សភាជាតិនឹងផ្ដល់ការិយាល័យឱ្យអង្គការតំបន់ចំនួន២ធ្វើការនៅកម្ពុជា

ប្រធានរដ្ឋសភាកម្ពុជា សម្ដេចសភាធិការធិបតី ឃួន សុដារី មានមហិច្ចតាក្នុងការធ្វើឱ្យ​កម្ពុជាក្លាយជាមជ្ឈមណ្ឌលផ្សព្វផ្សាយ ស្រាវជ្រាវ ផ្លាស់ប្ដូរយោបល់មួយក្នុងតំបន់ និងសកលលោក។ សម្ដេចក៏ផ្ដល់ការិយាល័យដល់អង្គការតំបន់ចំនួន២ដែលជាជំហាននៃការចាប់ផ្ដើមនេះផងដែរ។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិការរងរដ្ឋសភាលោក ឈាង វណ្ណារិទ្ធ បានប្រាប់ក្រុមអ្នកសារព័ត៌មាននៅថ្ងៃទី១ ខែមេសា ឆ្នាំ២០២៥នេះថា នាពេលខាងមុខសភាជាតិនឹងផ្ដល់ការិយាល័យធ្វើការដល់វេទិកាសមាជិកសភាអាស៊ីស្តីពីប្រជាជន និងការអភិវឌ្ឍ ដែលហៅកាត់(AFPPD) និងមជ្ឈមណ្ឌលសភាអាស៊ី (PCAsia) បើកនៅក្នុងអាគាររដ្ឋបាលថ្មីរបស់រដ្ឋសភាតែម្ដង។ លោកថាការធ្វើបែបនេះគឺដើម្បីបង្កភាពងាយស្រួល ក៏ដូចជាជួយដល់អង្គការតំបន់ទាំងពីរនេះ ដោយសង្ឃឹមថាអង្គការទាំងពីរនឹងចូលរួមជួយកម្ពុជាដោយបង្កើតជាវេទិកាតំបន់នៅប្រទេសកម្ពុជាតែម្ដង។

លោកថា៖ «អាច(បង្កើតការិយាល័យ)ក្នុងពេលឆាប់ៗនេះដែរ ចាំមើលអាស្រ័យលើកិច្ចព្រមព្រៀងបន្ថែម តែសម្រាប់ជាគោលការណ៍គឺយើងមានហើយ»។

សភាកម្ពុជាទើបតែបានដឹកនាំសិក្ខាសាលាថ្នាក់តំបន់មួយប្រកបដោយជោគជ័យកាលពីថ្ងៃទី៣១ ខែមីនា ឆ្នាំ២០២៥ ដោយមានប្រតិភូសមាជិកសភាពីបណ្ដាប្រទេសក្នុងតំបន់អាស៊ីជាច្រើនប្រទេសចូលរួមជាច្រើន។ លោក ឈាង វណ្ណារិទ្ធ ថានេះគឺជាជោគជ័យមួយរបស់សភាកម្ពុជាក្នុងការរៀបចំសិក្ខាថ្នាក់តំបន់នេះ ហើយសភាជាតិក៏កំពុងរៀបចំសិក្ខាសាលាថ្នាក់តំបន់ផ្សេងទៀតនាពេលខាងមុខដែរ។

គួរឱ្យដឹងដែរថា វេទិកាសមាជិកសភាអាស៊ីស្តីពីប្រជាជន និងការអភិវឌ្ឍ ហៅកាត់ថា AFPPD គឺជាអង្គការតំបន់​អាស៊ីដែលមានសមាជិកប្រមាណ៣០ប្រទេស ដែលធ្វើការផ្ដោតលើគោលនយោបាយសម្រាប់ជួយស្រ្តី កុមារ និងប្រជាជន ខណៈមជ្ឈមណ្ឌលសភាអាស៊ី (PCAsia) គឺជាអង្គការតំបន់ធ្វើការលើកកម្ពស់សន្តិភាព ភាពសុខដុមរមនា និងការយោគយល់គ្នាទៅវិញទៅមកនៅក្នុងតំបន់អាស៊ាន តាមរយៈការពង្រឹងសមត្ថភាពមន្ត្រីសភាជាមួយនឹងជំនាញដែលទទួលស្គាល់ជាអន្តរជាតិ៕

អត្ថបទដោយ ហ៊ុន សិរីវឌ្ឍន៍