ព័ត៌មានជាតិ
មន្ត្រីជាន់ខ្ពស់អេដស៍ ណែនាំយុវវ័យកុំឆាប់ប្រឡូករឿងស្នេហា ត្រូវផ្ដោតលើការសិក្សាដើម្បីអនាគតល្អប្រសើរ
នៅក្នុងឱកាសទិវា នៃក្តីស្រលាញ់ ១៤ កុម្ភៈ មន្ត្រីជាន់ខ្ពស់ នៃអាជ្ញាធរជាតិប្រយុទ្ធនឹងជំងឺអេដស៍ បានណែនាំដល់យុវវ័យ កុំឆាប់ប្រឡូកក្នុងរឿងស្នេហា ត្រូវផ្តោតសំខាន់ទៅលើការសិក្សា ដើម្បីអនាគតផ្ទាល់ខ្លួន គ្រួសារ និងប្រទេសជាតិ។

លោកបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍ បានមានប្រសាសន៍នៅរសៀលថ្ងៃទី ១៣ កុម្ភៈ នេះថា «ខ្ញុំសូមយកឱកាសដ៏មានតម្លៃនេះ សំណូមពរដល់យុវវ័យយើង ត្រូវខិតខំសិក្សារៀនសូត្រឱ្យមានចំណេះដឹង និងជំនាញខ្ពង់ខ្ពស់សម្រាប់អនាគតផ្ទាល់ខ្លួន សម្រាប់គ្រួសារ និងសម្រាប់ប្រទេសជាតិ សូមកុំឆាប់ប្រឡូកក្នុងរឿងស្នេហា និងត្រូវសិក្សាស្វែងយល់ពីបញ្ហាសុខភាព ជាពិសេសសុខភាពបន្តពូជ ដើម្បីបង្ការខ្លួនពីជំងឺផ្សេងៗ ជាពិសេសជំងឺអេដស៍ និងកាមរោគ»។

ជាមួយគ្នានេះ លោកអគ្គលេខាធិការ បានអំពាវនាវសូមកុំមានការរើសអើងចំពោះអ្នកផ្ទុកមេរោគអេដស៍ និងប្រជាជនគន្លឹះដែលរួមមាន ក្រុមបុរសរួមភេទជាមួយបុរស ក្រុមបំប្លែងភេទ ក្រុមអ្នកបម្រើក្នុងសេវាកម្សាន្ត និងក្រុមអ្នកប្រើប្រាស់គ្រឿងញៀនជាដើម និងសូមយុវវ័យចៀសឱ្យឆ្ងាយពីគ្រឿងញៀន។

លោកអគ្គលេខាធិការ បានណែនាំទៀតថា ក្នុងករណីដែលមានការប្រព្រឹត្តថ្លោះធ្លោយដោយប្រការណាមួយប្រឈមនឹងការឆ្លងមេរោគអេដស៍ សូមប្រញាប់ប្រញាល់ទៅធ្វើតេស្តដើម្បីឆាប់ទទួលបានការព្យាបាល និងមានសុខភាពល្អ និងសូមចូលរួមបញ្ចប់អេដស៍ តាមរយៈការចូលរួមជួយផ្សព្វផ្សាយបន្តពីការយល់ដឹងអំពីមេរោគអេដស៍ និងជំងឺអេដស៍ដល់មិត្តភ័ក្ដិ និងសហគមន៍។

លោកអគ្គលេខាធិការ បានបន្ថែមថា យោងតាមទិន្នន័យការឆ្លងថ្មី នៃមេរោគអេដស៍ថ្មីនៅឆ្នាំ ២០២៣ មានអ្នកឆ្លងថ្មីចំនួន ១.២០០ ករណី ក្នុងនោះ ៤៣ ភាគរយ ជាយុវវ័យ មានវ័យពី ១៥-២៤ ឆ្នាំ។ ចំណែកការយល់ដឹងទូលំទូលាយអំពីមេរោគអេដស៍ និងជំងឺអេដស៍ក្នុងចំណោមយុវវ័យមានការធ្លាក់ចុះ។ ការណ៍នេះ យើងក៏បាន និងកំពុងធ្វើការអប់រំផ្សព្វផ្សាយជាប់ជាប្រចាំផងដែរ។
លោកអគ្គលេខាធិការ បានបញ្ជាក់ថា សម្រាប់អំឡុងទិវា នៃក្តីស្រឡាញ់ ១៤ កុម្ភៈនេះ អាជ្ញាធរជាតិប្រយុទ្ធនឹងជំងឺអេដស៍ បានសហការជាមួយមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ នៃក្រសួងសុខាភិបាល រួមជាមួយអង្គការដៃគូ នឹងរៀបចំកម្មវិធីផ្សព្វផ្សាយការយល់ដឹងអំពីមេរោគអេដស៍ និងជំងឺអេដស៍ដល់យុវវ័យនៅទីធ្លាកោះនរារាជធានីភ្នំពេញ ក្នុងវិធានការទប់ស្កាត់ការឆ្លងថ្មី នៃមេរោគអេដស៍ ជាពិសេសក្នុងចំណោមយុវវ័យ គឺ «គ្រប់ពេលវេលា និងគ្រប់ទីកន្លែង សូមឱ្យយុវវ័យយកចិត្តទុកដាក់ ប្រយ័ត្នប្រយែង និងការពារខ្លួនកុំឱ្យឆ្លងមេរោគអេដស៍ ព្រោះថាអេដស៍មិនទាន់ចប់នៅឡើយ»។
លោកអគ្គលេខាធិការ ប្រកាសគាំទ្រចំពោះ ក្រសួងអប់រំ យុវជន និងកីឡា ដែលបានចេញសេចក្ដីណែនាំស្ដីពីវិធានការទប់ស្កាត់សកម្មភាពមិនប្រក្រតីក្នុងទិវា នៃក្តីស្រឡាញ់ នៅតាមគ្រឹះស្ថានសិក្សាសាធារណៈ និងឯកជន និងក្រសួងវប្បធម៌ និងវិចិត្រសិល្បៈ និង ចេញសេចក្ដីអំពាវនាវដល់យុវជនឱ្យប្រើប្រាស់ «ថ្ងៃទី ១៤ កុម្ភៈ ឬ ទិវា នៃក្តីស្រឡាញ់» ឱ្យស្របតាមគន្លងប្រពៃណីដ៏ត្រកាលរបស់ខ្មែរ៕
អត្ថបទ ៖ សំអឿន

-
សន្តិសុខសង្គម៤ ថ្ងៃ ago
ស្គាល់អត្តសញ្ញាណអ្នកបើកបររថយន្តបង្កគ្រោះថ្នាក់ស្លាប់មនុស្ស ៤ នាក់ នៅស្រុកស្នួល
-
ព័ត៌មានជាតិ៣ ថ្ងៃ ago
មណ្ឌលគិរី! ជន្លង់ម្រេចរបស់កសិករ ត្រូវបានសមត្ថកិច្ចរឹបអូសដោយពុំមានមូលហេតុ
-
ព័ត៌មានជាតិ១ សប្តាហ៍ ago
បន្ថែមពីថវិកា៧០លានរៀល កុមារី ស៊ុន ស្រីតី ទទួលបានផ្ទះ ដីទំហំជាងកន្លះហិកតា ដែលដាំស្វាយរួចរាល់
-
ព័ត៌មានអន្ដរជាតិ២ ថ្ងៃ ago
រុស្ស៊ីព្រមានអ៊ុយក្រែន បើហ៊ានវាយប្រហារថ្ងៃ៩ឧសភា ក្រុងកៀវទំនងមិនអាចរស់ដល់ថ្ងៃ១០ឧសភាទេ
-
សន្តិសុខសង្គម៥ ថ្ងៃ ago
ថៃបិទច្រកអានសេះ ដោយមិនជូនដំណឹងប្រាប់មុន
-
ព័ត៌មានអន្ដរជាតិ៤ ថ្ងៃ ago
បាតុករថៃចេញតវ៉ា ខណៈគណៈកម្មាធិការព្រំដែនទូទៅកម្ពុជា-ថៃជួបប្រជុំនៅបាងកក
-
ព័ត៌មានជាតិ៤ ថ្ងៃ ago
សមត្ថកិច្ចចាត់ទុកការចែកចាយលុយបង្កប់សារប្រឆាំងរដ្ឋជាសកម្មភាពបដិវត្តន៍ព័ណ៌ និងកំពុងចាត់វិធានការ
-
នយោបាយ៥ ថ្ងៃ ago
សម្តេចធិបតី ហួសចិត្តដែលលោកស្រី មួរ សុខហួរ និងបក្ខពួកទៅសុំអឺរ៉ុបដាក់ទណ្ឌកម្ម ខណៈកម្ពុជាកំពុងប្រឈមការដំឡើងពន្ធពីអាមេរិក