លោក ទេព អស្នារិទ្ធ សំណូមពរអ្នកនាំពាក្យសហការល្អជាមួយអ្នកសារព័ត៌មាន ហើយអ្នកសារព័ត៌មានក៏គួរយល់ពីអ្នកនាំពាក្យ

អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លោក ទេព អស្នារិទ្ធ បានថ្លែងក្នុងវេទិកាអ្នកជំនាញ របស់កម្ពុជាថ្មី សប្តាហ៍មុន សំណូមពរ និងអំពាវនាវដល់អ្នកនាំពាក្យក្រសួង ស្ថាប័ន ទាំងនៅថ្នាក់ជាតិ និងថ្នាក់ក្រោមជាតិ មេត្តាផ្តល់កិច្ចសហការជិតស្និទ្ធឱ្យទាន់ពេលវេលា ដើម្បីជួយអ្នកសារព័ត៌មានក្នុងការរាយកាណ៍ព័ត៌មានច្បាស់លាស់ ផ្ទៀងផ្ទាត់បានត្រឹមត្រូវ ប្រកបដោយក្រមសីលធម៌ និងវិជ្ជាជីវៈ។ ចំណែកអ្នកសារព័ត៌មាន លោកថា ក៏គួរយល់ពីអ្នកនាំពាក្យដូចគ្នាដែរ។

លោក ទេព អស្នារិទ្ធ សង្កត់ធ្ងន់ថា៖ “ការផ្តល់ព័ត៌មានទាន់ពេលវេលាជូនអ្នកសារព័ត៌មាន គឺជាតួនាទីរបស់អ្នកនាំពាក្យ។ ហើយខ្លួនខ្ញុំផ្ទាល់ ក៏ខ្ញុំព្យាយាមណាស់នៅក្នុងការធ្វើការប្រចាំថ្ងៃនេះ គឺមិនឱ្យអ្នកសារព័ត៌មានយើងខកចិត្តទេ”។

តាមការសង្កេត មួយរយៈមុន ឃើញមានអ្នកសារព័ត៌មានមួយចំនួនបានសរសេរលើបណ្តាញសង្គមត្អូញត្អែរថា បញ្ហាមួយចំនួន និងប្រធានបទខ្លះដែលអ្នកសារព័ត៌មានចង់បានការឆ្លើយតប ឬការបំភ្លឺពីអ្នកនាំពាក្យតាមក្រសួង ឬស្ថាប័នផ្សេង បែរជាពិបាកទាក់ទង ឬមិនមានការឆ្លើយតប ដែលការណ៍នេះ នាំឱ្យពិបាក់ដល់ការផលិតព័ត៌មានដូចគ្នា។

ទន្ទឹមនេះ លោក ទេព អស្នារិទ្ធ ក៏បានសំណូមពរដល់អ្នកសារព័ត៌មានវិញដូចគ្នា ឱ្យមានការយោគយល់ និងព្យាយាមទាក់ទងអ្នកនាំពាក្យបន្ថែមទៀត ព្រោះជួនកាលអ្នកនាំពាក្យមានកិច្ចការមមាញឹកខ្លាំង និងមានការងារផ្សេងទៀតដែលថ្នាក់ដឹកនាំប្រគល់ឱ្យធ្វើ។

អ្នកនាំពាក្យក្រសួងព័ត៌មានរូបនេះ បន្ថែមថា៖ “ខ្ញុំគិតថា បើសិនជាទាំងអ្នកកាសែត និងអ្នកនាំពាក្យគឺស្វែងយល់ពីគ្នាឱ្យបានច្រើន ពេលនោះហើយគឺយើងរកចំណុចរួមបាន ហើយយើងដឹងថា អ្នកសារព័ត៌មានគាត់មានតម្រូវការអ្វីប្រចាំថ្ងៃ ឯ អ្នកនាំពាក្យគាត់មានព័ត៌មាន ប្រធានបទអ្វីខ្លះដែលគាត់ត្រូវប្រាប់មកអ្នកសារព័ត៌មានវិញ”។

ជាមួយគ្នានេះ លោក ទេព អស្នារិទ្ធ ក៏បានបញ្ជាក់ទៀតថា ប្រសិនជាអ្នកនាំពាក្យមានកិច្ចការមមាញឹក អ្នកសារព័ត៌មានទាក់ទងអ្នកនាំពាក្យម្នាក់មិនបានទេ អាចព្យាយាមទាក់ទងអ្នកនាំពាក្យផ្សេងទៀត ព្រោះនៅតាមក្រសួង ស្ថាប័ន មួយចំនួន មានអ្នកនាំពាក្យជាប្រធាន អ្នកនាំពាក្យរង ឬអ្នកនាំពាក្យទី១ អ្នកនាំពាក្យទី២ ជាដើម៕