ចូលដល់វ័យ៧៥ឆ្នាំហើយ Liu Xiaoqing ថា មិនស្គាល់ឬបានជួបឪពុកបង្កើតជានរណាទេ

ក្នុង​ការ​ផ្សាយ​ផ្ទាល់​កាលពី​ថ្ងៃ​ទី ២២ ខែ​មករា តារាសម្ដែង Liu Xiaoqing បាន​លាត​ត្រដាង​ថា នាង​មិន​ដឹង​ថា​ឪពុក​ជា​នរណា តាំងពីដើមមកនាងយក​នាម​ត្រកូល​របស់​ម្ដាយ និងត្រូវបានចិញ្ចឹមក្រោមការប្រៀនប្រដៅដ៏តឹងរ៉ឹងម្ដាយតែប៉ុណ្ណោះ។​

តារាសម្ដែងចិនរូបនេះបានពន្យល់ថា នៅពេលកើតមក គ្រួសាររបស់នាងមិនបានផ្តល់អាទិភាពលើការចុះឈ្មោះកំណើតរបស់នាងទេ ដែលបណ្តាលឲ្យមានរបាយការណ៍ផ្ទុយគ្នាអំពីអាយុពិតប្រាកដ។ ក្នុងវ័យកុមារភាព Liu Xiaoqing បានអះអាងជាសាធារណៈថា នាងកើតនៅឆ្នាំ ១៩៥៥ ក្រោយមកបានកែប្រែវាទៅជាឆ្នាំ ១៩៥២ ហើយឯកសារបច្ចុប្បន្នរបស់នាងបានចុះបញ្ជីឆ្នាំ ១៩៥០ ជាឆ្នាំកំណើតរបស់នាង ដែលធ្វើឲ្យនាងមានអាយុ ៧៥ឆ្នាំ។

តារាស្រីវ័យ៧៥ឆ្នាំ បាននិយាយថា នាងទទួលយកឆ្នាំ ១៩៥០ ជាឆ្នាំកំណើតរបស់នាង ព្រោះមានអារម្មណ៍ថា បុគ្គលិកលក្ខណៈរបស់នាង ស្របនឹងចរិតរបស់អ្នកដែលកើតក្នុងឆ្នាំខ្លា។ ទន្ទឹមគ្នានោះដែរតារាចិនបានពិពណ៌នាអំពីវិន័យរបស់ម្តាយថាតឹងរ៉ឹង ចំណែកជីដូនគឺទន់ភ្លន់ និងយកចិត្តទុកដាក់ចំពោះនាងយ៉ាងល្អិតល្អន់។

Liu Xiaoqing ក៏បាន​ចែក​រំលែក​ថា ម្ដាយ​របស់​នាង​រៀបការ​ម្ដង​ទៀត ហើយ​ឪពុក​ចុងបាន​ប្រព្រឹត្ត​ចំពោះ​គ្រួសារ​យ៉ាង​ល្អ​ពិសេស។ នាងបានរៀបរាប់ថា គាត់ជាមនុស្សសុភាពបំផុតដែលនាងធ្លាប់ជួប ដោយកត់សម្គាល់ថាមិនថាស្ថិតក្នុងស្ថានភាពបែបណាក៏ដោយ គាត់នៅតែមានសុទិដ្ឋិនិយម និងផ្តល់អាទិភាពដល់អ្នកដទៃជាងខ្លួនគាត់។

យ៉ាងណាមិញ Liu Xiaoqing គឺជាតួឯកដ៏ល្បីនៅក្នុងភាពយន្តចិន ដែលត្រូវបានគេស្គាល់ថាជាតួឯករបស់នាងនៅក្នុងរឿង “Wu Zetian” “Huoshao Efang Gong” “Huo Fenghuang” “Hibiscus Town” និង “A Dream of Red Mansions” ។​ នៅកម្ពស់នៃអាជីពរបស់ខ្លួនក្នុងឆ្នាំ ២០០២ តារាស្រីបានប្រឈមមុខនឹងការស៊ើបអង្កេតសម្រាប់ការរំលោភច្បាប់អាជីវកម្ម និងការគេចពន្ធ ដែលនាំឲ្យជាប់គុក ៤៤២ ថ្ងៃ។ ថ្វីដ្បិតតែមានការខ្វះខាតក៏ដោយ ក៏នាងបានសាងអាជីពឡើងវិញបន្តិចម្តងៗ ដោយបង្ហាញពីទេពកោសល្យផ្ទាល់ខ្លួនទាំងក្នុងវិស័យភាពយន្ត និងទូរទស្សន៍។ ក្រោយមកនាងនៅតែសកម្មក្នុងឧស្សាហកម្មនេះ ចូលរួមព្រឹត្តិការណ៍នានាជាប្រចាំ និងទទួលយកគម្រោងសម្ដែងថ្មីៗ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖Zhao Lusi បង្ហាញមុខជាថ្មី ក្រោយសំងំព្យាបាលជំងឺធ្លាក់ទឹកចិត្តជិត១ខែ