មន្រ្តី​ក្រសួង​សាធារណការ ប្រជុំ​ដោះ​ស្រាយ​​ផល​ប៉ះពាល់​គម្រោង​ស្ថាបនា​ផ្លូវជាតិលេខ ៧០បេ​ ពី​ទន្លេ​បិទ​​ដល់​ពាមរក៏​

មន្រ្តីក្រសួង​សាធារណការ​និងដឹកជញ្ជូន បាន​បើក​កិច្ចប្រជុំពិភាក្សាលើការងារបច្ចេកទេស និងការដោះស្រាយផលប៉ះពាល់​ពាក់ព័ន្ធ​ការអនុវត្តគម្រោងសាងសង់ផ្លូវជាតិលេខ ៧០ បេ។

នៅ​ទីស្ដីការក្រសួង លោក ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បាន​ដឹកនាំកិច្ចប្រជុំ ដើម្បីពិភាក្សាលើការងារបច្ចេកទេស និងការដោះស្រាយផលប៉ះពាល់ក្នុងការអនុវត្តគម្រោងសាងសង់ផ្លូវជាតិលេខ ៧០ បេ (ទន្លេបិទ-ស្រីសន្ធរ-ព្រែកតាមាក់-ល្វាឯម-ពាមរក៏) ដោយមានការចូលរួមពីសំណាក់មន្ដ្រីបច្ចេកទេស​គម្រោង និងតំណាងមន្ទីរសាធារណការ និងដឹកជញ្ជូនខេត្តកណ្ដាល។

បើតាម​មន្រ្តីក្រសួង​សាធារណការ​និងដឹកជញ្ជូន​បាន​គូស​បញ្ជាក់ថា កិច្ចប្រជុំនេះផ្ដោតសំខាន់លើការងារពិភាក្សាបច្ចេកទេស​ជារួម និងប្រមូលធាតុចូលពី​ផលប៉ះពាល់លើ​គម្រោង​ស្ថាបនា​ផ្លូវជាតិលេខ ៧០ បេ មុនអាច​ឈាន​​ទៅ​ដល់ការ​បើកការដ្ឋាន​សាងសង់​នៅពេល​ខាងមុខ។

គម្រោងស្ថាបនា​ផ្លូវជាតិលេខ ៧០ បេ ចាប់ពីទន្លេបិទ រហូតដល់ស្រុកពាមរក៍ ដែល​មានប្រវែង ១៣៩ គីឡូម៉ែត្រ បើតាមប្រភព​ពី​មន្រ្តី​ក្រសួង​សាធារណការ​និង​ដឹកជញ្ជូន​ គ្រោង​ប្រើប្រាស់​ថវិកា​ក្រោមក្របខ័ណ្ឌហិរញ្ញប្បទានសហប្រតិបត្តិការពីរដ្ឋាភិបាល​នៃសាធារណរដ្ឋប្រជាមានិតចិន៕