ព័ត៌មានជាតិ

គំរូភូមិវប្បធម៌នៅខេត្តសៀមរាប នឹងយកមករៀបចំនៅអាកាសយានដ្ឋានអន្តរជាតិតេជោ

បានផុស

១ year មុន

នៅ

ថ្ងៃចន្ទ ២៤ កុម្ភៈ ២០២៥

ដោយ

ឆ្លើយតបសំនួររបស់កម្ពុជាថ្មីក្នុងឱកាសទទួលប្រតិភូទូតតំណាងប្រទេសហ្វីលីពីន និងអូស្ត្រាលីចុះទស្សនកិច្ចពិនិត្យពីដំណើរការសាងសង់អាកាសយានដ្ឋានអន្តរជាតិតេជោកាលពីសប្ដាហ៍មុននេះ ឧកញ៉ា ឆារស៍ វ៉ាន់ បានបង្ហើបពីគម្រោងក្នុងការនាំយកគំរូភូមិវប្បធម៌នៅខេត្តសៀមរាប មករៀបចំនៅក្នុងអាកាសយានដ្ឋានអន្តរជាតិតេជោ។

ឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន (CAIC) បានគូសបញ្ជាក់ថា ការនាំយកគំរូភូមិវប្បធម៌នៅខេត្តសៀមរាបមករៀបចំនៅទីតាំងអាកាសយានដ្ឋានអន្តរជាតិតេជោ គឺក្នុងគោលដៅដើម្បីចូលរួមផ្សព្វផ្សាយ និងលើកតម្លៃនៃវប្បធម៌ដែលជាអត្តសញ្ញាណជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំណង់ផ្ទះបុរាណរបស់ខ្មែរកំពុងសាងសង់នៅទីតាំងអាកាសយានដ្ឋានអន្តរជាតិតេជោ

«គម្រោងនេះគឺយើងយកតែចំណែកខ្លះនៃភូមិវប្បធម៌ក្នុងខេត្តសៀមរាប យកមករៀបចំតែប៉ុណ្ណោះ»។ បើតាមលោកឧកញ៉ា ឆារស៍ វ៉ាន់ ការនាំគំរូភូមិវប្បធម៌មករៀបចំនៅអាកាសយានដ្ឋានតេជោ ជាចំណែកមួយចូលរួមផ្សព្វផ្សាយពីវប្បធម៌ខ្មែរទៅកាន់ពិភពលោក។

ពាក់ព័ន្ធផែនការបង្កើតភូមិវប្បធម៌នៅក្នុងទីតាំងអាកាសយានដ្ឋានថ្មី ដែលគ្រោងនឹងបើកដំណើរការក្នុងពេលដ៏ខ្លីខាងមុខនេះ ឧកញ៉ា ឆារស៍ វ៉ាន់ បានបញ្ជាក់ថា បច្ចុប្បន្នក្រុមហ៊ុនក៏កំពុងសាងសង់សំណង់ផ្ទះបុរាណមួយនៅច្រកចេញពីអាកាសយានដ្ឋាន ខណៈសំណង់វប្បធម៌ផ្សេងៗទៀតនឹងរៀបចំសាងសង់ជាបន្តបន្ទាប់។

យ៉ាងណាមិញ លោកមិនផ្តល់ព័ត៌មាននៅក្នុងគម្រោង នឹងមានសំណង់ណាផ្សេងទៀតដែលគ្រោងនឹងសាងសង់បន្តទៀតនោះទេ។

ក្រៅពីសំណង់ផ្ទះបុរាណដែលកំពុងសាងសង់យ៉ាងមមាញឹក ឲ្យទាន់ការដាក់ឲ្យដំណើរការអាកាសយានដ្ឋានអន្តរជាតិតេជោ ក្រុមហ៊ុនអភិវឌ្ឍអាកាសយានដ្ឋានអន្តរជាតិតេជោ ក៏បានដាំដើមឈើរាប់រយដើមតាមផ្លូវចេញចូលអាកាសយានដ្ឋានតេជោលើខ្សែផ្លូវប្រវែងជិត ១០ គីឡូម៉ែត្រ ដែលជាដើមឈើតំណាងជាតិ ហើយបើតាមឧកញ៉ា ឆារស៍ វ៉ាន់ អះអាងថា ក៏ជាផ្នែកមួយជួយលើកតម្កើងនិងរំលេចនូវអត្តសញ្ញាណជាតិផងដែរ៕