ពលករចំណាកស្រុកស្របច្បាប់ ទទួលបានអត្ថប្រយោជន៍ច្រើន មិនប្រឈមហានិភ័យ

អតីតពលករខ្មែរមកពីប្រទេសជប៉ុន និង ថៃ អំពាវនាវឱ្យពលរដ្ឋកម្ពុជាទៅធ្វើការនៅបរទេសដោយស្របច្បាប់ និងមានក្រុមហ៊ុនត្រឹមត្រូវ ដើម្បីធានាសុវត្ថិភាព និងកិច្ចគាំពារផ្នែកច្បាប់នានាអំឡុងពេល​បម្រើការងារជាពលករ​នៅក្រៅប្រទេស ជៀសសជាងទៅដោយខុសច្បាប់ដែលអាចបង្កបញ្ហាដល់ខ្លួនឯង។

លោក ឡុង គន្ធា អតីតពលករខ្មែរនៅប្រទេសជប៉ុនម្នាក់ ដែលមានស្រុកកំណើតមកពីខេត្តពោធិ៍សាត់ បានបម្រើការ​ងារផ្នែកកសិកម្មនៅប្រទេសជប៉ុន ចាប់ពីឆ្នាំ២០១៦ ដល់ឆ្នាំ២០២៣ ដែលមកទល់ពេល​បច្ចុប្បន្ននេះលោក​បានត្រឡប់មកធ្វើអាជីវកម្មខ្លួនឯងនៅស្រុក បន្ទាប់ពីចប់អាណត្តិជាពលករនៅប្រទេសជប៉ុន។

លោកបានឱ្យដឹងដូច្នេះថា «បងប្អូនពលរដ្ឋរបស់យើងដែលមានបំណងទៅធ្វើការនៅក្រៅប្រទេស សូមទៅធ្វើដោយ​ស្របច្បាប់ តាមរយៈក្រុមហ៊ុនត្រឹមត្រូវ ដើម្បីមានការគាំពារផ្នែកច្បាប់ៗ និងអត្ថប្រយោជន៍ផ្សេងៗទៀត ជៀសវាង​ទៅដោយខុសច្បាប់ដែលវាធ្វើឱ្យប៉ះពាល់ទៅខ្លួនយើងផ្ទាល់ » ។

បើតាមលោក ឡុង គន្ធា ការទៅធ្វើការនៅក្រៅប្រទេសស្របច្បាប់ ទទួលបានអត្ថប្រយោជន៍ជាច្រើនអំឡុង​ពេលធ្វើការ​នៅទីនោះ ទាំងការធានារ៉ាប់រងសុខភាព ប្រាក់ឧបត្ថម្ភ និងការយកចិត្តទុកដាក់ផ្សេងៗ ដូចពលរដ្ឋជប៉ុន​ដទៃទៀតដែរ ជាពិសេសនោះគ្មានការរំលោភបំពានឡើយ។

លោកបន្ថែមថា ការទៅធ្វើការនៅប្រទេសជប៉ុនទទួលបានប្រាក់ខែខ្ពស់ ជួយគ្រួសារកែប្រែជីវភាពគ្រួសារ ជាពិសេសទទួលបានជំនាញ និងបទពិសោធន៍ល្អ អាចប្រកបអាជីវកម្មបានដោយខ្លួនឯង​នៅពេលត្រឡប់​ពីប្រទេសជប៉ុនវិញ ។

អ្នកស្រី ជា ស្រីលក្ខ អតីតពលករមកពីប្រទេសថៃក៏បានលើកឡើងថា អំឡុងពេលធ្វើការរយៈ​ពេលជាង៨ឆ្នាំនៅ​ប្រទេសថៃ អ្នកស្រីមិនដែលមានបញ្ហាអ្វីពីសំណាក់ថៅកែនោះទេ ពីព្រោះអ្នកស្រីជាពលករស្របច្បាប់ ។

«នៅពេលខ្ញុំឈឺអំឡុងពេលនៅប្រទេសថៃ ខ្ញុំត្រូវបានយកចិត្តទុកដាក់ពីសំណាក់ថៅកែនៅប្រទេសថៃ ដោយព្យាបាលមិនអស់លុយនោះទេ ហើយខ្ញុំមានរបបសន្តិសុខសង្គមពីសំណាក់រដ្ឋាភិបាលថៃ ដែល បសស នេះ ខ្ញុំជាអ្នកបង់ប្រាក់ដោយខ្លួនឯង»។

អ្នកស្រីថា អំឡុងពេលធ្វើការនៅប្រទេសថៃ អ្នកស្រីមានការយកចិត្តទុកដាក់ពីសំណាក់ថៅកែដូចពលរដ្ឋថៃ​ផ្សេងៗទៀតដូច្នេះដែរ ក៏ប៉ុន្តែលោកស្រីបញ្ជាក់ថាអ្នកស្រីធ្វើការនៅនោះគឺដោយស្របច្បាប់ ដូច្នេះហើយបាន​លក្ខខណ្ឌការងាររបស់លោកស្រីមានភាពប្រសើរ ។

អ្នកស្រីថា «ជីវភាពរបស់គ្រួសារខ្ញុំផ្លាស់ប្តូ ខ្ញុំអាចជួយប្អូនៗរបស់ខ្ញុំរៀនចប់ ធ្វើផ្ទះសម្បែងថ្មីជូនឪពុកម្តាយ ជាពិសេសនោះនៅពេលត្រលប់ពីធ្វើការនៅប្រទេសថៃវិញ ខ្ញុំអាចមានដើមទុនធ្វើអាជីវកម្មនៅក្នុងស្រុក​ដោយខ្លួនឯងដោយមិនចាំបាច់ត្រលប់ទៅប្រទេសថៃវិញនោះទេ»៕