នាយករដ្ឋមន្ត្រី ថា ប្រទេស១៥០ រាប់ទាំងអាម៉េរិក មានច្បាប់ដកសញ្ជាតិចំពោះជនក្បត់ជាតិ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានបញ្ជាក់ថា មានប្រទេសចំនួន១៥០នៅលើពិភពលោក រាប់ទាំងសហរដ្ឋអាម៉េរិក គឺមានច្បាប់ដកសញ្ជាតិពីប្រជាពលរដ្ឋខ្លួន បើរកឃើញថា បានប្រព្រឹត្តទង្វើចូលដៃជាមួយបរទេស ដើម្បីប្រឆាំង និងបំផ្លាញផលប្រយោជន៍ជាតិខ្លួនឯង។

បើតាមសម្ដេចធិបតី ចំណោមប្រទេសជាសមាជិកអង្គការសហប្រជាជាតិសរុបចំនួន១៩៥ប្រទេស គឺមាន១៥០ប្រទេសទៅហើយដែលមានច្បាប់ដកសញ្ជាតិ ដែលក្នុងនោះប្រទេសនៅក្នុងសហភាពអឺរ៉ុប មានចំនួន១៨ប្រទេស ក៏មានច្បាប់ដកសញ្ជាតិនេះ រាប់ទាំងប្រទេសអង់គ្លេស និងមហាអំណាចសហរដ្ឋអាម៉េរិកថែមទៀតផង។

ការបញ្ជាក់របស់សម្ដេចធិបតី គឺធ្វើឡើងបន្ទាប់ពីក្នុងរយៈពេលប៉ុន្មានថ្ងៃនេះ ក្រុមនិន្នាការប្រឆាំងនៅក្រៅប្រទេស បានចេញមកបង្ហាញការព្រួយបារម្ភព្រោងព្រាត ក្រោយសម្ដេច​តេជោ ហ៊ុន សែន បានផ្ដួចផ្ដើមគំនិតឱ្យ​មាន​ការ​ធ្វើ​វិសោធនកម្ម​រដ្ឋធម្មនុញ្ញ បើកផ្លូវឱ្យដកសញ្ជាតិខ្មែរពីកំណើតចំពោះពលរដ្ឋខ្មែររូបណាដែលបានឃុបឃិតជាមួយបរទេស ដើម្បីបំផ្លាញនឹងផលប្រយោជន៍ជាតិខ្លួនឯង។ សំណើធ្វើវិសោធនកម្មនេះ កើតឡើងចំពេលដែលក្រុមប្រឆាំងជ្រុលនិយមជាជនជាតិខ្មែរមួយក្តាប់តូច បាននិងកំពុងវាយប្រហារជាតិឯង ក្នុងចេតនាបំបាក់ទឹកចិត្ត និងធ្វើឱ្យប៉ះពាល់កិត្តិយសជាតិ ក្នុងកាលៈទេសៈដែលកម្ពុជាកំពុងប្រឈមមុខដាក់គ្នាជាមួយប្រទេសថៃក្នុងជម្លោះព្រំដែន។

ក្នុងពិធីបើកការដ្ឋានសាងសង់​ស្នាក់ការ​គណបក្សប្រជាជនកម្ពុជាខេត្តកំពង់ធំ នាព្រឹកថ្ងៃទី៣ ខែកក្កដា ឆ្នាំ២០២៥នេះ សម្ដេចធិបតី ហ៊ុន ម៉ាណែត អះអាងឱ្យដឹងថា ក្នុងចំណោម១៥០ប្រទេសនេះ មាន១៣៤ប្រទេស ដែលមានច្បាប់ដកសញ្ជាតិ ចំពោះបទល្មើសក្បត់ជាតិ ដែលមានចេតនាប្រឆាំងផលប្រយោជន៍ជាតិ។ សម្ដេចបានលើកឡើងអំពីច្បាប់ថ្មីរបស់អាម៉េរិក គឺមានរហូតដល់ដកសញ្ជាតិចំពោះអ្នកដែលប្រព្រឹត្តអំពើភេរវកម្ម រាប់ដល់អំពើខ្វះសីលធម៌ថែមទៀត។

សម្ដេចធិបតី ថា នេះមិនមែនប្រទេសផ្ដាច់ការទេដែលមានច្បាប់ដកសញ្ជាតិ តែប្រទេសមហាអំណាច គឺមានច្បាប់ដកសញ្ជាតិ ដែលមានន័យថា កម្ពុជាធ្វើ មិនខុសពីលំនាំអន្តរជាតិឡើយ។

សម្ដេចនាយករដ្ឋមន្រ្តី ប្រាប់ទៅក្រុមប្រឆាំងថា«ខំភ័យធ្វើអី បើអ្នកឯងស្នេហាជាតិ ប្ដេជ្ញាចិត្តទោះបីជាដង្ហើមចុងក្រោយក៏មិនប្រឆាំងនឹងផលប្រយោជន៍ជាតិខ្មែរ អ៊ីចឹង! កុំភ័យព្រួយពេក បើអ្នកមានផែនការបំផ្លាញ ឃុបឃិតជាមួយនឹងបរទេស បំផ្លាញផលប្រយោជន៍ជាតិ អាហ្នឹងអ្នកឯងភ័យចុះ តែបើអ្នកបែបនេះ អ្នកមិនគួរជាខ្មែរទេ»។

បើតាមប្រធាន​ព្រឹទ្ធសភា សម្ដេច​តេជោ ហ៊ុន សែន នា​ថ្ងៃទី​១១ ខែ​កក្កដា ឆ្នាំ២០២៥​ខាង​មុខ រដ្ឋសភា នឹង​បើក​សម័យប្រជុំវិសាមញ្ញដើម្បីធ្វើ​វិសោធនកម្ម​រដ្ឋធម្មនុញ្ញ​លើការដកសញ្ជាតិខ្មែរនេះ។ ថ្លែងចេញពីខេត្តព្រៃវែង នាព្រឹកថ្ងៃទី​៣ ខែ​កក្កដានេះដែរ សម្ដេច​តេជោ ហ៊ុន សែន បញ្ជាក់ថា ការ​កែ​ប្រែរដ្ឋធម្មនុញ្ញនេះត្រូវ​បាន​សមាជិក​សភាទាំង​១២៥រូប និង​រដ្ឋាភិបាល​បាន​ទូល​ស្នើ​ទៅ​ព្រះមហាក្សត្រ និងទ្រង់ក៏បានសួរទៅ​ក្រុម​ប្រឹក្សា​ធម្មនុញ្ញរួចរាល់​ ហើយក្រុមប្រឹក្សា​ធម្មនុញ្ញ កាលពី​ថ្ងៃទី​២ ខែ​កក្កដា ក៏បានទូលថ្វាយព្រះមហាក្សត្រ ពាក់ព័ន្ធនឹងការធ្វើវិសោធនកម្មមាត្រា៣៣នៃរដ្ឋធម្មនុញ្ញកម្ពុជានេះ គឺ «អាចធ្វើទៅបាន»៕

ដោយ៖ ធឿន វ៉ាន់សុង