ពិធីបុណ្យចូលឆ្នាំថ្មី ៣ថ្ងៃ ខេត្តត្បូងឃ្មុំមានភ្ញៀវទេសចរដើរលេងជាង ៣៧ម៉ឺននាក់

រយៈពេល ៣ ថ្ងៃ គឺ​ចាប់​ពី​ថ្ងៃទី១៣ ១៤ និង១៥ ខែ​មេសា ឆ្នាំ២០២៤ ក្នុង​ឱកាស​ពិធីបុណ្យចូលឆ្នាំថ្មីប្រពៃណីជាតិ នៅ​ទូទាំង​ខេត្ត​ត្បូងឃ្មុំ មាន​ភ្ញៀវ​ទេសចរ​ដើរ​លេង​កម្សាន្ត​តាម​តំបន់​រមណីយដ្ឋាន​​នានាសរុប​ចំនួន​ជាង ៣៧​ ម៉ឺន​នាក់ (៣៧២,១៣០​ នាក់)។

លោក អឿន រិទ្ធ ប្រធាន​មន្ទីរទេសចរណ៍ខេត្តត្បូងឃ្មុំបាន​ឲ្យ​ដឹងទៀតថា នាថ្ងៃទី១៣ ខែមេសា មាន​ភ្ញៀវ​ទេសចរសរុប​មាន​​ចំនួន ១០០,៧៧០ នាក់ ថ្ងៃទី១៤ ខែ​មេសា មាន​ចំនួន ១២០,៥៣០ នាក់ និងថ្ងៃទី ១៥ ខែមេសា មានចំនួន ១៥០,៨៣០​ ​នាក់។

ក្នុង​នោះ​ចំពោះ​តំបន់ដែ​លមានពលរដ្ឋទៅលេងច្រើន​ជាងគេ គឺ​នៅ​បុរីរដ្ឋបាល​ទីរួមខេត្ត ដែល​រដ្ឋបាល​ខេត្តរៀប​ចំ​ព្រឹត្តិការណ៍ «សង្ក្រាន្ត​ត្បូង​ឃ្មុំ» រយៈពេល ៣ ថ្ងៃ មាន​ភ្ញៀវ​ទេសចរ​សរុបប្រមាណ ២៩៩,៣៦០នាក់។

ព្រឹត្តិការណ៍​សង្ក្រាន្តត្បូងឃ្មុំ​ឆ្នាំនេះ រដ្ឋបាលខេត្ត​បានរៀប​ចំ​លេង​ល្បែង​ប្រជាប្រិយខ្មែរ​ជា​ច្រើន​ដូច​ជា​ ទាញព្រ័ត្រ, លាក់កន្សែង, វាយក្អម, ឡើងសសរខា្លញ់។  ជាមួយគ្នានេះ ក៏មានរៀបចំ «តំបន់ត្រជាក់» បាញ់​ទឹក និង​ប្រគំ​តន្រ្តី​រាំលេងកម្សាន្ត​សប្បាយ។ បន្ថែមពីនេះ មាន​កម្មវិធីលេង​កម្សាន្តសប្បាយ​ៗជាច្រើនទៀត ព្រម​ទាំង រៀប​ចំ​ស្តង់ពិព័រណ៍ ការប្រគំ​តន្រ្តីសម័យ និង​ការបាញ់កាំជ្រួច អមជា​មួយការ​តុបតែង​ភ្លើង​លម្អ​នាពេល​រាត្រី​យ៉ាងស្រស់ស្អាតផងដែរ ។

រដ្ឋបាលខេត្តត្បូងឃ្មុំ បានរៀបចំ «សង្ក្រាន្តត្បូងឃ្មុំ» នៅទីរួមខេត្ត រយៈពេល ៤ថ្ងៃ គឺថ្ងៃទី១៣ ដល់១៦ ខែមេសា ឆ្នាំ​២០២៤ ដើម្បីអបអរពិធីបុណ្យចូលឆ្នាំថ្មីប្រពៃណីជាតិខ្មែរ ក៏ដូចជា​បង្ក​បរិយាកាស​ជូន​ពលរដ្ឋកម្សាន្ត​សប្បាយ៕

អត្ថបទ៖ សាន វិឡែម