ក្រសួងការពារជាតិ៖ ត្បិតសម្រួលទីតាំងឈរជើង តែទ័ពខ្មែរនៅតែត្រៀមប្រយុទ្ធការពារទឹកដី ប្រឆាំងការឈ្លានពាន

ក្រសួងការពារជាតិកម្ពុជា អះអាងថា កម្ពុជា គ្រាន់តែសម្រួលទីតាំងឈរជើងរបស់កងទ័ពប៉ុណ្ណោះ ពោលគឺមិនមែនដកទ័ពចេញពីដែនដីខ្មែរ ឬកន្លែងដែលកងទ័ពខ្មែរធ្លាប់ឈរជើងតាំងពីយូរលង់មកហើយនោះទេ។ តាមក្រសួងការពារជាតិ ត្បិតថាសម្រួលទីតាំងឈរជើងក៏ពិតមែន ប៉ុន្តែកងទ័ពកម្ពុជា បានត្រៀមខ្លួនរួចជាស្រេច ក្នុងការប្រយុទ្ធ ដើម្បីការពារដែនដីខ្មែរ ពីឈ្លានពានរបស់សត្រូវ។ ក្រសួងការពារជាតិកម្ពុជា អះអាងដូច្នេះ នៅក្នុងសេចក្ដីប្រកាសព័ត៌មានចេញនៅថ្ងៃទី០៩ ខែមិថុនា នេះ។

ក្រសួងការពារជាតិ អះអាងតាមរយៈសេចក្ដីប្រកាសព័ត៌មានដូច្នេះ​៖«ពុំមានការដកកងទ័ពកម្ពុជាចេញពីតំបន់ដែលស្ថិតក្នុងដែនអធិបតេយ្យភាពរបស់កម្ពុជា ហើយដែលកង ទ័ពកម្ពុជាបានឈរជើងកាន់កាប់ជាយូរមកហើយនោះទេ។រាល់ការរៀបចំកម្លាំងរបស់កងទ័ពកម្ពុជា រាប់ទាំងការឈរជើង ការពង្រាយកម្លាំង ការកែសម្រួលកម្លាំង ការចល័តកម្លាំង គឺស្ថិតនៅក្នុងដែនអធិបតេយ្យភាពរបស់កម្ពុជា និងក្នុងគោលដៅត្រៀមខ្លួនការពារបូរណភាពទឹក ដីរបស់កម្ពុជាតែប៉ុណ្ណោះ។កងទ័ពកម្ពុជាគាំទ្រដល់ការខិតខំស្វែងរកដំណោះស្រាយបញ្ហាដោយសន្តិវិធី ប៉ុន្តែត្រៀមខ្លួនជាស្រេច ដើម្បីអនុវត្តបទបញ្ជារបស់រាជរដ្ឋាភិបាល ក្នុងការការពារបូរណភាពទឹកដី ប្រឆាំងរាល់ការប៉ុនប៉ងឈ្លានពាននានា។ »។

ស្របពេលដែលកម្ពុជា នឹងធ្វើជាម្ចាស់ផ្ទះទទួលរៀបចំកិច្ចប្រជុំគណៈកម្មការព្រំដែនចម្រុះ(JBC) នៅថ្ងៃទី១៤ ខែមិថុនា ឆាប់ៗនេះ  ក្រសួងការពារជាតិកម្ពុជា ឱ្យដឹងថា កងទ័ពកម្ពុជាត្រៀមខ្លួនជាស្រេចក្នុងការចូលរួមគាំទ្រ ដល់យន្តការចរចាព្រំដែនជាមួយប្រទេសថៃ ជាពិសេសគណៈកម្មការព្រំដែនចម្រុះ(JBC) ដើម្បីបន្តកិច្ចការវាស់វែងខ័ណ្ឌសីមា និងបោះបង្គោលព្រំដែនរវាង ប្រទេសទាំងពីរដែលនៅសេសសល់ ក្រៅពីចំណុចដែលកម្ពុជានឹងដាក់ទៅតុលាការយុត្តិធម៌អន្តរជាតិ (ICJ)។

នៅក្នុងសេចក្ដីប្រកាសព័ត៌មានដដែល ក្រសួងការពារជាតិ អំពាវនាវឱ្យជនរួមជាតិ និងអ្នកសារព័ត៌មានទាំងអស់ ប្រើប្រាស់តែព័ត៌មាន ដែលមានប្រភពច្បាស់លាស់ ជាពិសេសព័ត៌មានផ្លូវការដែលចេញពីរាជរដ្ឋាភិបាលកម្ពុជា និងក្រសួងការពារជាតិ ដែលជាប្រភពព័ត៌មានមានភាពត្រឹមត្រូវ ពិតប្រាកដ និងអាចជឿទុកចិត្តបាន។

សូមរម្លឹកជាថ្មីថា កាលពីវេលាព្រឹកព្រហាមថ្ងៃទី២៨ ខែឧសភា  កងទ័ពថៃ បានឈ្លានពានដីកម្ពុជា និងលបលួចបាញ់ប្រហារមកលើលេណដ្ឋាន ក្នុងភូមិសាស្ត្រតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ដែលជាទីតាំងឈរជើងរបស់កងទ័ពកម្ពុជាតាំងពីប្រមាណ៣០មុន​ បណ្ដាលឱ្យកងទ័ពកម្ពុជា ឈ្មោះ សួន រ៉ោន វ័យ៤៧ឆ្នាំ បាត់បង់ជីវិតភ្លាមៗ។

ឆ្លើយតបទៅនឹងហេតុការណ៍ផ្ទុះអាវុធបង្កឡើងដោយភាគីថៃ, សម្ដេចធិបតី នាយឧត្ដមសេនីយ៍ ហ៊ុន​ ម៉ាណែត ប្រមុខរដ្ឋាភិបាលកម្ពុជា​ ដែលកំពុងបំពេញទស្សនកិច្ចនៅជប៉ុន បានបញ្ជាឱ្យចល័តទ័ព និងអាវុធធុនធ្ងន់ទៅកាន់ព្រំដែន គឺដើម្បីការពារបូរណភាពទឹកដី។

បន្ទាប់មកនៅថ្ងៃទី០២ ខែមិថុនា រដ្ឋាភិបាលកម្ពុជា សម្រេចបញ្ជូនវិវាទព្រំដែនតំបន់មុំបី ប្រាសាទតាមាន់ធំ តាមាន់តូច និងតាក្របី ទៅតុលាការអន្តរជាតិ ICJ នៅទីក្រុងឡាអេ ដើម្បីដោះស្រាយបញ្ហាព្រំដែននេះ ប្រកបទៅដោយយុត្តិធម៌ មិនលម្អៀង និងយូរអង្វែង។

កិច្ច​ប្រជុំ​ព្រំដែន​ជាមួយ​ថៃ​ដែលគ្រោងធ្វើឡើយនៅ​ថ្ងៃទី​១៤ មិថុនា រាជរដ្ឋាភិបាល​កម្ពុជា​បញ្ជាក់ថា កម្ពុជា នឹងមិនជជែកអំពីតំបន់​ប្រាសាទតាមាន់តូច តាមាន់ធំ តាក្របី និងតំបន់​មុំ​៣នៅក្នុងកិច្ចប្រជុំឡើយ ព្រោះទុកឱ្យ ICJ ជាអ្នកសម្រេច៕