សម្តេចធិបតី៖ យុវជនកាកបាទក្រហម ត្រូវមានស្មារតីស្នេហាជាតិ និងទទួលខុសត្រូវចំពោះបេសកកម្មរបស់ខ្លួន

នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានលើកឡើងថា យុវជនដែលជាសមាជិកកាកបាទក្រហមកម្ពុជា ត្រូវមានស្មារតីស្នេហាជាតិ និងទទួលខុសត្រូវចំពោះបេសកកម្មរបស់ខ្លួន ក្នុងការចូលរួមជួយប្រជាពលរដ្ឋដែលរងគ្រោះ ដោយគ្មានការរើសអើង។ សម្តេចបានថ្លែងបែបនេះ ក្នុងពិធីសំណេះសំណាល និងបំពាក់កន្សែងយុវជនកាកបាទក្រហមកម្ពុជា មកពីគ្រឹះស្ថានឧត្តមសិក្សា ២៥ ក្នុងរាជធានីភ្នំពេញ នាព្រឹកថ្ងៃទី១៩ ខែតុលា ឆ្នាំ២០២៤។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រមុខរាជរដ្ឋាភិបាល បានលើកឡើងថា ការចូលរួមជាមួយកាកបាទក្រហម គឺត្រូវមានផ្នត់គំនិត និងបេះដូង ដើម្បីជួយជំរុញ និងអនុវត្តការងារមនុស្សធម៌នេះឱ្យបានជាប់ជាប្រចាំ។ លើសពីនេះ ត្រូវមានស្មារតីស្នេហាជាតិ និងជាតិនិយម ប៉ុន្តែមិនជ្រុលនិយមពេក ដែលនាំឱ្យខ្មែរបែកបាកបាក់ ហើយត្រូវមានគំនិតវិជ្ជមាន និងគិតគូរឱ្យបានច្បាស់លាស់។ ត្រង់ចំណុចនេះ សម្តេចចង់បញ្ជាក់ថា «ការគិតវិជ្ជមាននេះហើយ ដែលធ្វើឱ្យយើងស្ម័គ្រចិត្តចូលតាមកាកបាទក្រហម ដើម្បីរួមគ្នាជួយប្រជាពរដ្ឋឱ្យរឹងមាំ ក្នុងពេលដែលគាត់លំបាក»។ ដូច្នេះសមាជិកកាកបាទក្រហម ត្រូវមានគំនិតវិជ្ជមាន និងចូលរួមសកម្មភាពមនុស្សធម៌មួយនេះឱ្យបានសកម្ម ដើម្បីជាប្រយោជន៍ទាំងអស់គ្នា។

បន្ថែមពីនេះ ត្រូវរួមគ្នាពង្រឹងខ្លួនឯង កសាង និងអភិវឌ្ឍន៍សមត្ថភាពរបស់ខ្លួនឯង ដើម្បីចូលរួមថែរក្សា សាមគ្គីឯកភាពជាតិ កុំឱ្យបាត់បង់ទឹកដី កុំឱ្យបាត់បង់វប្បធម៌ សិល្បៈ ដោយត្រូវរួមគ្នាផ្សព្វផ្សាយ គាំទ្រនូវសម្បត្តិវប្បធម៌ជាតិកុំដែលមាន។ នេះជាការគូសបញ្ជាក់របស់សម្តេចធិបតី។

សម្តេចបន្តថា តម្លៃពិតប្រាកដនៃសមាជិកកាកបាទក្រហមកម្ពុជា គឺជាការចូលរួមដោយស្ម័គ្រចិត្ត ក្នុងការជួយសង្គ្រោះពលរដ្ឋរងគ្រោះ ដោយគ្មានការរើសអើង ហើយប្រជាពលរដ្ឋជាអ្នកវាយតម្លៃដ៏សំខាន់ ចំពោះបេសកកម្មមនុស្សធម៌មួយនេះ៕

ដោយ៖ គេន ម៉ាលិះ