អភិបាលរងខេត្តកោះកុង ស្នើឲ្យបន្តស្រាវជ្រាវពីជនជាតិដើមភាគតិចបន្ថែម ដើម្បីជាតឹកតាងក្នុងសហគមន៍

អភិបាលរងខេត្តកោះកុង ស្នើដល់ប្រជាពលរដ្ឋសហគមន៍ជនជាតិដើមភាគតិចនៅតំបន់ដាច់ស្រយោលក្នុងភូមិសាស្រ្តបន្តស្រាវជ្រាវ និងចងក្រងជាសហគមន៍បន្ថែមទៀត ដើម្បីទុកជាតឹកតាងថែរក្សាទៅអនាគត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការស្នើឡើងរបស់លោកស្រី អ៊ី នារីនេត អភិបាលរងខេត្តកោះកុង ក្នុងប្រកាសទទួលស្គាល់អំពីអត្តសញ្ញាណ​សហគមន៍ជនជាតិដើមភាគតិច ជង ស្ថិតឃុំជំនាប់ និងឃុំប្រឡាយ ស្រុកថ្មបាំង។ លោកស្រីអភិបាលរងខេត្ត បានរំលេចទៀតថា ការបន្តចងក្រងពីឯកសណ្ឋាន របាំងប្រពៃណី វប្បធម៌ អាហារ ឬលំនៅដ្ឋានរបស់ជនជាតិដើមភាគតិចដ៏ទៃបន្ថែមទៀត ពិតជាមានសារៈសំខាន់ ដើម្បីគ្រប់គ្រងសម្គាល់ពីអត្តសញ្ញាណជនជាតិដើមភាគតិចនីមួយៗបានត្រឹមត្រូវ។

លោកស្រី អ៊ី នារីនេត ក៏សំណូមពរដល់ក្រសួងអភិវឌ្ឍន៍ជនបទ និងអង្គការដៃគូនានា មេត្តាជួយគាំទ្រឧបត្តម្ភដល់ប្រជាពលរដ្ឋជនជាតិដើមភាគតិចចំពោះតម្រូវការចង់បានរបស់ពួកគាត់ សំដៅធ្វើយ៉ាងណាកុំឱ្យបាត់បង់ ជួយលើកកម្ពស់ជីវភាព និងភាពសុខុដុមរនាមកម្មរស់នៅក្នុងសហគមន៍ជនបទ។

ទោះយ៉ាងណា លោកស្រីអភិបាលរងខេត្តកោះកុង អះអាងនៅថ្ងៃទី១១ ខែវិច្ឆិកា ឆ្នាំ២០២៣ ថា រាជរដ្ឋាភិបាលកម្ពុជា បាននិងកំពុងយកចិត្តទុកដាក់ខ្ពស់លើជនជាតិដើមភាគតិច តាមរយៈការដាក់ចេញនូវសៀវភៅគោលនយោបាយជាតិស្តីពីការអភិវឌ្ឍន៍ជនជាតិដើមភាគតិច សារចរណែនាំ និងវិធីសាស្រ្តអនុវត្តគោលនយោបាយនានា និងការកំណត់អត្តសញ្ញាណសហគមន៍ជនជាតិដើមភាគតិច។

គួរជម្រាបថា នៅខេត្តកោះកុង មានប្រជាពលរដ្ឋចំនួន ៣៥.៩២៤គ្រួសារ ស្រ្តី៧៧.២៣៨នាក់ ដោយមានប្រជាពលរដ្ឋចម្រុះជាតិសាសន៍ ដូចជា ខ្មែរ ចិន ថៃ ឥស្លាម និងវៀតណាម។ សព្វថ្ងៃ ពួកគេមានមុខរបរសំខាន់រួមមាន ធ្វើពាណិជ្ជកម្ម នេសាទ ធ្វើស្រែចម្ការ រកអនុផលព្រៃឈើ កម្មកររោងចក្រ សំណង់ និងផ្តល់សេវាកម្មនានា៕

អត្តបទ៖ សិរីវឌ្ឍនៈ