ធនាគារជាតិនិង UNESCAP ឈានទៅ​ចុះកិច្ចព្រមព្រៀងលើកកម្ពស់វិស័យហិរញ្ញវត្ថុនៅកម្ពុជា

ធនាគារជាតិនៃកម្ពុជា និងគណៈកម្មការសេដ្ឋកិច្ច និងសង្គម របស់អង្គការសហប្រជាជាតិសម្រាប់អាស៊ីនិងប៉ាស៊ីហ្វិក ហៅកាត់ UNESCAP បានកិច្ចចុះព្រមព្រៀងគ្នាដើម្បីពន្លឿនការអភិវឌ្ឍប្រព័ន្ធហិរញ្ញវត្ថុ ប្រកបដោយនិរន្តរភាព គ្រាដែលប្រជាពលរដ្ឋជួបបញ្ហាហិរញ្ញវត្ថុ ដោយសារការប្រែប្រួលអាកាសធាតុ និងគ្រោះធម្មជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីចុះហត្ថលេខានៅព្រឹកថ្ងៃទី ៨ ធ្នូ នៅសណ្ឋាគារសូហ្វីតែភ្នំពេញ លោកស្រី ជា សិរី ទេសាភិបាលធនាគារជាតិនៃកម្ពុជាបានមានប្រសាសន៍ថា កិច្ចព្រមព្រៀងនេះគឺជាផែនទីបង្ហាញផ្លូវថ្មីមួយទៀត ដែលនឹងរួមបញ្ចូលផែនការច្បាស់លាស់មួយ សម្រាប់ការប្រមូលផ្តុំតម្រូវការហិរញ្ញវត្ថុ គម្លាតប្រភព និងជម្រើស ស្របតាមគោលដៅកាត់បន្ថយ​ផល​ប៉ះពាល់​ពីការអាកាសធាតុ និងការអភិវឌ្ឍប្រកបដោយចីរភាព។

ធនាគារជាតិនៃកម្ពុជាមានកិច្ចសហប្រតិបត្តិការជាមួយ UNESCAP យូរណាស់មកហើយលើផ្នែក​ហិរញ្ញវត្ថុ ក្នុងគោលបំណងកាត់បន្ថយការជំពាក់បំណុលគេ ក្នុងចំណោមគ្រួសារដែលមានប្រាក់ចំណូលកម្រិតទាប និងសហគមន៍ងាយរងគ្រោះ។

លោកជំទាវទេសាភិបាលបានមានប្រសាសន៍ថា «ថ្ងៃនេះ យើងបានឈានដល់ដំណាក់កាលថ្មីមួយទៀតហើយ នៅក្នុងកិច្ចសហប្រតិបត្តិការរបស់យើងនោះគឺយើងចុះហត្ថលេខាលើអនុស្សរណៈនៃកិច្ចព្រមព្រៀងនាពេលនេះ។ តាមរយៈឯកសារកិច្ចព្រមព្រៀងនេះ ESCAP និងធនាគារជាតិនៃកម្ពុជា នឹងពង្រឹងកិច្ចសហប្រតិបត្តិការជិតស្និទ្ធរវាងគ្នានិងគ្នា ជាពិសេសក្នុងការងារលើកកម្ពស់ហិរញ្ញវត្ថុប្រកបដោយចីរភាពនៅក្នុងប្រទេសកម្ពុជា ហើយកិច្ចសហប្រតិបត្តិការនេះក៏ស្របតាមយុទ្ធសាស្ត្របបញ្ចកោណដំណាក់ទី ១ របស់រាជរដ្ឋាភិបាលផងដែរ»៕

អត្ថបទ៖ សំអឿន