ព័ត៌មានជាតិ

លោក ហេង សួរ ថ្លែងអំណរគុណក្រុមហ៊ុនជប៉ុន បន្តបណ្ដុះបណ្ដាលសាលាបច្ចេកទេស នៅកម្ពុជា

បានផុស

៧ ខែ មុន

នៅ

ថ្ងៃអង្គារ ២១ វិច្ឆិកា ២០២៣

ដោយ

កាលពីថ្ងៃទី ២០ ខែវិច្ឆិកា ឆ្នាំ ២០២៣ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងអំណរគុណក្រុមហ៊ុនជប៉ុន ដែលបន្តផ្តល់កិច្ចសហការបណ្ដុះបណ្ដាលធនធានមនុស្សដល់សាលាមធ្យមសិក្សាបច្ចេកទេស ហ៊ី វ៉េ សេ លើជំនាញជួសជុល និងថែទាំរថយន្ត រួមទាំងគម្រោងបណ្ដុះបណ្ដាលសមត្ថភាពសិក្ខាកាមរបស់កម្ពុជានៅប្រទេសជប៉ុនតាមរយៈគម្រោងកម្មសិក្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សួរ មានប្រសាសន៍បែបនេះ ខណៈពេលជំនួបជាមួយ លោក តាកាហាស៊ី ហ្វ៊ូមីអាគិ (Takahashi Fumiaki) ប្រធានសមាគមជប៉ុន-កម្ពុជា និងគណៈប្រតិភូ នៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ។

នាឱកាសនោះ ភាគីជប៉ុន បានលើកឡើងពីគម្រោងពង្រីកវិសាលភាព និងការពង្រឹងសមត្ថភាពរបស់សាលាមធ្យមសិក្សាបច្ចេកទេស ហ៊ី វ៉េ សេ ដើម្បីឆ្លើយតបនឹងតម្រូវការនាពេលបច្ចុប្បន្ន។

ក្នុងកិច្ចពិភាក្សាប្រកបដោយភាពស្និទ្ធស្នាលនោះ លោករដ្ឋមន្ត្រី និងគណៈប្រតិភូ ក៏បានពិភាក្សាអំពីលក្ខខណ្ឌការងារ និងឱកាស នៃការពង្រីកទីផ្សារការងារនៅប្រទេសជប៉ុន រួមទាំងការពង្រីកលទ្ធភាព នៃកិច្ចសហការផ្សេងទៀតដែលក្រុមហ៊ុនជប៉ុនមើលឃើញពីសក្ដានុពលនៅកម្ពុជា។

មួយវិញទៀត លោក បានបញ្ជាក់ជូនក្រុមហ៊ុនជប៉ុនថា តាមរយៈគោលនយោបាយ និងកម្មវិធីអាទិភាពរបស់ក្រសួងស្របទៅនឹងគោលនយោបាយរបស់រាជរដ្ឋាភិបាលអាណត្តិទី ៧ នេះ នឹងធ្វើឲ្យកម្ពុជា មានកម្លាំងពលកម្មជំនាញកាន់តែច្រើន ដើម្បីធានាប្រសិទ្ធភាព នៃផលិតកម្ម និងផលិតភាពខ្ពស់ដែលជាតម្រូវការរបស់ក្រុមហ៊ុនវិនិយោគ។

មុនបញ្ចប់ លោករដ្ឋមន្ត្រី បានបញ្ជាក់ជូនសមាគមជប៉ុន-កម្ពុជា ថា ក្នុងក្របខណ្ឌវិស័យការងារ និងបណ្ដុះបណ្ដាលវិជ្ជាជីវៈ ក្រសួង បានត្រៀមលក្ខណៈសម្បត្តិជួយក្រុមហ៊ុនជប៉ុនដែលមានបំណងបោះទុនវិនិយោគនៅកម្ពុជា៕