ព័ត៌មានជាតិ

អាជ្ញាធរសង្កាត់បឹងទំពន់ទី ២ អំពាវនាវពលរដ្ឋគ្រប់អាយុ មកចុះឈ្មោះបោះឆ្នោត និងពិនិត្យកែសម្រួលឈ្មោះ

បានផុស

២ years មុន

នៅ

ថ្ងៃចន្ទ ៩ កញ្ញា ២០២៤

ដោយ

នៅតែរយៈពេល ១ សប្ដាហ៍ ទៀតប៉ុណ្ណោះ ថ្ងៃចុះឈ្មោះបោះឆ្នោតប្រចាំឆ្នាំ អាជ្ញាធរតាមមូលដ្ឋាន បានបន្តយកចិត្តទុកដាក់ក្នុងការទទួលប្រជាពលរដ្ឋដែលមកពិនិត្យកែតម្រូវ ឬ ចុះឈ្មោះជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ុម ហ៊ុយឈុនហេង ចៅសង្កាត់បឹងទំពន់ទី ២ ដែលជាសង្កាត់ ១ ចំណោមសង្កាត់ទាំង ៧ ក្នុងខណ្ឌមានជ័យ បានឱ្យដឹងថា ក្រុមការងារ នៃរដ្ឋបាលសង្កាត់ បានយកចិត្តទុកដាក់ណាស់ ក្នុងការបំពេញការងារជូនប្រជាពលរដ្ឋលើកិច្ចការងារចុះឈ្មោះ ពិនិត្យឈ្មោះ និងកែតម្រូវឈ្មោះ សម្រាប់ការត្រៀមបោះឆ្នោត ទាំងការបោះឆ្នោតជ្រើសតាំងក្រុមប្រឹក្សាឃុំ-សង្កាត់ និងការបោះឆ្នោតសកល។

លោកចៅសង្កាត់ បន្ថែមថា ការចុះឈ្មោះបោះឆ្នោត គឺជារឿងសំខាន់សម្រាប់ប្រជាពលរដ្ឋម្នាក់ៗ ដែលមានសិទ្ធិគ្រប់គ្រាន់ក្នុងការបោះឆ្នោតជ្រើសរើសថ្នាក់ដឹកនាំ បន្តបម្រើ និងដឹកនាំប្រទេសទៅរកមាគ៌ាអភិវឌ្ឍន៍ជាបន្តបន្ទាប់។

លោកបានបញ្ជាក់ថា ប្រជាពលរដ្ឋដែលមានថ្ងៃកំណើតកើត ចាប់ពីថ្ងៃទី ១ ខែធ្នូ ឆ្នាំ ២០០៦ គឺគ្រប់អាយុអាចចុះឈ្មោះបោះឆ្នោតបាន។

សូមបញ្ជាក់ថា ការពិនិត្យកែតម្រូវ និងចុះឈ្មោះបោះឆ្នោតនេះ បានធ្វើឡើងតាំងពីថ្ងៃទី ១ ខែកញ្ញា ហើយក៏បិទបញ្ចប់នៅថ្ងៃទី ១៦ ខែកញ្ញា ឆ្នាំ ២០២៤ ខាងមុខនេះ។

កិច្ចការងារនេះ អាជ្ញាធរមូលដ្ឋាននៅតាមរដ្ឋបាលឃុំ-សង្កាត់ តែងតែធ្វើជាប្រចាំឆ្នាំ ដើម្បីអាចឱ្យប្រជាពលរដ្ឋទៅពិនិត្យបានជាក់លាក់ពីបញ្ជីឈ្មោះរបស់ខ្លួន និងចុះឈ្មោះឱ្យបានជាស្រេចសម្រាប់ការបោះឆ្នោតបំពេញកាតព្វកិច្ចជាប្រជាពលរដ្ឋល្អក្នុងសង្គមជាតិ៕

អត្ថបទ ៖ សុភា