ព័ត៌មានជាតិ

រដ្ឋមន្ត្រីធនធានទឹក ជំរុញអាជ្ញាធរឃុំប្រើប្រាស់ថវិកាឃុំប្រចាំឆ្នាំស្តារ និងធ្វើប្រឡាយតូចៗសម្រាប់ទាញទឹកធ្វើកសិកម្ម

បានផុស

១ year មុន

នៅ

ថ្ងៃអង្គារ ៤ កុម្ភៈ ២០២៥

ដោយ

ក្នុងឱកាសចុះជួបសំណេះសំណាលជាមួយប្រជាកសិករ នៅស្រុកបាណន់ ខេត្តបាត់ដំបង លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានមានប្រសាសន៍ថា ការប្រើប្រាស់ទឹកគឺមានសារៈសំខាន់ណាស់ ហើយបើសិនជាកសិករបានចងក្រងជាសហគមន៍ នឹងងាយស្រួលក្នុងការគ្រប់គ្រងថែទាំប្រភពទឹកបានល្អ ខណៈក្រសួងក៏បានបង្កើតប្រព័ន្ធធារាសាស្ត្ររួចរាល់ហើយក្នុងការជួយសង្គ្រោះរួមគ្នា។

ជាមួយគ្នានេះ លោករដ្ឋមន្ត្រីក៏ជំរុញអាជ្ញាធរឃុំប្រើប្រាស់ថវិកាឃុំប្រចាំឆ្នាំស្តារ និងធ្វើប្រឡាយតូចៗសម្រាប់ទាញទឹកធ្វើកសិកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសជួបសំណេះសំណាលជាមួយប្រជាកសិករ នៅស្រុកបាណន់ ដែលអមដំណើរដោយលោក សុខ លូ អភិបាលខេត្ត រួមនិងមន្ត្រីពាក់ព័ន្ធមួយចំនួនទៀត លោក ថោ ជេដ្ឋា បានណែនាំដល់ប្រជាកសិករឲ្យនាំគ្នាចងក្រងជាសហគមន៍ក្នុងការប្រើប្រាស់ទឹកឲ្យបានត្រឹមត្រូវ។ បន្ថែមពីនេះ លោកក៏បានជំរុញដល់អាជ្ញាធរឃុំអាចប្រើប្រាស់ថវិកាឃុំប្រចាំឆ្នាំក្នុងការស្តារ និងធ្វើប្រឡាយតូចៗបន្ថែមទៀត ខណៈក្រសួងធនធានទឹក បានធ្វើអាងស្តុកទឹក និងប្រឡាយទឹកធំៗ ជូនរួចរាល់ ដើម្បីបង្កើនដល់ជីវភាពរបស់ពលរដ្ឋតាមរយៈផលដំណាំកសិកម្មនេះ។

ខណៈការងារបង្កបង្កើនផលដំណាំស្រូវប្រាំងរបស់ប្រជាកសិករ នៅឆ្នាំ២០២៤-២០២៥ មានទំហំធំលើសពីផែនការបង្កបង្កើនផលស្រូវប្រាំងឆ្នាំ២០២៤-២០២៥ រហូតដល់ជាង ៣០០ភាគរយ។ ក្នុងផែនការមាន ២៧ ០០០ហិតា ហើយការអនុវត្តជាក់ស្ដែងលើផ្ទៃដីរហូតដល់ ៨៦ ១១៥ ហិតា ដែលចំនួននេះ ខាងក្រសួងធនធានទឹក មានក្តីបារម្ភ និងយកចិត្តទុកដាក់បំផុតក្នុងការកង្វះខាតទឹក។

លោកស្រី កឹម គឹមអាន ជាមេឃុំស្នឹងបានឲ្យដឹងថា នៅក្នុងឃុំស្នឹងប្រជាពលរដ្ឋធ្វើស្រែប្រាំងលើផ្ទៃដីសរុប ១ ៧៩៨,៦ ហិតា ក្នុងនោះមានតែ ៣ ហិតា ប៉ុណ្ណោះ មិនអាចផ្តល់ទឹកសង្គ្រោះបាន ដោយសារនៅឆ្ងាយពីប្រភពពេក ក្រៅពីនេះសង្គ្រោះបានទាំងអស់ មិនប្រឈមការខូចខាតនោះទេ៕

អត្ថបទ៖ សៅ សារិទ្ធ