១៥ថ្ងៃខ្យល់កន្ត្រាក់ និងផ្គររន្ទះបណ្តាលឲ្យមនុស្សស្លាប់ និងរបួស៥០នាក់ ប៉ះពាល់ផ្ទះជាង១​ពាន់​ខ្នង

ក្នុងរយៈពេល១៥ថ្ងៃ ខែឧសភា ឆ្នាំ២០២៤នេះ ខ្យល់កន្ត្រាក់ និងផ្គររន្ទះបានបណ្តាលឱ្យមនុស្សស្លាប់ និងរងរបួស៥០នាក់ និងប៉ះពាល់ផ្ទះសម្បែងប្រជាពលរដ្ឋជាង១ពាន់ខ្នង ព្រមទាំងហេរដ្ឋារចនាសម្ព័ន្ធមួយចំនួនទៀត។

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍នៅព្រឹកថ្ងៃទី២៤ឧសភានេះថា ចាប់ពីថ្ងៃទី០១-១៥ ខែឧសភា ឆ្នាំ២០២៤ ខ្យល់កន្ត្រាក់បានកើតឡើងទៅលើរាជធានីខេត្តចំនួន២២ លើកលែងខេត្តកំពង់ចាម ព្រះសីហនុ និងខេត្តកណ្តាល បណ្តាលឱ្យផ្ទះរលំ និងខូចខាតធ្ងន់ធ្ងរ ១៧២ខ្នង, របើកដំបូលនិងខូចមធ្យម ១១៤៤ខ្នង របើកដំបូលសាលារៀន ១២ អគារ សាលាឃុំ សាលាឆាន់ និងការិយាល័យស្រុក៣កន្លែង ដួលរលំគ្រោងអគាររោងចក្រ២ខ្នង ឃ្លាំងស្តុកទំនិញ១កន្លែង និងរោងចញ្ចឹមមាន់១កន្លែងខូចខាតដើមស្វាយចន្ទីរ ៧,៦ហិកតា និងដួលរលំដើមឈើ៣ដើមនៅរាជធានីភ្នំពេញ មនុស្សស្លាប់២នាក់ និងរបួស៩នាក់ ដោយសារផ្ទះ និងដើមឈើរលំសង្កត់។

លោកបានបន្តថា ដោយឡែកគ្រោះថ្នាក់រន្ទះបាញ់បានកើតឡើងចំនួន ៤០លើក នៅតាមបណ្តាខេត្តចំនួន១៥បណ្តាលឱ្យមនុស្សស្លាប់២១ នាក់ របួស១៨នាក់ ងាប់គោរក្របី១១ក្បាល និងខូចខាតផ្ទះ១០ខ្នង។ លោកបានបញ្ជាក់ថា តួលេខនេះបើធៀបទៅនឹងរយៈពេលពេញ១ខែមេសា ឆ្នាំ២០២៤កន្លងទៅឃើញថា មានការកើនឡើងគួរឱ្យកត់សម្គាល់ដោយក្នុងខែមេសាខ្យល់កន្ត្រាក់បានកើតឡើងចំនួន៤៨លើក បណ្តាលឱ្យរលំផ្ទះ៧៥ខ្នង របើកដំបូលផ្ទះ៦១៣ខ្នង សាលារៀន១២ខ្នង តូបផ្សារ៤តូប អគារដ្ឋបាល៣ និងរបួសមនុស្ស២នាក់។ ចំណែករន្ទះបាញ់វិញបានកើតឡើងចំនួន៥លើកបណ្តាលឱ្យមនុស្សស្លាប់ចំនួន៣នាក់។

យោងតាមសេចក្តីជូនដំណឹងរបស់ក្រសួងធនធានទឹកនិងឧត្តុនិយមបានឱ្យដឹងថា ដោយមានសម្ពាធទាបគ្របដណ្ដបមកលើឈូងសមុទ្រថៃ ព្រះរាជាណាចក្រកម្ពុជា ភាគកណ្តាលនៃអាងទន្លេមេគង្គ និងសមុទ្រចិនខាងត្បូងស្ថានភាពបែបនេះនឹងធ្វើឱ្យរាជធានីខេត្តភាគច្រើននៃប្រទេសកម្ពុជាអាចមានភ្ញៀងផ្គររន្ទះ និងខ្យល់កន្ត្រាក់គ្រប់ដណ្តប់លើផ្ទៃដី៣០%ចាប់ពីថ្ងៃទី២៣​ ដល់ថ្ងៃទី២៥ ខែឧសភា ឆ្នាំ២០២៤៕

អត្ថបទ៖ សំអឿន