ឧត្តមសេនីយ៍ឯក ហ៊ុន ម៉ានិត ប្រាប់ឱ្យចាត់ទុកគ្រឿងញៀន ជាខ្មាំងផ្ទៃក្នុង ដែលត្រូវរួមគ្នាកម្ទេច

នៅចំពោះកងកម្លាំងប្រដាប់អាវុធនៃទិសយោធភូមិទី៤ ខេត្តសៀមរាប មេបញ្ជាការរងកងទ័ពជើងគោក ឧត្តមសេនីយ៍ឯក ហ៊ុន ម៉ានិត បានប្រាប់ឱ្យកម្លាំងប្រដាប់អាវុធទាំងអស់ចាត់ទុកគ្រឿងញៀន ជាខ្មាំងផ្ទៃក្នុង ដែលត្រូវរួមគ្នាកម្ទេចចោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧត្តមសេនីយ៍ឯក ហ៊ុន ម៉ានិត បានថ្លែងថា៖ «កងកម្លាំងប្រដាប់អាវុធ ត្រូវចាត់ទុកគ្រឿងញៀន គឺជាខ្មាំងផ្ទៃក្នុងរបស់យើង ដែលត្រូវដាច់ខាតរួមគ្នាកម្ទេច និងកម្ចាត់ខ្មាំងមួយនេះចេញពីសង្គមជាតិយើង»។ ឧត្តមសេនីយ៍ឯក សង្កត់ធ្ងន់ថា ក្នុងនាមជាកងកម្លាំងម្នាក់ ត្រូវមានស្មារតីការពារជាតិ ថែរក្សាសុខសន្តិភាព និងសុវត្ថិភាពប្រជាជនជាប់ជានិច្ច ហើយដាច់ខាតត្រូវប្រឆាំងជាមួយនឹងគ្រឿងញៀន កុំពាក់ព័ន្ធឱ្យសោះជាមួយគ្រឿងញៀន។

ការលើកឡើងរបស់ឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក និងជាអគ្គនាយកនៃអគ្គនាយកដ្ឋានស្រាវជ្រាវចារកិច្ច ក្រសួងការពារជាតិ នាពេលនេះ ជាសារក្រើនរម្លឹកដល់កងកម្លាំងប្រដាប់អាវុធគ្រប់ប្រភេទ ឱ្យចូលរួមអនុវត្តឱ្យបានខ្ជាប់ខ្ជួននូវបទបញ្ជារបស់ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត ពាក់ព័ន្ធនឹងការប្រយុទ្ធប្រឆាំងនឹងគ្រឿងញៀន។

ជាកត់សម្គាល់ ដូចអាណត្តិមុនៗសម្រាប់អាណត្តិទី៧នេះ រាជរដ្ឋាភិបាលកម្ពុជា ក្រោមការដឹកនាំរបស់សម្ដេចធិបតី បានបន្តចាត់ទុកការប្រយុទ្ធប្រឆាំងគ្រឿងញៀនខុសច្បាប់ ជាអាទិភាពដ៏សំខាន់ក្នុងនយោបាយរបស់ខ្លួន។ សម្ដេចធិបតី បានប្រកាសដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ ទាំងមន្ត្រីរាជការស៊ីវិល និងទាំងមន្ត្រីប្រដាប់អាវុធ បើក្នុងករណីរកឃើញថា ពាក់ព័ន្ធនឹងគ្រឿងញៀន ត្រូវចាត់វិធានការបញ្ចប់មុខតំណែង និងបណ្តេញចេញពីក្របខ័ណ្ឌ ដោយគ្មានការលើកលែង។

ប្រសាសន៍លើកឡើងខាងលើរបស់ឧត្តមសេនីយ៍ឯក ហ៊ុន ម៉ានិត បានធ្វើឡើងក្នុងឱកាសជួបសំណេះសំណាល និងចែកអាវភ្លៀង ដែលជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រគល់ជូនដល់កងកម្លាំងប្រដាប់អាវុធ ទិសយោធភូមិទី៤ នៅបញ្ជាការដ្ឋានយោធភូមិភាគទី៤ ខេត្តសៀមរាប នាព្រឹកថ្ងៃទី១៨ ខែមិថុនា ឆ្នាំ២០២៤៕