លោកបណ្ឌិត សុខ ទូច ទទួលបាន«ពានរង្វាន់ពន្លឺនៃវិទ្យាស្ថានខុងជឺ» ប្រគល់ជូនដោយអនុប្រធានាធិបតីចិន

ប្រធានរាជបណ្ឌិត្យសភាកម្ពុជា លោកបណ្ឌិត សុខ​ ទូច ត្រូវបានជ្រើសរើសឱ្យទទួល«ពានរង្វាន់ពន្លឺនៃវិទ្យាស្ថានខុងជឺ»។ ការប្រគល់ជូនពានរង្វាន់នេះ ត្រូវបានធ្វើឡើងនៅក្នុងមហាសន្និបាតកាលពីថ្ងៃទី១៦ ខែវិច្ឆិកា ឆ្នាំ២០២៤ មានការចូលរួមក្រោមអធិបតីភាពពីលោក Han Zheng អនុប្រធានាធិបតីចិន តំណាងក្រសួងអប់រំ វិទ្យាស្ថានខុងជឺ និងគ្រឹះស្ថានអប់រំភាសាចិនតាមបណ្តាប្រទេស១៦០លើទូទាំងសកលលោក ប្រមាណ១២០០ស្ថាប័ន/គ្រឹះស្ថាន សរុបជាង២០០០នាក់។ 

មហាសន្និបាតភាសាចិនពិភពលោកនេះ ត្រូវបានរៀបចំឡើងដោយមជ្ឈមណ្ឌលកិច្ចសហប្រតិបត្តិការ និងផ្លាស់ប្តូរភាសាចិន-បរទេសនៃក្រសួងអប់រំចិន មូលនិធិអប់រំភាសាចិនអន្តរជាតិ និងសមាគមអន្តរជាតិសម្រាប់ការបង្រៀនភាសាចិន។លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា និងក្នុងនាមជាសហប្រធានក្រុមប្រឹក្សាភិបាលវិទ្យាស្ថានខុងជឺនៃរាជ​បណ្ឌិត្យសភាកម្ពុជា បានឡើងទទួល«ពានរង្វាន់ពន្លឺនៃវិទ្យាស្ថានខុងជឺ» នៅចំពោះមុខអ្នកចូលរួមប្រមាណជាង២ពាន់នាក់មកពី១៦០ប្រទេសនៅលើពិភពលោក។

វិទ្យាស្ថានខុងជឺនៃរាជបណ្ឌិត្យសភាកម្ពុជា បានចាត់ទុកថា នេះ មិនមែនត្រឹមតែជាកិត្តិយសសម្រាប់វិទ្យាស្ថានតែប៉ុណ្ណោះទេ ពោល គឺសម្រាប់ប្រទេសកម្ពុជាទាំងមូលផងដែរ ពីព្រោះវិទ្យាស្ថាន គឺជាគ្រឹះស្ថានអប់រំភាសាចិនតែមួយគត់នៅក្នុងប្រទេសកម្ពុជា និងក្នុងចំណោមគ្រឹះស្ថានអប់រំភាសាចិនចំនួន៣៤ផ្សេងទៀតលើទូទាំងពិភពលោក ដែលទទួលបានពានរង្វាន់មួយនេះ។សម្រាប់វិទ្យាស្ថានខុងជឺនៃរាជបណ្ឌិត្យសភាកម្ពុជា គឺនេះ ក៏សបញ្ជាក់ឱ្យឃើញថា វិទ្យាស្ថានខុងជឺនៃរាជបណ្ឌិត្យសភាកម្ពុជាដែលមានការត្រួសត្រាយចង្អុលបង្ហាញផ្លូវពីលោកបណ្ឌិតសភាចារ្យ សុខ ទូច  ព្រមទាំង មានការចូលរួមចំណែកពីលោកគ្រូ អ្នកគ្រូ ក្រុមការងារ និងការគាំទ្រពីភាគីពាក់ព័ន្ធ វិទ្យាស្ថានបានខិតខំរួមចំណែកយ៉ាងច្រើនលើការបណ្តុះបណ្តាលធនធានភាសាចិន ការផ្លាស់ប្តូរវប្បធម៌ និងការរឹតចំណងមិត្តភាពកម្ពុជា-ចិន រហូតទទួលបានកិត្តិយសមួយនេះ៕