ព័ត៌មានជាតិ

បិទចរាចរណ៍ក្រោមស្ពានព្រះមុនីវង្សចាស់-ថ្មី ២០ ថ្ងៃ ដើម្បីជួសជុល

បានផុស

២ years មុន

នៅ

ថ្ងៃអង្គារ ៨ តុលា ២០២៤

ដោយ

មន្ត្រីអាជ្ញាធរ បាននិយាយថា ផ្លូវបេតុងក្រោមស្ពានព្រះមុនីវង្សចាស់ ថ្មី ក្នុងសង្កាត់ច្បារអំពៅទី ១ និងសង្កាត់ច្បារអំពៅទី ២ ខណ្ឌច្បារអំពៅ រាជធានីភ្នំពេញ ត្រូវបានផ្អាកការធ្វើចរាចរណ៍ចំនួន ២០ ថ្ងៃ គិតត្រឹមថ្ងៃទី ៨ ខែតុលា នេះទៅ ដើម្បីទុកពេលឲ្យមន្ត្រីបច្ចេកទេសធ្វើការជួសជុលបាតស្ពាន និងជើងទម្របំពង់ទឹកស្អាត ពិសេសខ្សែកាបអគ្គិសនី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ សុផល មន្ត្រីសង្កាត់ច្បារអំពៅទី ១ ដែលប្រចាំការយាមការពារក្រោមស្ពានព្រះមុនីវង្សថ្មី បានឲ្យដឹងថា ចាប់ពីថ្ងៃទី ៨ ខែតុលា នេះទៅ ផ្លូវបេតុងក្រោមស្ពាន គល់ស្ពានទាំង ២ (ព្រះមុនីវង្ស ចាស់ និងថ្មី) ត្រូវបានបិទបារ៉ាស់ផ្អាកការធ្វើចរាចរណ៍ដោយសារមន្ត្រីបច្ចេកទេសកំពុងធ្វើការជួសជុលជើងទម្របំពង់ទឹកស្អាត និងជើងទម្រខ្សែកាបក្រោមស្ពាន រួមទាំងបាតស្ពានដែលប្រេះស៊ីម៉ងត៍ទៀតផង។

លោក គង់ សុផល បានបញ្ជាក់ថា ដោយសារតែជើងទម្របំពង់ទឹកស្អាត និងខ្សែកាប ត្រូវបានកាត់ផ្តាច់ពីបាតស្ពានធ្វើឲ្យញ័ររំជួយពេលរថយន្តធំៗ បើកកាត់លើស្ពាន ព្រោះពុំមានជើងទម្រដែលទ្របំពង់ទឹកស្អាត និងខ្សែកាប។

លោកបានបញ្ជាក់ថា ករណីបែកស៊ីម៉ងត៍ជើងទម្របំពង់ទឹកស្អាតនេះ ដោយសាររថយន្តដឹកទឹកសុទ្ធបើកប៉ះដំបូលរថយន្ត ខណៈនោះលោកបានឃាត់រថយន្តបង្កបាន និងផ្នែកជំនាញធ្វើការដោះស្រាយ។ ករណីនេះបានកើតឡើងតាំងពីដើមឆ្នាំ ២០២៤ មកម្ល៉េះ៕

អត្ថបទ ៖ នរា