ព័ត៌មានជាតិ

៥ ខែ ឆ្នាំនេះ ខ្យល់កន្ត្រាក់កើតឡើងជាង ១៦០ លើក បង្កឱ្យមនុស្សស្លាប់ និងរបួសជិត ៣០ នាក់ កើនឡើងជាងឆ្នាំមុន

បានផុស

១ year មុន

នៅ

ថ្ងៃសុក្រ ៦ មិថុនា ២០២៥

ដោយ

នៅក្នុងរយៈពេល ៥ ខែ ឆ្នាំ ២០២៥ នេះ ខ្យល់កន្ត្រាក់បានកើតឡើងជាង ១៦០ លើក បង្កឱ្យមនុស្សស្លាប់ និងរបួសជិត ៣០ នាក់ ប៉ះពាល់ផ្ទះជាង ៥ ៥០០ ខ្នង និងហេដ្ឋារចនាសម្ព័ន្ធជាច្រើនទៀត បើធៀបទៅនឹងរយៈពេល ៥ ខែ ដូចគ្នា ឆ្នាំ ២០២៤ ឃើញថា មានការកើនឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ៦ មិថុនា នេះថា រយៈពេល ៥ ខែ ឆ្នាំ ២០២៥ នេះ ខ្យល់កន្ត្រាក់បានកើតឡើង ១៦១ លើក បណ្តាលឱ្យរលំផ្ទះ និងខូចខាតធ្ងន់ធ្ងរចំនួន ៣៦១ ខ្នង របើកដំបូល និងខូចខាតមធ្យមផ្ទះចំនួន ៥ ២២៥ ខ្នង សាលារៀន ៣៥ កន្លែង រលំតូបផ្សារ ១៩ តូប អគាររដ្ឋបាល ១៥ កន្លែង ស្លាប់មនុស្ស ៥ នាក់ និងរបួស ២៣ នាក់។

លោកបានបន្តថា ចំណោមអ្នកស្លាប់ ៥ នាក់ ក្នុងនោះមាន ១ នាក់ នៅខេត្តកំពង់ស្ពឺ ព្រៃវែង ១ នាក់ បាត់ដំបង ១ នាក់ សៀមរាប ១ នាក់ និងខេត្តកំពត ១ នាក់។

លោកបានបន្តទៀតថា តួលេខនេះ បើធៀបទៅនឹងរយៈពេល ៥ ខែ ដូចគ្នា ឆ្នាំ ២០២៤ កន្លងទៅ ឃើញថា មានការកើនឡើងគួរឱ្យកត់សម្គាល់ ដោយ ៥ ខែ ឆ្នាំ ២០២៤ ខ្យល់កន្ត្រាក់បានកើតឡើងចំនួន ១៣៨ លើក បណ្តាលឱ្យផ្ទះរលំខូចខាតធ្ងន់ធ្ងរ ២៩០ ខ្នង របើកដំបូល និងខូចខាតមធ្យម ២ ២៥៥ ខ្នង របើកដំបូលសាលារៀន ២៧ ខ្នង របើកតូបផ្សារ ៦ តូប អគាររដ្ឋបាល ៨ កន្លែង ស្លាប់មនុស្ស ៣ នាក់ និងរបួស ១៧ នាក់។

យោងតាមការប្រកាសរបស់ក្រសួងធនធានទឹក និងឧតុនិយម នៅព្រឹកថ្ងៃទី ៦ ខែមិថុនា នេះបានឱ្យដឹងថា ដោយសារឥទ្ធិពលខ្យល់មូសុងនិរតីជាមួយសម្ពាធទាបដែលគ្របដណ្ដប់លើឈូងសមុទ្រថៃ អាងទន្លេមេគង្គ និងសមុទ្រចិនខាងត្បូង មានឥទ្ធិពលមកលើព្រះរាជាណាចក្រកម្ពុជា បានធ្វើឱ្យតំបន់មួយចំនួនក្នុងព្រះរាជាណាចក្រកម្ពុជា នឹងបន្តមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្ដប់ចាប់ពី ២៥ ដល់ ៣៥ ភាគរយ ចាប់ពីថ្ងៃទី ៦ ដល់ថ្ងៃទី ៨ ខែមិថុនា ឆ្នាំ ២០២៥ ខណៈសីតុណ្ហភាពមានចន្លោះពី ២៤ ទៅ ៣៧ អង្សាសេ៕

អត្ថបទ ៖ សំអឿន