អ្នកនាំពាក្យ៖ ផលិតផលគ្រាប់ស្វាយចន្ទីខ្មែរ​កំពុងពេញនិយម​នៅទីផ្សារជប៉ុន

អ្នកនាំពាក្យក្រសួងកសិកម្ម លោកជំទាវ អ៊ឹម រចនា បានលើកឡើងថា ផលិតផលគ្រាប់ស្វាយចន្ទីខ្មែរកំពុងទទួល​បានការនិយមចូលចិត្តពីសំណាក់ប្រជាជនជប៉ុន។

តាមរយៈបណ្តាញសង្គមផ្លូវការលោកជំទាវ បានបញ្ជាក់ថា ក្រុមហ៊ុនជប៉ុនកំពុងសិក្សា និងឈានទៅបើករោង​ចក្រកែច្នៃស្វាយចន្ទីនេះបន្ថែមទៀត នៅចុងឆ្នាំ២០២៣។ រោងចក្រថ្មីនេះ មានកម្លាំងស្រូបទាញ និងកែច្នៃស្វាយ​ចន្ទីស្រស់បានរហូតដល់ទៅ ១ ៥០០តោន នៅក្នុងមួយឆ្នាំ។

ប្រទេសកម្ពុជាគឺជាប្រទេសមួយ ដែលមានសក្ដានុពលខ្លាំងក្នុងការដាំដំណាំប្រភេទដើម ស្វាយចន្ទី។ ដំណាំស្វាយ​ចន្ទីគឺជាដំណាំផ្ដល់អត្ថប្រយោជន៍ច្រើន។ ដំណាំនេះ ងាយស្រួលដាំដុះ តាមលក្ខណៈធម្មតា។ គេអាចធ្វើការ​ដាំដុះពីដើមរដូវដល់ចុងរដូវប្រាំង ដោយមិនបាច់ស្រោចទឹកក៏វាអាចរស់បានដែរ ម្យ៉ាងទៀតគុណសម្បត្តិ​ដ៏ល្អប្រសើរ​នោះក៏អាចដាំលើដីគ្រប់ប្រភេទ លើកលែងតែដីលិចទឹកតែប៉ុណ្ណោះ។

បច្ចុប្បន្នកម្ពុជាមានផ្ទៃដីដាំដុះគ្រាប់ស្វាយចន្ទីសរុបប្រមាណ ៧០ម៉ឺនហិកតា។ ស្របពេលមាន​បញ្ហាការប្រែ​ប្រួល​អាកាសធាតុ សមាគមស្វាយចន្ទីកម្ពុជា បានទម្លាក់ការព្យាករណ៍ទិន្នផលស្វាយចន្ទីនៅឆ្នាំ ២០២៣នេះ ដោយមក​នៅត្រឹមចន្លោះពី ៥០ម៉ឺនតោន ទៅ ៧០ម៉ឺនតោនប៉ុណ្ណោះ ខណៈកាលពីចុងឆ្នាំ ២០២២កន្លងទៅ សមាគមនេះ បានរំពឹងថា កម្ពុជាអាចផលិតគ្រាប់ឆៅចន្លោះពី ៨០ម៉ឺនតោន ទៅ១លានតោន នៅពេញមួយឆ្នាំ២០២៣នេះ។

ប្រទេសដែលទទួលទិញគ្រាប់ស្វាយចន្ទីរបស់កម្ពុជាមាន ប្រទេសវៀតណាម ថៃ ជប៉ុន រុស្សី ចិន ហុងកុង បារាំង កូរ៉េ តួគី និង បង់ក្លាដេស ជាដើម។

រយៈពេល ៨ខែឆ្នាំ២០២៣នេះ កម្ពុជាផលិតគ្រាប់ស្វាយចន្ទីឆៅបានប្រមាណជាង ៦៣ម៉ឺន ៤ពាន់តោន ក្នុងនោះបាននាំចេញទៅវៀតណាមប្រមាណជាង ៦០ម៉ឺន ៧ពាន់តោន ដោយគិតជាទឹកប្រាក់មានប្រមាណ ៨២០លានដុល្លារ ថយចុះជិត ១៦% បើធៀបនឹងរយៈពេលដូចគ្នាកាលពីឆ្នាំ២០២២។ នេះបើតាមសមាគម​ស្វាយចន្ទីកម្ពុជា។

គ្រាប់ស្វាយចន្ទី ជាប្រភេទអាហារដែលសំបូរទៅដោយជាតិដែក ដែលជាសារធាតុចាំបាច់ សម្រាប់តម្រូវការជួយលើក​កម្ពស់សុខភាពមនុស្ស ដែលមានបញ្ហាស្លេកស្លាំង ឬខ្វះឈាមក្រហម ហើយវាក៏ជាប្រភេទអាហារល្អ​សម្រាប់អ្នក​ជំងឺទឹកនោមផ្អែម ដោយសារតែវាអាចជួយកម្រិតជាតិស្ករនៅក្នុងឈាម ហើយត្រូវបានគេជឿថា ជាអាហារដែល​មានផ្ទុកសារធាតុផូស្វ័រ និងសារធាតុ ដែលអាចជួយលើកកម្ពស់កម្លាំងមនុស្ស ជួយការពារការរលាក ជួយលើកកម្ពស់​ភាពស៊ាំនឹងជំងឺគ្រុនផ្តាសាយផងដែរ៕