ព័ត៌មានជាតិ

ស្ពានខ្ពស់ជាងគេតាមផ្លូវជាតិលេខ ១០ សម្រេចបាន ៩៣% គ្រោងដាក់ឱ្យប្រើប្រាស់សាកល្បងនៅចុងខែមីនានេះ

បានផុស

១ year មុន

នៅ

ថ្ងៃអង្គារ ២១ មករា ២០២៥

ដោយ

គម្រោងស្ថាបនាផ្លូវជាតិលេខ ១០ ពីខេត្តបាត់ដំបងដល់ទីរួមខេត្តកោះកុងសម្រេចបាន ៩៦,១៦% ខណៈដែលស្ពានខ្ពស់ជាងគេកម្ពស់ ៧៥ ម៉ែត្រ សាងសង់នៅតាមបណ្តោយផ្លូវជាតិថ្មីនេះ ក៏សម្រេចបាន ៩៣% ហើយគ្រោងដាក់ឲ្យប្រើប្រាស់បណ្តោះអាសន្ននៅចុងខែមីនា ឆ្នាំ ២០២៥។

ផ្លូវជាតិលេខ១០ មានប្រវែងសរុប ១៩៨,៥១គ.ម (PK000+000 – PK198+518) ចាប់ពីផ្លូវជាតិលេខ 57-7 ត្រង់ PK35+900 ស្ថិតក្នុងភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង ឆ្លងកាត់ឃុំប្រម៉ោយ ស្រុកវាលវែង ខេត្តពោធិ៍សាត់ រហូតដល់ផ្លូវជាតិលេខ ៤៨ (ចាស់) ត្រង់ PK1+700 ស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង គិតត្រឹមថ្ងៃទី២០ ខែមករា ឆ្នាំ២០២៥ ការអនុវត្តគម្រោងសម្រេចបានលទ្ធផលជារួម ៩៦,១៦%។ នេះបើតាមមន្រ្តីក្រសួងសាធារណការនិងដឹកជញ្ជូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវជាតិលេខ១០ បច្ចុប្បន្នអាចឲ្យប្រជាពលរដ្ឋធ្វើដំណើរបាន តែត្រូវមានការប្រុងប្រយ័ត្នដោយសារកំណាត់ផ្លូវខ្លះនៅជាក្រួសក្រហម មានសភាពហុយ ពិបាកក្នុងការមើលផ្លូវ។

មន្រ្តីក្រសួងសាធារណការបានបង្ហាញពីស្ថានភាពផ្លូវជាតិលេខ ១០ ដែលកំពុងស្ថាបនាដោយវឌ្ឍនភាពកន្លែងខ្លះបានចាក់កៅស៊ូរួចរាល់ និងកន្លែងខ្លះកំពុងក្រាលថ្មឈានទៅចាក់កៅស៊ូ រួមសំណង់ស្ពានខ្ពស់ជាងគេដែលនឹងឈានទៅសាងសង់បញ្ចប់ក្នុងពេលឆាប់ៗនេះ។

ស្ថានភាពនៃការសាងសង់កំណាត់ផ្លូវនេះគឺ ពី PK0 (សំឡូត)-PK60 (ក្រពើពីរ) បានក្រាលកៅស៊ូ DBST រួចរាល់ ,ពី PK 60-PK 85 នៅក្រួសក្រហម និងកំពុងចាក់ថ្មធ្វើស្រទាប់គ្រឹះបាញ់កៅស៊ូ, ពីPK 85-PK112 (អូរសោម) បានក្រាលកៅស៊ូ DBST រួចរាល់, ពីPK 112 -PK 175 កំពុងបាញ់កៅស៊ូ DBST( បញ្ជាក់ ពី PK 122 ដល់ PK129 ប្រើប្រាស់ផ្លូវចាស់ដែលជាផ្លូវក្រួសក្រហមវាងស្ពានខ្ពស់) និងពី PK 175-PK 198 (កោះកុង) ក្រាលកៅស៊ូ DBST រួចរាល់។

ផ្លូវជាតិលេខ១០ សាងសង់ជាប្រភេទផ្លូវ Grade III ក្រាលកៅស៊ូពីរស្រទាប់ (DBST) មានប្រវែងផ្លូវសរុប ១៩៨,៥១ គីឡូម៉ែត្រ និងទទឹង ៩ ម៉ែត្រ។ គម្រោងសាងសង់ផ្លូវនេះមានរយៈពេល ៦៦ ខែ ដោយបានចាប់ផ្ដើមសាងសង់កាលពីថ្ងៃទី១៨ ខែធ្នូ ឆ្នាំ២០១៩ ហើយគ្រោងនឹងបញ្ចប់នាខែមិថុនា ឆ្នាំ២០២៥ ខាងមុខនេះ៕