគ្រួសារក្រីក្រនិងរក្សា លំនឹងជីវភាពរបស់បងប្អូនប្រជាពលរដ្ឋក្នុងអំឡុងពេលដ៏លំបាកនេះ។ ជារួម លោករដ្ឋមន្ត្រី វង សូត បានបញ្ជាក់ថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩នឹងត្រូវបញ្ចប់ នៅពេលខាងមុខនេះ។ ប៉ុន្តែ កម្មវិធីផ្តល់ប្រាក់ឧបត្ថម្ភដល់ស្ត្រីមានផ្ទៃពោះនិងកុមារអាយុក្រោមពីរឆ្នាំ ក្នុងគ្រួសារក្រីក្ររាជរដ្ឋាភិបាលនៅតែបន្តអនុវត្តជាបន្តទៀត៕

អត្ថបទ៖ វត្តី

សូមចុចអាន៖ រដ្ឋមន្ត្រីសុខាភិបាលនៅតែហាមមិនឲ្យពលរដ្ឋជួបជុំលក្ខណៈទ្រង់ទ្រាយធំក្នុងអំឡុងពិធីបុណ្យចូលឆ្នាំខ្មែរខាងមុខ