កសិករក្នុងខេត្តត្បូងឃ្មុំ សម្រុកបង្កបង្កើន​ផលស្រូវបានជាង៤០ភាគរយនៅខែឧសភានេះ

ប្រជាកសិករក្នុងខេត្តត្បូងឃ្មុំ​ បានសម្រុកបង្កបង្កើនដំណាំស្រូវរដូវវស្សាបន្ទាប់ពីមានភ្លៀងធ្លាក់ជោគជាំ។ ការបង្កបង្កើន​ផលដំណាំស្រូវរដូវវស្សាសម្រេចបាន ៣១ ៧២៥ហិកតា ស្មើនឹង ៤១,៣៧% នៃផែនការ ៧៦ ៦៩០ហិកតា បើធៀបនឹងឆ្នាំ២០២៣ យឺតជាង ១១ ២៣៥ហិកតា ទាំង៧ស្រុក/ក្រុងនៃខេត្តត្បូងឃ្មុំ។ ការបង្កបង្កើនផលស្រូវឆ្នាំ២០២៤នេះ យឺតជាងឆ្នាំទៅដោយសារអាកាសធាតុមិនអំណោយផល។

លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានបញ្ជាក់ឲ្យដឹងថា បើគិតត្រឹមថ្ងៃទី២៩ ខែឧសភា ឆ្នាំ២០២៤នេះ ការបង្កបង្កើនផលស្រូវរដូវវស្សា ប្រជាកសិករនៅក្នុងខេត្តត្បូងឃ្មុំ បានសម្រុកចុះភ្ជួររាស់ដីស្រែដើម្បីសាបព្រួសបង្កបង្កើនផលស្រូវរដូវវស្សា ក្នុងនោះសម្រេចបានលទ្ធផលដូចខាងលើ ហើយស្រុកដែលដាំដុះច្រើនជាងគេ គឺស្រុកក្រូចឆ្មារ ដែលមានផ្ទៃដីដាំដុះស្រូវវស្សាប្រមាណ ៦ ២៣៥ហិកតា។

លោកប្រធានមន្ទីរបានបញ្ជាក់ឲ្យដឹងទៀតថា ឆ្នាំនេះប្រជាកសិករផលិតការដាំដុះស្រូវស្រាល(ពូជស្រូវស្រាលរួមមាន ពូជស្រូវOM៥៤៥១ និងសែនពិដោរ) កណ្តាល(ពូជស្រូវកណ្តាលរួមមាន ពូជស្រូវផ្ការំដួល និងពូជស្រូវប្រពៃណី) និងស្រូវធ្ងន់(ពូជស្រូវធ្ងន់រួមមាន ពូជស្រូវរាំងជ័យ ពូជស្រូវខា៨ ខា៩ និងពូជស្រូវប្រពៃណី)។ ស្រូវធ្ងន់កសិករដាំដុះច្រើនជាងគេ៕

អត្ថបទ៖ សាន វិឡែម